Border News Agency
ရေကြည်၊ သြဂုတ် ၁၄။
အာရက္ခတပ်တော်(AA)ထိန်းချုပ်နယ်မြေတွေကို အာဏာသိမ်းစစ်တပ်က လနှစ်ဆယ်ကြာတိုက်ခိုက်နေပေမယ့် မထိုးဖောက်နိုင်သေးပါဘူး။
အဲဒီအာဏာသိမ်းစစ်တပ်ဟာ ထိုးစစ်ဆင်တိုက်ခိုက်မှုတွေပုံစံမျိုးစုံ၊နည်းလမ်းမျိုးစုံနဲ့ အကြိမ်ကြိမ်ပြုလုပ်နေခဲ့တာ တနှစ်ကျော်နှစ်နှစ်နီးပါးခန့်ရှိလာခဲ့ပြီလို့ သြဂုတ်လ ၁၃ ရက်၊မနေ့က အာရက္ခတပ်တော်ထုတ်ပြန်ပါတယ်။
အဲဒီအာရက္ခ-ဧရာဝတီ၊အာရက္ခ-မကွေး၊အာရက္ခ-ပဲခူး၊အာရက္ခ-ချင်းအစပ်နေရာတွေမှာ အာဏာသိမ်းစစ်တပ်က အကြိမ်ကြိမ်ထိုးစစ်ဆင်တိုက်ခိုက်နေပြီ ထိုးဖောက်ဝင်နိုင်ဖို့ကြိုးစားနေတာပါ။
အဲဒီအပြင် ရေတပ်စစ်သင်္ဘောကြီးတွေကိုအားသာချက်ယူပြီး ဂွ၊ရမ်းဗြဲ၊သံတွဲစတဲ့မြို့နယ်တွေကိုလည်း ကမ်းတက်စစ်ဆင်ရေးတွေပြုလုပ်ခြေကုတ်ယူဖို့ကြိုးစားခဲ့ပေမယ့် အာရက္ခတပ်တော်ပစ်ခတ်တိုက်ခိုက်တာတွေခံရပြီး နောက်ဆုတ်သွားတာဖြစ်ပါတယ်။
အဲဒီအပြင် ပုဏ္ဏားကျွန်းမြို့နယ်ကိုလည်း ကြည်း၊ရေ၊လေ ပူးပေါင်းထိုးစစ်ဆင်တိုက်ခိုက်ပြီး အာဏာသိမ်းစစ်တပ်ပြန်ဝင်ဖို့ကြိုးစားနေပေမယ့် ခြေကုတ်မရဘဲတပ်လန်နေတယ်လို့ မြေပြင်စစ်ရေးသတင်းရင်းမြစ်တွေကဆိုကြပါတယ်။
အဲဒီအာရက္ခ-ဧရာဝတီအစပ် ဂွမြို့နယ်ကို ၂၀၂၄ ခုနှစ်၊ဒီဇင်ဘာလက အာရက္ခတပ်တော်အပြီးသတ်တိုက်ခိုက်သိမ်းပိုက်ထိန်းချုပ်ထားပြီး ဧရာဝတီတိုင်းထဲသို့ ရှေ့တိုးထိုးစစ်ဆင်သိမ်းယူနေတာဖြစ်ပါတယ်။
အဲဒါကြောင့် အာရက္ခ-ဧရာဝတီအစပ်နေရာတွေမှာ ဒီရက်ပိုင်းတိုက်ပွဲတွေဆက်ပြင်းထန်နေခဲ့တယ်လို့ အာရက္ခတပ်တော်ထုတ်ပြန်ပါတယ်။
အာရက္ခတပ်တော်လည်း စစ်တွေနဲ့ကျောက်ဖြူကို နှစ်နှစ်နီးပါးထိုးစစ်ဆင်တိုက်ခိုက်နေပေမယ့် အပြီးသတ်မသိမ်းနိုင်သေးသလို အဆုံးအဖြတ်ပေးမယ့်ထိုးစစ်တွေမတွေ့ရသေးဘူးလို့ စစ်ရေးစောင့်ကြည့်လေ့လာနေကြသူတွေကဆိုကြပါတယ်။
အာရက္ခအဆုံးအဖြတ်စစ်ပွဲမှာ အာရက္ခတပ်တော်ဟာ ပလက်ဝဒေသအပါအဝင်တဆယ့်ငါးမြို့နယ်ကို အပြီးသတ်သိမ်းပိုက်ထိန်းချုပ်ထားပြီး ကျန်မြို့နယ်တွေကို ထိုးစစ်ဆင်တိုက်ခိုက်နေပါတယ်။
