Border News Agency
ကျောက်တော်၊ ဇူလိုင် ၂၉။
အာရက္ခတပ်တော်(AA)ထိန်းချုပ်နယ်မြေတွေမှာ စားဝတ်နေရေးကျပ်တည်းလို့ဓါးမြတိုက်၊ ခိုးဆိုးလုယက်မှုတွေများပြားလာနေတာမို့ တရားဥပဒေစိုးမိုးရေးဆောင်ရွက်ပေးဖို့လိုအပ်နေတယ်လို့ ပြည်သူတွေကဆိုကြပါတယ်။
အာရက္ခဒေသမှာ လမ်းပန်းဆက်သွယ်ရေးပိတ်ဆို့ခံထားရတာ၊အလုပ်အကိုင်ရှားပါးတာ၊ ကုန်ဈေးနှုန်းတွေအဆမတန်မြင့်တက်တာ၊ စားဝတ်နေရေးခက်ခဲကျပ်တည်းတာစတဲ့အခြေအနေတွေကြောင့် ဓားမြတိုက်ခိုးဆိုးယုယက်မှုတွေများလာနေတာလို့ ပြည်သူတွေကဆိုကြပါတယ်။
“ဒုစရိုက်မှုတွေများပြားလာရတဲ့ အဓိကအကြောင်းအရင်းက စားဝတ်နေရေးကျပ်တည်းလို့ဘဲပေါ့နော်။ ဘယ်သူမှ ဆင်းရဲငတ်မွတ်မှုဒဏ်ကိုမခံနိုင်ကြဘူး။ ငတ်မွတ်လာရင် ဘာမဆိုလုပ်ရဲလာကြတယ်။ဝင်ငွေမရှိရင်စားဝတ်နေရေးလည်း အဆင်မပြေတော့ ဒီလမ်းကိုရွေးတာလည်းရှိမယ်။ ခုရခိုင်မှာကတရားဥပဒေစိုးမိုးရေးအားနည်းနေသေးတယ်။အဲဒါတွေကို အခွင့်ကောင်းယူပြီးဒုစရိုက်မှုတွေများလာတာလို့လည်းပြောလို့ရတယ်” လို့ အာရက္ခပြည်သူတဦးက Border News Agency ကိုပြောပါတယ်။
အာရက္ခတပ်တော်ဟာ ပလက်ဝဒေသအပါအဝင်အာရက္ခဒေသက ဆယ့်လေးမြို့နယ်ကိုသိမ်းပိုက်ထိန်းချုပ်ထားပြီးအာရက္ခပြည်သူ့အစိုးရအဖြစ်အုပ်ချုပ်ရေးယန္တရားတွေဖော်ဆောင်နေပေမယ့် တရားဥပဒေစိုးမိုးရေးတွေအားနည်းနေသေးတာတွေမို့ ခိုးဆိုးလုယက်မှုတွေပိုများလာတာလို့ ပြည်သူတွေကဆိုကြပါတယ်။
အာရက္ခတပ်တော်ထိန်းချုပ်နယ်မြေကကျေးရွာတချို့မှာ ပစ္စည်းအလစ်ခံရတာ၊ နေအိမ်အတွင်းဝင်ခိုးခံရတာ၊ ညအချိန် ကျွဲ၊နွား၊တိရစ္ဆာန်တွေပျောက်ဆုံးတာ၊ ခိုးယူခံရတာတွေများပြားလာနေတယ်လို့ ပြည်သူတွေကဆိုကြပါတယ်။
“ရွာဘက်တွေမှာဆိုရင်လည်း ကျွဲ၊ နွားတွေပျောက်တာများလာတယ်။ ညဘက်ဆိုကောင်းကောင်းမအိပ်ရဘူး။ ကျွဲ၊နွားတွေပျောက်ရင် အခုရှာရင်ရှာ၊မရှာရင် အသားငါးတွေဖြစ်သွားပြီ။ ခိုးတဲ့သူကိုသိပေမယ့် အုပ်စုဖွဲ့လှုပ်ရှားနေတာဆိုတော့သွားမဖမ်းရဲဘူး။တရားဥပဒေစိုးမိုးတာအားနည်းတော့ကိုယ့်အသက်ပါအန္တရာယ်ရှိတယ်” လို့ အာရက္ခပြည်သူတဦးက Border News Agency ကိုပြောပါတယ်။
အဲဒီ ကျောက်တော်မြို့နယ်၊ပြိန်းချောင်းကျေးရွာမှာ ဇူလိုင်လ ၂၄ ရက်နေ့ကအသက်ငါးဆယ်ကျော်အရွယ် ဒေါ်ဝင်းနုရီမှာ ဓားပြတိုက်သတ်ဖြတ်ခံရပြီး ရွှေလေးကျပ်နဲ့ငွေဆယ့်ငါးသိန်းကျပ် ပါသွားခဲ့ပါတယ်။
အဲဒီအပြင် ကျောက်တော်မြို့မဈေးကြီးမှာ ဇူလိုင်လ ၃ ရက်နေ့ကလည်းအမျိုးသမီးတစ်ဦးခါးပိုက်နှိုက်ခံရပြီးရွှေနှစ်ကျပ်နဲ့ငွေခြောက်သိန်းပါသွားတယ်လို့ မြို့ခံတွေကဆိုကြပါတယ်။
နောက်ပြီးကျောက်တော်မြို့နယ်၊ ကွမ်းအုံချောင်းကျေးရွာမှာ ဇူလိုင်လ ပထမအပတ်က ဆန်စက်ပိုင်ရှင်ကိုကျော်သက်လှိုင်ရဲ့ နေအိမ်ဓါးပြတိုက်ခံရပြီးရွှေဆယ်ကျပ်သားနဲ့ငွေသားအချို့ပါသွားခဲ့ပါတယ်။
အဲဒီကျောက်တော် – မြောက်ဦး ကားလမ်းမတချို့နေရာတွေမှာ ပြီးခဲ့တဲ့ဖေဖော်ဝါရီလက ဆိုင်ကယ်၊ခြေလျှင်သွားလာနေသူတွေဆီကရွှေ၊ငွေ၊ဖုန်းစတဲ့ပစ္စည်းတွေကို ဓားပြတိုက်လုယက်မှုတွေလည်းရှိခဲ့တယ်လို့ဒေသခံတွေကဆိုကြပါတယ်။
အာရက္ခဒေသမှာ ဓါးပြတိုက်၊ ခိုးဆိုးလုယက်မှုစတဲ့ ဒုစရိုက်မှုတွေများပြားလာနေတာကြောင့် ပြည်သူတွေဟာအသက်အန္တရာယ်စိုးရိမ်နေကြရတယ်လို့ ဆိုကြပါတယ်။
အဲဒါကြောင့်အာရက္ခပြည်သူ့အစိုးရအနေနဲ့ တရားဥပဒေစိုးမိုးရေးကို ထိရောက်အောင်ဆောင်ရွက်ပေးဖို့လိုအပ်နေပြီလို့ ပြည်သူတွေကဆိုကြပါတယ်။
