Border News Agency
နေပြည်တော်၊ စက်တင်ဘာ ၈။
မြန်မာနိုင်ငံမှာပိုဆိုးလာနေတဲ့ လူ့အခွင့်အရေးချိုးဖောက်မှုတွေကိုရပ်တန့်ဖို့ နိုင်ငံတကာက နှစ်ပေါင်းများစွာကြိုးစားခဲ့ပေမယ့် မအောင်မြင်ဘဲပိုဆိုးလာတာကြောင့် ဒီအခြေအနေကိုအပြည်ပြည်ဆိုင်ရာ ရာဇဝတ်ခုံရုံး (ICC) ဆီလွှဲပြောင်းအရေးယူဖို့ ကုလသမဂ္ဂလူ့အခွင့်အရေးဆိုင်ရာ မဟာမင်းကြီး ဗိုကာတာ့ခ်က တိုက်တွန်းလိုက်ပါတယ်။
ဂျီနီဗာမြို့မှာကျင်းပတဲ့ ခြောက်ဆယ့်သုံးကြိမ်မြောက်ကုလလူ့အခွင့်အရေးကောင်စီညီလာခံမှာ စက်တင်ဘာလ ၇ ရက်နေ့က မဟာမင်းကြီးကအခုလိုပြောလိုက်တာဖြစ်ပါတယ်။
အာဏာသိမ်းစစ်တပ်ဆီ လက်နက်တွေ၊ ဂျက်လေယာဉ်လောင်စာဆီတွေနဲ့လူ့အခွင့်အရေးချိုးဖောက်ရာမှာသုံးလို့ရတဲ့ ပစ္စည်းတွေတင်ပို့ရောင်းချတာ မလုပ်ကြဖို့လည်း အဖွဲ့ဝင်နိုင်ငံတွေကိုတောင်းဆိုခဲ့ပါတယ်။
အဲဒီအပြင် နိုင်ငံတကာဥပဒေတွေကို ချိုးဖောက်နေတာကိုမသိချင်ယောင်ဆောင်ပြီး စစ်တပ်ကြီးစိုးတဲ့အစိုးရသစ်နဲ့ ပုံမှန်ဆက်ဆံရေးပြန်ထူထောင်ဖို့ ကြိုးစားနေတာတွေကိုလည်း သတိပေးခဲ့ပါတယ်။
နောက်ပြီးအပြောင်းအလဲပေါ် မူတည်ပြီး ထိတွေ့ဆက်ဆံတာထက် လူ့အခွင့်အရေးကိုအခြေခံတဲ့ဆက်ဆံရေးကိုဘဲ လုပ်ဆောင်သင့်တယ်လို့ မစ္စတာတာ့ခ် က ထောက်ပြခဲ့ပါတယ်။
စစ်အာဏာသိမ်းပြီးနောက်ပိုင်း လေကြောင်တိုက်ခိုက်မှုတွေကြောင့် အရပ်သားသုံးထောင်ကျော်သေဆုံးခဲ့ရပြီး ရခိုင်ပြည်ကရိုဟင်ဂျာတွေဟာလည်း စနစ်တကျဖိနှိပ်ခံနေရတဲ့အပြင် စစ်မှုထမ်းဖို့အတင်းအကြပ်ခေါ်ယူတာတွေခံနေရတယ်လို့လည်း ကုလမဟာမင်းကြီးက ပြောဆိုခဲ့ပါတယ်။
