Border News Agency
အီရန်၊ဧပြီ ၃။
အီရန်နိုင်ငံ၊ ကရတ်ချ်မြို့နဲ့ တီဟီရန်မြို့ကို ဆက်သွယ်ထားတဲ့ B1 တံတားသစ်ကို အမေရိကန်နဲ့အစ္စရေး ပူးပေါင်းတပ်ဖွဲ့တွေက ဧပြီလ ၃ ရက်၊ ဒီနေ့မှာ ဗုံးကြဲတိုက်ခိုက်လို့လူ ၈ ဦး သေဆုံးပြီး ၉၅ ဦး ပြင်းထန်စွာ ဒဏ်ရာရရှိခဲ့တယ်လို့ အီရန်အစိုးရက ထုတ်ပါတယ်။
အဲဒီ တံတားဟာ ယခုနှစ်အတွင်း ဖွင့်လှစ်ဖို့ ပြင်ဆင်နေတဲ့ အရပ်သားသုံး အခြေခံအဆောက်အအုံတခု ဖြစ်ပြီး အမေရိကန်သမ္မတဒေါ်နယ်ထရန့်ကတော့ အီရန်ရဲ့ အကြီးဆုံးတံတားကြီးပြိုကျသွားပြီ နောက်ထပ်လည်း လာဦးမယ်” ဆိုပြီး တိုက်ခိုက်မှု ရုပ်သံဖိုင်နဲ့အတူလူမှုကွန်ရက်မှာ ထုတ်ဖော်ရေးသားခဲ့တာပါ။
အီရန်နိုင်ငံခြားရေးဝန်ကြီး Abbas Araghchi ကတော့ အခုလို အရပ်သားပစ်မှတ်တွေနဲ့ အချောမသတ်ရသေးတဲ့ တံတားတွေကို တိုက်ခိုက်တာဟာ ရန်သူတွေရဲ့ ကိုယ်ကျင့်တရား ပျက်ပြားမှုနဲ့ စိတ်ဓာတ်ကျဆင်းမှုကို ပြသနေတာဖြစ်ပြီး အီရန်ပြည်သူတွေကို ဒူးထောက်အောင် လုပ်နိုင်မှာမဟုတ်ဘူးလို့ ပြင်းပြင်းထန်ထန် ကန့်ကွက်လိုက်ပါတယ်။
ခုတိုက်ခိုက်မှုကြောင့် ဒဏ်ရာရရှိသူ အများအပြားဟာ စိုးရိမ်ရတဲ့ အခြေအနေမှာ ရှိနေတာကြောင့် သေဆုံးသူအရေအတွက် ထပ်တိုးလာနိုင်ခြေ ရှိနေသလို အီရန်ကျန်းမာရေးဝန်ကြီးဌာနကလည်း ဆေးရုံနဲ့ သုတေသနဌာနတွေပါ တိုက်ခိုက်ခံရမှုအပေါ် နိုင်ငံတကာ ကျန်းမာရေးအဖွဲ့အစည်းတွေအနေနဲ့ ကြားဝင်ဆောင်ရွက်ပေးဖို့ တောင်းဆိုထားပါတယ်။
အီရန်တော်လှန်ရေးအစောင့်တပ် (IRGC) ကလည်း ဒီတိုက်ခိုက်မှုအတွက် လက်တုံ့ပြန်တဲ့အနေနဲ့ ဒေသတွင်းက အမေရိကန်နဲ့ ဆက်စပ်တဲ့ စီးပွားရေးလုပ်ငန်းတွေကို ပစ်မှတ်ထား တိုက်ခိုက်သွားမယ်လို့ သတိပေးထားပါတယ်။
