Border News Agency
ပခုက္ကူ၊ မေ ၂၅။
မကွေးဒေသ၊ပခုက္ကူမြို့နယ်မှာအာဏာသိမ်းစစ်တပ်တပ်ဖွဲ့ဝင်နှစ်ဦး မြို့နယ်ပကဖ ဆီအလင်းဝင်လာတယ်လို့ COBRA ONE တပ်ဖွဲ့မှ မေလ ၂၄ ရက်နေ့က ထုတ်ပြန်ပါတယ်။
အာဏာသိမ်းစစ်တပ်ရဲ့ တပ်မ ၁၀၁ လက်အောက်ခံ ခလရ -၂၅၂ မှ ပြည်သူ့စစ်မှုထမ်းတပ်သားနှစ်ဦးဟာ မြို့နယ် ပကဖ – COBRA ONE တပ်ဖွဲ့ဆီဆက်သွယ်ပြီး အလင်းဝင်လာတာလို့ ဆိုပါတယ်။
စစ်တပ်ခလရ -၂၅၂ တပ်ရင်းမှ တပ်သားကျော်ဇောထွေးဟာ မေလ ၂၁ ရက်နေ့က အလင်းဝင်ခဲ့ပြီး တပ်သားဝင်းသန့်နိုင်ဟာ မေ ၂၃ ရက်နေ့မှာ ဆက်သွယ်အလင်းဝင်ခဲ့ကြတာလို့ဆိုပါတယ်။
အဲဒီအလင်းဝင်သူတွေရဲ့ ထွက်ဆိုချက်အရ အာဏာသိမ်းစစ်တပ်ဟာ နေရာအနှံ့ သေဆုံးတာတွေများတဲ့အတွက် ပြည်သူလူထုကို အဓမ္မပေါ်တာဆွဲဖမ်းဆီး သင်တန်းပေးပြီး ရခိုင်ဒေသရှေ့တန်း စစ်မြေပြင်တွေကို လွှတ်နေတယ်လို့ ဆိုပါတယ်။
ပြည်သူတွေအနေနဲ့ အာဏာသိမ်းစစ်တပ်ရဲ့ အဓမ္မပေါ်တာဆွဲဖမ်းဆီးတာတွေကို သွားလာရာမှာဂရုစိုက်ဖို့ COBRA ONE က သတိပေးထားပါတယ်။
