Border News Agency
မောင်တော၊ အောက်တိုဘာ ၂၄။
အာရက္ခတပ်တော်(AA)ထိန်းချုပ်ထားတဲ့မောင်တောမြို့နယ်၊မယူတောင်ခြေမှာအောက်တိုဘာလ ၂၄ ရက်၊ ဒီနေ့မနက်က အမျိုးသမီးငယ်တဦးအပါအဝင်ရွာသားသုံးဦးကိုလက်နက်ကိုင်အကြမ်းဖက်သမားတွေ ဖမ်းသွားတယ်လို့ မောင်တောဒေသခံတွေက ဆိုကြပါတယ်။
အဲဒီမောင်တောမြို့နယ်၊ကင်းချောင်းကျေးရွာက အသက်တဆယ့်နှစ်နှစ်အရွယ်အမျိုးသမီးငယ်မမိစန္ဒာ၊အသက်နှစ်ဆယ်နှစ်နှစ်အရွယ်မောင်ထွန်းအေး၊ အသက်လေးဆယ်တနှစ်အရွယ်ဦးမောင်ဘထွန်းကို လက်နက်ကိုင်အကြမ်းဖက်သမားတွေ ဖမ်းသွားကြတာပါ။
အဲဒီကျေးရွာသားခြောက်ဦးဟာ ကျေးရွာအရှေ့ဖက်၊မယူတောင်ခြေမှာ နွားကျောင်းနေကြတာကို လက်နက်ကိုင်အကြမ်းဖက်သမားတွေလာရောက်ဖမ်းသွားတာလို့ ကျေးရွာသားတွေက ဆိုကြပါတယ်။
“အာဆာတွေလာဖမ်းတဲ့အချိန် သုံးယောက်ကထွက်ပြေးလို့ လွတ်သွားတာ။ကိုကျော်ခိုင်က ရွာကိုရောက်လာပြီး အကြောင်းအကျိုးပြောပြတာ။ သက်ကြီးပိုင်းနှစ်ယောက်က ထွက်ပြေးပြီး တောထဲပုန်းနေတာကိုပြန်ရှာတွေ့တယ်။ မိန်းကလေးတဦးနဲ့အမျိုးသားနှစ်ဦးကတော့ ဖမ်းဆီးခံလိုက်လို့ ပါသွားတယ်။” လို့ ကင်းချောင်းရွာသားတဦးက Border News Agency ကိုပြောပါတယ်။
အဲဒီလိုဖမ်းဆီးချိန်မှာအသက်သုံးဆယ်ကျော်အရွယ်ကိုကျော်ခိုင်ထွက်ပြေးလွတ်မြောက်လာပြီး ကျေးရွာသားတွေကို အသိပေးသွားရှာကြတယ်လို့ဆိုပါတယ်။
အဲဒီနောက်အသက်ငါးဆယ်နှစ်နှစ်အရွယ်ဦးပန်းချေနဲ့ အသက်ငါးဆယ်ခြောက်နှစ်အရွယ်ဦးဘထွန်ကို တောထဲမှာပြန်တွေ့ခဲ့တာလို့ ဆိုကြပါတယ်။
အဲဒီကင်းချောင်းကျေးရွာဟာ မောင်တောမြို့နယ်၊သုံးမိုင်-အလယ်သံကျော်ကားလမ်းမှာတည်ရှိပြီး ကျေးရွာအရှေ့ဖက်မှာမယူတောင်တန်းကြီးတည်ရှိပါတယ်။
အဲဒီမယူတောင်တန်းကြီးရဲ့တောင်ခြေမှာကျေးရွာသားတွေကို လက်နက်ကိုင်အကြမ်းဖက်သမားတွေဖမ်းသွားတာဖြစ်ပြီးမယူတောင်တန်းကြီးကို ကျော်ဖြတ်လိုက်ပါက ဘူးသီးတောင်မြို့နယ်၊ညောင်းချောင်းကျေးရွာသို့ရောက်ပါတယ်။
အဲဒီမောင်တောမြို့နယ်မှာလက်နက်ကို င်အကြမ်းဖက်လှုပ်ရှားမှုတွေပိုများလာနေပြီး ဒေသခံအရပ်သားပြည်သူတွေသတ်ဖြတ်ဖမ်းဆီးပြန်ပေးဆွဲခံရတာတွေ မကြာခဏ ခံနေကြရပါတယ်။
