Border News Agency
မောင်တော၊ စက်တင်ဘာ ၈။
မောင်တောမြို့နယ်၊ ကိုင်းကြီးကျေးရွာသားပိုင်းနွားဆယ်ကောင်ဟာ စက်တင် ဘာလပထမအပတ်က မယူတောင်ခြေအနီးမှာပျောက်ဆုံးသွားတယ်လို့ ရွာသားတွေက အတည်ပြုပြောကြပါတယ်။
အဲဒီနွားတွေကိုကျေးရွာအနီးမယူတောင်ခြေမှာနေ့တိုင်းလွှတ်ကျောင်းထားကြတာဖြစ်ပြီး ညနေကျရင် တောင်ခြေအနီးတောစပ်မှပြန်လာကြတာလို့ ရွာသားတွေက ဆိုကြပါတယ်။
ဒါပေမယ့် စက်တင်ဘာလပထမအပတ်မှာတော့ နွားဆယ်ကောင်ဟာ ပြန်မပါလာတာမို့ ကျေးရွာသားတွေသွားရောက်ရှာဖွေကြချိန်မှာ သတ်ဖြတ်ထားတဲ့သွေးတွေ၊ အရိုးစတွေကိုသာ တွေ့ကြရတယ်လို့ ကိုင်းကြီးကျေးရွာသားတွေက ဆိုကြပါတယ်။
“ကျွန်တော်တို့ရွာသားပိုင်နွား ၁၀ ကျော် ပျောက်သွားမှန်းသိတော့ လူအင်အားစုပြီး တောထဲသို့လိုက်ရှာကြပါတယ်။ လိုက်ရှာကြတော့ ကျွန်တော်တို့တွေ့တာက နွားတွေကို သတ်ဖြတ်လှီးထားတာတွေပါ။ သွေးတွေကိုမြင်ခဲ့ရတယ်။” လို့ နွားပျောက်လိုက်ရှာခဲ့တဲ့ကိုင်းကြီးရွာသားတဦးက Border News Agency ကို ပြောပါတယ်။
အဲဒီကိုင်းကြီးကျေးရွာအနီး မယူတောင်ခြေမှာကျွဲတွေ၊နွားတွေမကြာခဏပျောက်ဆုံးခဲ့တာတွေရှိခဲ့ပေမယ့် တကောင်စ၊ နှစ်ကောင်စသာဖြစ်ပြီး ခုလိုမျိုးငါးကောင်၊ ဆယ်ကောင်ထိပျောက်ဆုံးခဲ့တာမရှိဘူးလို့ ကိုင်းကြီးကျေးရွာသားတွေက ဆိုကြပါတယ်။
အဲဒီမယူတောင်မှာ ရိုဟင်ဂျာအမည်ခံလက်နက်ကိုင်အကြမ်းဖက်သမားတွေဟာ အရင်ကတည်းက စခန်းချနေထိုင်ခဲ့ကြတာတွေရှိခဲ့ပြီး ပျောက်ဆုံးသတ် ဖြတ်ခံလိုက်ရတဲ့နွားဆယ်ကောင်းဟာလည်း ရိုဟင်ဂျာအမည်ခံလက်နက်ကိုင်အကြမ်းဖက်သမားတွေဖမ်းဆီးသတ် ဖြတ်စားသောက်လိုက်ကြတာဖြစ်နိုင်တယ်လို့ ရွာသားတွေက ဆိုကြပါတယ်။
“ကျွန်တော်တို့ရွာသားတွေကတော့ နွားတွေကို အာဆာအဖွဲ့ကသတ်စားလိုက်တာလို့ထင်ကြပါတယ်။ အဲဒီကိုင်းကြီးဂျိုင်းထဲမှာ အာဆာတွေ စခန်းချနေထိုင်ခဲ့တဲ့နေရာတွေရှိခဲ့ဖူးပါတယ်။ ခုနွားဆယ်ကောင်ပျောက်သွားတာလည်းရိုးရိုးမဟုတ်တာတော့သေချာပါတယ်။” လို့ ကိုင်းကြီးရွာသားတဦးက Border News Agency ကို ပြောပါတယ်။
အဲဒီနွားဆယ်ကောင်ဟာ ရိုဟင်ဂျာအမည်ခံလက်နက်ကိုင်အကြမ်းဖက်သမားတွေကိုရိက္ခာအဖြစ်ရောင်းလိုက်ကြတာလို့ ကျေးရွာသားတချို့ကစွပ်စွဲပြောဆိုကြပေမယ့် နွားပိုင်ရှင်တွေကတော့ အမှန်တကယ်ပျောက်ဆုံးသတ်ဖြတ်ခံလိုက်ရတာသာဖြစ်ပြီး ရိုဟင်ဂျာအမည်ခံလက်နက်ကိုင်အကြမ်းဖက်သမားတွေကိုရိက္ခာအဖြစ်ရောင်းချလိုက်တာမဟုတ်ဘူးလို့ ငြင်းဆိုကြပါတယ်။
အဲဒီအပြင် မောင်တောမြို့နယ်မှကျေးရွာတချို့မှာလည်း ကျွဲတွေ၊ နွားတွေ အုပ်လိုက်ပျောက်ဆုံးတာတွေ မကြာခဏဖြစ်နေကြပေမယ့် ပြန်ရှာတွေ့တာ၊ ပြန်ရတာတွေမရှိဘူးလို့ မောင်တောဒေသခံတွေက ဆိုကြပါတယ်။
အဲဒီမောင်တောမြို့နယ်ရှိ မွတ်ဆလင်ကျေးရွာတွေအပါအဝင် မယူတောင်ထဲမှာ ရိုဟင်ဂျာအမည်ခံလက်နက်ကိုင်အကြမ်းဖက်သမားတွေကို ထောင်နဲ့ချီပြီးဝင်ရောက်နေထိုင်နေကြတယ်လို့ မွတ်ဆလင်ရွာသားတွေက အတည်ပြုပြောကြပါတယ်။
အဲဒီအာရက္ခ-ဘင်္ဂလာနယ်စပ်၊ မောင်တောမြို့နယ်မှာ ဘင်္ဂလားဒေ့ရှ်နိုင်ငံသို့ရောင်းချနေတဲ့ ကျွဲ၊ နွား၊ ဆိတ်စျေးကို အာရက္ခပြည်သူ့တော်လှန်ရေးအစိုးရကတရားဝင်ဖွင့်ထားတယ်လို့ မောင်တောဒေသခံတွေက ဆိုကြပါတယ်။
ဒါပေမယ့် ဘင်္ဂလားဒေ့ရှ်နိုင်ငံသို့ ကျွဲ၊ နွား၊ ဆိတ်တွေ တရားမဝင်တင်ပို့ရောင်းချနေကြသူတွေလည်းဆက်ရှိနေကြပြီးလက်နက်တွေကိုင်ဆောင်ကာအုပ်စုလိုက်ကျွဲ၊ နွား၊ ဆိတ်ခိုးယူနေကြသူတွေလည်းရှိနေကြတုန်းလို့ မောင်တောဒေသခံတွေက ဆိုကြပါတယ်။
