Border News Agency
ထိုင်း၊ ဇွန် ၆။
ထိုင်းနိုင်ငံ၊ ကန်ချနဘူရီခရိုင်မှာ မြန်မာနိုင်ငံဘက်က ငွေလိမ်ဂိုဏ်းစင်တာတွေဆီ သွားမယ့် တရားမဝင်တရုတ်နိုင်ငံသား ၄ ဦးနဲ့အတူ လိုက်ပါပို့ဆောင်ပေးသူ မွန်အမျိုးသားတဦးကို အိုင်ဖုန်း ၈၀ ကျော်နဲ့အတူ ဖမ်းဆီးရမိခဲ့တယ်လို့ သိရပါတယ်။
ဇွန်လ ၅ ရက်နေ့က ကန်ချနဘူရီရဲတပ်ဖွဲ့ဟာ မြို့တွင်းလှည့်ကင်းဆောင်ရွက်နေစဉ် လမ်းကြားတခုအတွင်း တက္ကစီကားပေါ်ကနေ ပစ်ကပ်ကားပေါ်သို့ လူပြောင်းစီးနေတဲ့ သံသယဖြစ်ဖွယ်အခြေအနေကိုတွေ့ရှိပြီး ဝင်ရောက်စစ်ဆေးခဲ့တာဖြစ်ပါတယ်။
အဲဒီလိုစစ်ဆေးစဉ် တက္ကစီကားက မောင်းပြေးသွားခဲ့ပေမယ့် ကျန်ရှိနေတဲ့ ပစ်ကပ်ကားကိုတော့ တားဆီးနိုင်ခဲ့တာ ဖြစ်ပါတယ်။
ကားပေါ်မှာ အသက် ၃၄ နှစ်အရွယ် မွန်အမျိုးသား ယာဉ်မောင်း စုချတ်အပါအဝင် အထောက်အထားမဲ့ တရုတ်အမျိုးသား ၃ ဦးနဲ့ ဗီဇာသက်တမ်းကုန်နေတဲ့ တရုတ်အမျိုးသား ၁ ဦးကို တွေ့ရှိခဲ့ရတာပါ။
အဲဒီအပြင်ကားအတွင်းကနေ ငွေလိမ်ဂိုဏ်းစင်တာတွေမှာ အသုံးပြုဖို့ယူဆောင်လာတဲ့ အိုင်ဖုန်းအသစ် ၇၇ လုံးနဲ့ သူတို့ရဲ့ကိုယ်ပိုင်ဖုန်း ၄ လုံး အပါအဝင် စုစုပေါင်းအိုင်ဖုန်း ၈၁ လုံးကို သိမ်းဆည်းရမိခဲ့တာဖြစ်ပါတယ်။
တရားခံတရုတ်နိုင်ငံသားတွေရဲ့ ဝန်ခံချက်အရ သူတို့ဟာ ကမ္ဘောဒီးယားနိုင်ငံကနေတဆင့် ခိုးဝင်လာတာဖြစ်ပြီး မြန်မာနိုင်ငံ ဘုရားသုံးဆူမြို့နယ်ဘက်မှာရှိတဲ့ ငွေလိမ်ဂိုဏ်းစင်တာက သူငယ်ချင်းတွေဆီကို သွားရောက်ဖို့လာခဲ့ကြတာဖြစ်တယ်လို့ ဆိုပါတယ်။
အဲဒီယာဉ်မောင်းဖြစ်သူကလည်း တရုတ်နိုင်ငံသားတွေကို ချိန်းထားတဲ့နေရာသို့ လိုက်ပို့ပေးဖို့အတွက် အခကြေးငွေ ထိုင်းဘတ် ၂,၀၀၀ ရရှိခဲ့တာကြောင့် အခုလိုလိုက်ပို့ပေးခဲ့တာဖြစ်တာလို့ ဝန်ခံထားပြီး လက်ရှိမှာတော့ ရဲတပ်ဖွဲ့ကတရားခံအားလုံးကို ကန်ချနဘူရီမြို့နယ်ရဲစခန်းမှာ ထိန်းသိမ်းကာ ဥပဒေအရ အရေးယူဖို့နဲ့ နောက်ကွယ်ကကွင်းဆက်တွေကို ဆက်လက်ဖော်ထုတ်ဖို့ ဆောင်ရွက်နေပါတယ်။
