Border News Agency
ကျောက်တော်၊ စက်တင်ဘာ ၅။
အသက်မပြည့်သေးဘဲ မိမိသဘောထားဆန္ဒအရစစ်မှုထမ်းဖို့လာတဲ့ အသက်ဆယ့်သုံးနှစ်အရွယ်ကျောင်းသားလူငယ်တဦးကို အာရက္ခတပ်တော်(AA)က စက်တင်ဘာ ၄ ရက်နေ့မှာ မိဘတွေဆီ ပြန်လည်အပ်နှံခဲ့ပါတယ်။
အဲဒီကျောက်တော်မြို့နယ်၊လမ်းမတော်ကျေးရွာမှ Grade-7 သင်ယူနေတဲ့ မောင်ဝေယံမင်းဟာ ပြီးခဲ့တဲ့ဩဂုတ်လ ၂၅ ရက်နေ့က အာရက္ခတပ်တော်ဆီသွားရောက်ခဲ့တာဖြစ်ပါတယ်။
စစ်ဆေးမေးမြန်းမှုတွေပြုလုပ်ချိန် မောင်ဝေယံမင်းမှာအသက်မပြည့်သေးတဲ့ ကျောင်းသားတဦးဖြစ်တာကြောင့် မိဘတွေနဲ့ ဆက်သွယ်ကာအသိသက်သေတွေနဲ့အတူ ပြန်လည်လွှဲပြောင်းပေးခဲ့တာ ဖြစ်ပါတယ်။
အဲဒီမြောက်ဦးမြို့နယ်၊ပေါက်တောပြင်ကျေးရွာမှ အသက်ဆယ့်သုံးနှစ်အရွယ် မောင်မင်းခန့်ဟာလည်း ပြီးခဲ့တဲ့ သြဂုတ်လ ၂၂ ရက်နေ့က အာရက္ခတပ်တော်ဆီ စစ်မှုထမ်းဖို့လာရောက်ခဲ့ပါတယ်။
အဲဒီမောင်မင်းခန့်ကိုလည်း စက်တင်ဘာလ ၁ ရက်နေ့က အာရက္ခတပ်တော်က မိသားစုဆီလွှဲပြောင်းပေးခဲ့ပါတယ်။
အာရက္ခတပ်တော်ဟာကလေးသူငယ်တွေ၊ကျန်းမာရေးမကောင်းသူတွေနဲ့ ကျောင်းသားတွေကို စစ်မှုထမ်းဖို့လက်မခံတဲ့အပြင် ကလေးစစ်သားသုံးစွဲမှုကိုပိတ်ပင်ထားပြီး ကုလသမဂ္ဂကလေးသူငယ်အခွင့်အရေးဆိုင်ရာ ပြဋ္ဌာန်းချက်တွေကိုလိုက်နာနေတယ်လို့ဆိုပါတယ်။
ပြီးခဲ့တဲ့ ဩဂုတ်လအတွင်းကလည်း အာရက္ခတပ်တော်ဆီစစ်မှုထမ်းဖို့ရောက်လာတဲ့ မြောက်ဦးနဲ့ ပုဏ္ဏားကျွန်းမြို့နယ်တို့မှ အသက်မပြည့်သေးတဲ့ လူငယ်လေးဦးကိုလည်း မိသားစုတွေဆီပြန်လည်လွှဲပြောင်းပေးခဲ့ပါတယ်။
