Border News Agency
ကျောက်ဖြူ၊ မေ ၂၀။
ကျောက်ဖြူမြို့နယ်၊ တောင်မော်ဦးရေတပ်စခန်းအနီး၊ သိုင်းချောင်းနဲ့ဇိုင်ချောင်းတဝိုက်မှာ တိုက်ပွဲတွေနေ့တိုင်းပြင်းထန်နေပြီး အာဏာသိမ်းစစ်တပ်ကလေကြောင်း၊ လက်နက်ကြီးနဲ့ဒရုန်းတွေသုံးပြီး အရပ်သားကျေးရွာတွေကို ရွယ်ရည်ချက်ရှိရှိတိုက်ခိုက်နေတယ်လို့ ဒေသခံတွေကဆိုကြပါတယ်။
အာဏာသိမ်းစစ်သင်္ဘောတွေက လက်နက်ကြီးတွေနဲ့ဒရုန်းဗုံးတွေ ဆက်တိုက်ပစ်ခတ်တာကြောင့် စနဲမြို့နဲ့ မြို့အနီးက ကျေးရွာနှစ်ဆယ်ရှိနေအိမ်တွေ မီးလောင်ပြာကျခဲ့ရသလို ပေါက်ပြင်ရွာနဲ့ ရွာသစ်ကေရွာက ဒေသခံတွေပါ ထိခိုက်သေဆုံးမှုတွေရှိခဲ့ပါတယ်။
အဲဒီပစ်ခတ်မှုတွေကြောင့် အသက် ၆၃ နှစ်အရွယ် ဒေါစံအေးနုသေဆုံးခဲ့ရပြီး ဆရာတော်ဦးပညာဝံသ အပါအဝင် အသက် ၁၄ နှစ်နဲ့ ၁၇ နှစ်အရွယ်ကလေးတွေနဲ့ ဒေသခံ ၆ ဦး ပြင်းထန်ဒဏ်ရာရလို့ အရေးပေါ် ဆေးကုသနေကြပါတယ်။
ကျောက်ဖြူမြို့နယ်မှာ အဝတ်တထည်ကိုယ်တခုတည်းနဲ့ ထွက်ပြေးရတဲ့စစ်ဘေးရှောင်ဦးရေ ငါးသောင်းကျော်ထိရှိနေပြီး မိုးသည်းထန်စွာရွာသွန်းနေတဲ့ကြားမှာ ဒုက္ခရောက်နေကြရတယ်လို့ ဆိုကြပါတယ်။
စစ်ဘေးရှောင်နေရတဲ့ ကလေးငယ်တွေ၊ ကိုယ်ဝန်ဆောင်မိခင်တွေနဲ့ သက်ကြီးရွယ်အိုတွေအတွက် မိုးကာလိပ်၊ တာပေါ်လင်စ စတဲ့ အမိုးအကာတွေ၊ ဆန်၊ ဆီ၊ ဆား အခြေခံစားသောက်ကုန်တွေနဲ့ အရေးပေါ်ဆေးဝါးတွေ လုံးဝပြတ်လပ်နေတယ်လို့လည်းဆိုပါတယ်။
အဲဒီစစ်ဘေးရှောင်တွေကို ကူညီပေးနိုင်ဖို့ ရမ္မာမြီပရဟိတအဖွဲ့က အခြေခံစားသောက်ကုန်နဲ့ ဆေးဝါးပစ္စည်းတွေကို အရေးပေါ်လှူဒါန်းပေးကြဖို့ နှိုးဆော်ထားပါတယ်။
