Border News Agency

စစ်တွေ၊အောက်တိုဘာ ၂၃။

ဒေသကွပ်ကွဲမှုစစ်ဌာနချုပ်တည်ရှိပြီး ပြည်နယ်စစ်ကောင်စီရုံးစိုက်ထားတဲ့စစ်တွေမြို့ကို အာရက္ခတပ်တော်(AA)က ထိုးစစ်ဆင်တိုက်ခိုက်တာတွေမပြုလုပ်နိုင်အောင် စစ်ကောင်စီတပ်က လက်နက်ကြီးပစ်ခတ်တာတွေ ပြုလုပ်နေတယ်လို့ စစ်တွေဒေသခံတွေက ဆိုကြပါတယ်။

အဲဒီစစ်တွေမြို့ရှိ စစ်ကောင်စီတပ်စခန်းတွေက ပေါက်တော၊ပုဏ္ဏားကျွန်း၊ရသေ့တောင် မြို့တွေဆီ လက်နက်ကြီးပစ်ခတ်နေတယ်လို့ အာရက္ခတပ်တော်(AA)က အောက်တိုဘာလ ၂၂ ရက်နေ့က ထုတ်ပြန်ပါတယ်။

အဲဒီအပြင် ပင်လယ်ပြင်ရှိ စစ်ကောင်စီရေတပ်စစ်သင်္ဘောကြီးတွေကလည်း လက်နက်ကြီးပစ်ခတ်တာတွေ၊လေကြောင်းဗုံးကြဲတိုက်ခိုက်တာတွေကိုလည်း နေ့စဥ်ပြုလုပ်နေတာမို့ အပြစ်မဲ့အရပ်သားပြည်သူတွေ နေ့စဥ်သေဆုံးဒဏ်ရာရနေကြတယ်လို့ ဆိုပါတယ်။

အဲဒီလိုပြုလုပ်နေတာတွေဟာ အာရက္ခတပ်တော်က အင်အားစုဖွဲ့လှုပ်ရှားတာတွေပြုလုပ်ပြီး စစ်တွေမြို့နယ်ကို လာရောက်တိုက်ခိုက်လို့မရအောင် လက်ဦးမှုယူတိုက်ခိုက်နေတာဖြစ်သလို အရပ်သားပြည်သူတွေနေထိုင်ပြီး အာရက္ခတပ်တော်ကို ထောက်ပံ့ကူညီနေကြတယ်ထင်ပြီး ဖြိုခွဲဖျက်ဆီးနေတာလို့ ရခိုင်စစ်ရေးစောင့်ကြည့်လေ့ လာသူတွေက ဆိုကြပါတယ်။

”စစ်တွေကိုတိုက်မယ်ဆိုရင် အဲဒီသုံးမြို့ကလာရမှာကို သိလို့ကြိုတိုက်နေတာ။အေအေတွေအင်အားစုလို့မရအောင်၊ပြည်သူတွေနေလို့မရအောင်ပေါ့။ဒရုန်းတွေနဲ့ကင်းထောက်တာတွေလည်းကြားနေရတယ်။အရင်လိုလာတိုက်မှာကိုခံစစ်နဲ့ထိုင်စောင့်နေတာမဟုတ်တော့ဘူး။စုဖွဲ့လှုပ်ရှားလို့မရအောင်ကြိုဖျက်ထားတာပေါ့။စစ်တပ်က လည်းဗျူဟာပြောင်းလာတယ်လို့ပြောရမယ်။”လို့ ရခိုင်စစ်ရေးစောင့်ကြည့်လေ့လာနေသူတစ်ဦးက Border News Agency သို့ ပြောပါတယ်။

အဲဒီစစ်တွေမြို့နယ်ပတ်ပတ်လည်းကို စစ်ကောင်စီရေတပ်က ရေတပ်စစ်သည်အင်အားရာနဲ့ချီ အသုံးပြုပြီး စစ်ကောင်ရေတပ်စစ်သင်္ဘော အစင်းရေသုံးဆယ်ကျော်ထိ အသုံးပြုကင်းလှည့်ရေပြင်ခံစစ်ပြုလုပ်ထားတယ်လို့ ဆိုကြပါတယ်။

အဲဒီအပြင်မြို့ပတ်ပတ်လည်ကို ခြံစည်းရိုးတွေကာရံထားပြီး ရေမြုပ်မိုင်းတွေ၊မြေမြုပ်မိုင်းတွေ ထောင်နဲ့ချီထောင်ထားသလို မြို့ပတ်ပတ်လည်မှာ ကတုတ် ကျင်းတွေကို စက်ယန္တယားကြီးတွေနဲ့အခိုင်အမာတည်ဆောင်ခံစစ်ပြင်ဆင်ထားတာလို့ ဆိုကြပါတယ်။

နောက်ပြီးရခိုင်ပြည်နယ်လွှတ်တော်၊နည်းပညာတက္ကသိုလ်၊စစ်တွေတက္ကသိုလ်၊ဗုဒ္ဓပြတိုက်၊ယဥ်ကျေးမှုပြတိုက်၊လောကာနန္ဒာစေတီဝင်းအပါအဝင်ဌာနဆိုင်ရာအဆောက်အအုံအားလုံးနဲ့အထပ်မြင့်နေရာအားလုံးမှာဝင်ရောက်တပ်စွဲခုခံစစ် ဆင်ပြင်ထားတယ်လို့ စစ်ကောင်စီတပ်အသိုင်းအဝိုင်းက ဆိုကြပါတယ်။

အဲဒီစစ်တွေမြို့နယ်ပတ်ပတ်လည်နေရာတွေမှာ ဘန်ကာတွေ၊ပစ်ကျင်းတွေအ ပါအဝင် ခံစစ်အခိုင်အမာပြုလုပ်ထားပြီး လက်နက်ကြီးအထိုင်တွေနေရာအ များစုမှာ တပ်ဖြန့်ခံစစ်ပြင်ဆင်ထားတယ်လို့လည်း စစ်ကောင်စီတပ်ဖွဲ့ဝင်တွေက ဆိုကြပါတယ်။

”ပွိုင့်ကနေစပြီးမြို့ပတ်ပတ်လည်မှာခံစ စ်အခိုင်အမာပြင်ထားတယ်။လက်နက် ကြီးတွေထိုင်ထားတယ်။ရေပြင်၊မြေပြင်ကင်းလှည့်ပြီးအင်အားအများအပြားဖြည့်ထားတယ်။အေအေလာမယ့်နေရာအားလုံးကို လက်နက်ကြီးပစ်ဖို့ အဆင်သင့်ပြင်ထားတယ်။စစ်တွေကိုဝင်ဖို့မလွယ်တော့ဘူး။မဆုတ်တမ်းခံစစ်အခိုင်အမာတည်ဆောက်ထား ပြီ”လို့ စစ်တွေမြို့နယ်ရှိ အမှတ် ၈၆၈ တပ်ထိန်းတပ်ခွဲမှစစ်ကောင်စီတပ်ဖွဲ့ဝင်တစ်ဦးက Border News Agency သို့ ပြောပါတယ်။

အဲဒီပြည်နယ်မြို့တော်မှာစစ်တွေအခြေစိုက်၊ဒေသကွပ်ကွဲမှုစစ်ဌာနချုပ်၊အမှတ် ၂၀ ခြေလျင်တပ်ရင်း၊အမှတ် ၂၃၂ ခြေလျင်တပ်ရင်း၊အမှတ် ၂၇၀ခြေလျင်တပ်ရင်း၊အမှတ် ၃၄၄ ခြေမြန်တပ်ရင်း၊အမှတ် ၃၅၄ ခြေမြန်တပ်ရင်း၊အမှတ် ၃၇၃ အမြောက်တပ်ရင်းတည်ရှိပါတယ်။

အဲဒီအပြင် အမှတ် ၉၀၈ စစ်မြေပြင်အင်ဂျင်နီယာတပ်ရင်း၊အမှတ် ၈၁၈ ဆက်သွယ်ရေးတပ်ရင်း၊အမှတ် ၈၂၈ ထောက်ပို့နဲ့ပို့ဆောင်ရေးတပ်ရင်း၊အမှတ် ၈ စစ်မြေပြင်ဆေးတပ်ရင်း၊အမှတ် ၉ လျှပ်စစ်နဲ့စက်မှုအင်ဂျင်နီယာတ ပ် ရင်း၊အမှတ် ၈ တိုက်ပွဲဝင်စည်းရုံးရေးသင်တန်းကျောင်း၊အမှတ် ၈၆၈ တပ်ထိန်းတပ်ခွဲ၊အမှတ် ၄ ဆက်သွယ်ရေးအလုပ်ရုံ၊အမှတ် ၉၆၂ ဆောက်လုပ်ရေးအင် ဂျင်နီယာတပ်ခွဲ၊အမှတ် ၄၃၄ စစ်လက်နက်တပ်ခွဲ၊အမှတ် ၁၀ ပညာရေးကျောင်းတည်ရှိပါတယ်။

နောက်ပြီး အမှတ် ၁၇ တပ်မတော်ကုတင် ၁၀၀ ဆေးရုံ၊အမှတ် ၂ စစ်ဖက်ရေး ရာလုံခြုံရေးတပ်စု၊အမှတ် ၁၂ ရဲတပ်ရင်း၊အမှတ် ၃၆ ရဲတပ်ရင်းတည်ရှိသလို ရေတပ်အခြေစိုက်စခန်းလည်း တည်ရှိပါတယ်။

အဲဒီစစ်တွေမြို့၊ပွိုင့်ကမ်းခြေအနီးရှိ အမှတ် ၃ ဗျူဟာစစ်ရေယာဉ်စုကို အနော က်ပိုင်းရေတပ်ကွပ်ကဲမှုဌာနချုပ်အဖြစ်တိုးမြင့်လိုက်သလို ဗိုလ်ချုပ်အဆင့်အ ရာရှိတစ်ဦးက ဦးဆောင်ကွပ်ကွဲနေပြီး အရာရှိအင်အားသုံးဆယ်၊ရေတပ် စစ်သ ည်အင်အားတစ်ရာ့ငါးဆယ်ဦးရှိနေတယ်လို့ Border News Agency က စုံစမ်းသိရှိရပါတယ်။

အဲဒီအမှတ် ၃ ဗျူဟာစစ်ရေယာဉ်စုကို စစ်တွေမြို့နယ်၊ရွှေမင်းဂံသို့ပြောင်းရွေ့တိုးဖွင့်လိုက်ပြီး စစ်ကောင်စီရဲ့ ရေတပ်စစ်သည်အင်အားနှစ်ရာကျော်ကစစ်ရေယာဥ်ကြီးငယ်ဆယ့်ရှစ်စင်းနဲ့ရိက္ခာထောက်ပို့မှုတွေ၊စစ်သည်အင်အားသယ်ယူပို့ ဆောင်မှုတွေ၊စစ်ကူ၊ပစ်ကူပေးမှုတွေကို အဓိကပြုလုပ်နေတယ်လို့ စစ်ကောင် စီရေတပ်အသိုင်းအဝိုင်းက ဆိုကြပါတယ်။

(ဓာတ်ပုံ-စစ်တွေမြို့ရှေ့ ကုလားတန်မြစ်ထဲမှာတွေ့ရတဲ့စစ်ကောင်စီရေတပ်စစ်သင်္ဘောတစ်စင်း/BNA)