Border News Agency
ပုဏ္ဏားကျွန်း၊ ဇွန် ၉။
အာရက္ခတပ်တော် (AA) ထိန်းချုပ်ထားတဲ့ ပုဏ္ဏားကျွန်းမြို့နယ်၊ ကျောက်ဆိပ်ရွာမှာ ဇွန်လ ၈ ရက်နေ့က အမျိုးသားတဦး ကြိုးဆွဲချသေဆုံးသွားခဲ့ပါတယ်။
အဲဒီကျောက်ဆိပ်ရွာမှ အသက်လေးဆယ်နှစ်နှစ်အရွယ် ဦးစံလှမောင်ဖြစ်ပြီး သူ့သားအကြီးဆုံးဖြစ်သူ မောင်ဦး (ခ) ကျော်နိုင်ဆန်း စစ်မှုထမ်းပါသွားပြီးနောက်ပိုင်း စိတ်ထိခိုက်မူမမှန်တာတွေဖြစ်လာခဲ့တာလို့ ရွာသားတွေကဆိုကြပါတယ်။
အဲဒီလိုစိတ်ပိုင်းဆိုင်ရာပြဿနာတွေကြောင့်ပဲ ဇနီးဖြစ်သူနဲ့ သားသမီးတွေဟာ သူ့ဆီကခွဲခွာသွားကြပြီး နောက်ဆုံးမိခင်ဖြစ်သူနဲ့ပဲ နှစ်ယောက်တည်းကျန်ခဲ့တာလို့ ဆိုပါတယ်။
”အရင်တုန်းကတော့ သူဟာကောင်းမွန်တဲ့သူပါ။ ၂၀၂၅ ခုနှစ်၊ ၁၀ လပိုင်းလောက်ကခေါ်တဲ့ စစ်မှုထမ်းမှာ သူ့သားအကြီးကောင်ပါသွားတော့စိတ်ကသိပ်မူမမှန်တော့ဘူး။ အဲဒီကတည်းက သူ့ဇနီးမယားကိုတောင် ဓားနဲ့ခုတ်လို့ ဒဏ်ရာရဖူးတယ်။ ခုတော့အဲဒီပြဿနာကြောင့် သူ့မိသားစုတွေက သူ့နဲ့မနေတော့ဘဲ မိဘတွေရှိတဲ့ရွာကို သွားနေကြပြီ။” လို့ မိသားစုဝင်တဦးက Border News Agency ကို ပြောပါတယ်။
အဲဒီဦးစံလှမောင်ဟာ ဇွန်လ ၈ ရက်နေ့၊ ညနေငါးနာရီကျော်အချိန်ခန့်မှာ မိခင်ဖြစ်သူ အိမ်အောက်မှာထမင်းချက်နေချိန် သူဟာ အိမ်ပေါ်မှာ ပုဆိုးနဲ့လည်ပင်းကိုပတ်ပြီး သေကြောင်းကြံသွားတာဖြစ်ပါတယ်။
သူရဲ့ ရုပ်အလောင်းကို ရွာစည်းကမ်းအတိုင်း ချက်ချင်းပဲသင်္ဂြိုဟ်လိုက်ကြတယ်လို့ ဆိုပါတယ်။
”ပုံမှန်ဆို ပုဆိုးကိုကွင်းစွပ်ထားတဲ့ တိုင်ငုပ်နဲ့ ခင်းထားတဲ့ပျဉ်ကြမ်းပြင်က ရပ်မယ်ဆိုရင် ခြေထောက်လို့ရပါတယ်။ဒါပေမယ့် သူဟာ ပုဆိုးကိုလည်ပင်းမှာစွပ်၊ ခန္ဓာကိုယ်ကို လှည့်ပတ်ပြီးမှလည်ပင်းကို ပုဆိုးစည်းသွားအောင်လုပ်ပြီး သေသွားတာ။” လို့ သူရဲ့ ညီဖြစ်သူက Border News Agency ကိုပြောပါတယ်။
အာရက္ခဒေသမှာ စစ်မှုထမ်းဥပဒေအကောင်အထည်ဖော်မှုနဲ့ ဆက်စပ်ပြီး လူငယ်တွေစစ်ရှောင်တာနဲ့ မိသားစုဝင်တွေရဲ့စိတ်ပိုင်းဆိုင်ရာထိခိုက်မှုတွေဟာဖြစ်နေကြတယ်လို့ ပြည်သူတွေကဆိုကြပါတယ်။
