Border News Agency
စစ်ကိုင်း၊ အောက်တိုဘာလ ၅။
စစ်ကိုင်းတိုင်း၊ ရွှေဘိုခရိုင်၊ ရွှေဘိုမြို့နယ်၊ ဇီးကုန်းလေး(ပျူ)ရွာအဝင်ရှိ ဘန်ကာကင်းစခန်းကို တော်လှန်ရေးတပ်တွေတိုက်ခိုက်ခဲ့တာကြောင့် စစ်ကော်မရှင်တပ်ဖွဲ့ဝင်နှစ်ဦးသေဆုံးပြီး နှစ်ဦးဒဏ်ရာရသွားတယ်လို့ စစ်ကိုင်းတိုင်းပြည်သူ့ကာကွယ်ရေးအဖွဲ့မှ အောက်တိုဘာလ ၅ ရက်၊ ဒီနေ့ထုတ်ပြန်ပါတယ်။
အဲဒီစစ်ကော်မရှင်တပ်ရဲ့ ဘန်ကာကင်းစခန်းကို ရွှေဘိုမြို့နယ် ပကဖတိုက်ခိုက်ရေးအဖွဲ့(PDO)မှဦးဆောင်ပြီး တိုက်နယ် ၁၊ ၂ ၊၃၊ ၅ ပကဖတိုက်ခိုက်ရေးအဖွဲ့တွေပူးပေါင်းပြီး အောက်တိုဘာလ ၅ ရက်၊ ဒီနေ့နေ့လည် ၁ နာရီ ၃၀ မိနစ်အချိန်က ပြောက်ကျားစနစ်နဲ့ဝင်ရောက်တိုက်ခိုက်ခဲ့တယ်လို့ ဆိုပါတယ်။
အဲဒီဇီးကုန်းလေး(ပျူ)ကျေးရွာရှိ ဘန်ကာကင်း ၁ ခုကိုသိမ်းပိုက်ကာ မီးရှို့ဖျက်ဆီးနိုင်ခဲ့ပြီး၊ ကာဘိုင်၂ လက်၊ ကိုးလုံး ၁ လက်၊ ၇.၆၂ ကျည် ၁၂၉ တောင့်၊ ကာဘိုင်ကျည် ၃၈တောင့်၊ ကိုးလုံးကျည် ၁၀ တောင့်၊ လက်ပစ်ဗုံး၂ လုံး၊ ကျည်အိမ် ၃ ခုနဲ့ ဖုန်း၁လုံးသိမ်းဆည်းရမိခဲ့တယ်လို့ ဆိုပါတယ်။
အဲဒီတိုက်ပွဲအတွင်း မြိုင်ကျေးရွာဘုန်းကြီးကျောင်းမှာအထိုင်ချတပ်စွဲထားတဲ့ စစ်ကော်မရှင်တပ်တွေကလက်နက်ကြီး၊ လက်နက်ငယ်တွေနဲ့ပစ်ကူပေးလာတာကြောင့် ဖြတ်တောက်ရေးရဲဘော်တွေမှ ၆၀မမနဲ့ ဗုံးသီးတွေပစ်ကူပေးပြီး ပြန်ဆုတ်ခွာခဲ့ရတယ်လို့ ဆိုပါတယ်။
အဲဒီတိုက်ပွဲမှာ တော်လှန်ရေးရဲဘော်တဦး အသက်ပေးခဲ့တယ်လို့ ဆိုပါတယ်။
