Border News Agency
ပါကစ္စတန်၊မေ ၂၅။
ပါကစ္စတန်နိုင်ငံ၊အနောက်တောင်ပိုင်း ဘာလိုချီစတန်ပြည်နယ်ရဲ့ မြို့တော် ကွတ်တာမှာ စစ်ဘက်ဆိုင်ရာဝန်ထမ်းတွေ လိုက်ပါလာတဲ့ ရထားတစင်းကို မေလ ၂၄ ရက်နေ့ကဗုံးခွဲတိုက်ခိုက်ခဲ့တာကြောင့် လူ ၂၄ ဦး သေဆုံးပြီး ၅၀ ကျော် ဒဏ်ရာရရှိခဲ့တယ်လို့ သိရပါတယ်။
အဲဒီသေဆုံးသူတွေထဲမှာ စစ်ဘက်ဆိုင်ရာ ဝန်ထမ်းတွေလည်း ပါဝင်တယ်လို့ အဆင့်မြင့်အရာရှိတဦးက ပြောပါတယ်။
အဲဒီရထားဟာ ကွတ်တာမြို့ရှိ Chaman Pattak အချက်ပြမီးပွိုင့်အနီးကနေ ဖြတ်သန်းမောင်းနှင်နေချိန်မှာ ဖောက်ခွဲရေးပစ္စည်းတွေ တင်ဆောင်လာတဲ့ကားတစီးက ရထားတွဲတတွဲကို ဝင်တိုက်ခဲ့တာကြောင့် အရှိန်ပြင်းပြင်း ပေါက်ကွဲမှုဖြစ်ပွားခဲ့တာပါ။
အဲဒီပေါက်ကွဲမှုကြောင့် ရထားတွဲနှစ်တွဲ တိမ်းမှောက်ပြီး မီးလောင်ကျွမ်းခဲ့သလို အနီးနားက အဆောက်အအုံတွေနဲ့ လမ်းဘေးမှာ ရပ်ထားတဲ့ ယာဉ်အစီးရေ တဒါဇင်ကျော်လည်း ပျက်စီးသွားခဲ့ပါတယ်။
ဒီတိုက်ခိုက်မှုကိုတော့ ခွဲထွက်ရေးလက်နက်ကိုင်အဖွဲ့ဖြစ်တဲ့ ဘာလိုချီစတန် လွတ်မြောက်ရေးတပ်မတော် (BLA) ကသူတို့လက်ချက်ဖြစ်တယ်လို့ ထုတ်ဖော်ပြောကြားထားပါတယ်။
