Border News Agency

Border News Agency  ခလယ်လွီထူ၊ ဖေဖော်ဝါရီ ၁၈။ ​ကေအဲန်ယူ ခလယ်လွီထူခရိုင်အတွင်းမှာ စစ်ကော်မရှင်တပ်ကလေကြောင်းနဲ့ လက်နက်ကြီးတွေနဲ့ အရပ်သားတွေကို ပစ်မှတ်ထားတိုက်ခိုက်ခဲ့တာကြောင့် တဦးဒဏ်ရာရကာ နေအိမ်နဲ့စာသင်ကျောင်းတွေ ပျက်စီးခဲ့ပါတယ်။ ဆောထိမြို့နယ်အတွင်းကို ​ဖေဖော်ဝါရီ ၉ ရက်နဲ့ ၁၂ ရက်နေ့တွေမှာ စစ်ကော်မရှင်တပ်က စက်တပ်လေထီးတွေနဲ့ ဗုံးကြဲခဲ့တာကြောင့် နေအိမ် ၃ လုံးနဲ့ ပျဥ်ရင်ကျေးရွာက စာသင်ကျောင်းတကျောင်း ပျက်စီးခဲ့ပါတယ်။ ​မူးမြို့နယ်အတွင်းမှာလည်း ဖေဖော်ဝါရီလ ၁၄ ရက်နေ့က စစ်ကော်မရှင်တပ်က လက်နက်ကြီးအလုံး ၂၀ ခန့် ပစ်ခတ်ခဲ့တာကြောင့် အသက် ၅၈ နှစ်အရွယ် ရွာသားတဦးဒဏ်ရာ ရသွားခဲ့ပါတယ်။ ​လယ်ဒိုမြို့နယ်မှာလည်း ဖေဖော်ဝါရီလ ၁၅ ရက်နေ့က ဒရုန်းနဲ့လက်နက်ကြီးတွေသုံးပြီး ရေတွင်းကုန်းကျေးရွာကို ပစ်ခတ်ခဲ့လို့ နေအိမ်နဲ့ဂိုဒေါင်တွေ ပျက်စီးခဲ့ရပါတယ်။ ​ဒါ့အပြင် တောင်ခင်ကျေးရွာနဲ့ ကြိတ်ကွေးကျေးရွာတွေကိုလည်း စက်တပ်လေထီးတွေနဲ့ ထပ်မံဗုံးကြဲခဲ့တာကြောင့် ပြည်သူပိုင်နေအိမ် ၃ လုံး ထပ်မံပျက်စီးခဲ့ရတယ်လို့ သိရပါတယ်။ ​စစ်ကော်မရှင်တပ်ဟာ ခလယ်လွီထူခရိုင်အတွင်းက ကျေးရွာတွေကို ရည်ရွယ်ချက်ရှိရှိ အဆက်မပြတ်တိုက်ခိုက်နေတာကြောင့် ဒေသခံတွေဟာထိတ်လန့်ကြောက်ရွံ့စွာ နေထိုင်နေကြရတယ်လို့ သိရပါတယ်။

Border News Agency  မောင်တော၊​ ဖေဖော်ဝါရီ ၁၈။ ​အာရက္ခတပ်တော် (AA) ထိန်းချုပ်ထားတဲ့ မောင်တောမြို့နယ်မြောက်ပိုင်းမှာ ပျက်စီးနေတဲ့အဝေးပြေးလမ်းမကြီးတွေနဲ့ တံတားတချို့ကို အာရက္ခပြည်သူ့တော်လှန်ရေးအစိုးရရဲ့ စည်ပင်သာယာရေးဌာနက ပြန်လည်ပြုပြင်မွမ်းမံနေပါတယ်။ အဲဒီမောင်တော - ကြိမ်ချောင်း ကားလမ်းပေါ်က ဖားဝပ်ချောင်းရွာနဲ့ အောင်မင်္ဂလာရွာကြားက လမ်းပိုင်းတွေကို ဖေဖော်ဝါရီလဆန်းပိုင်းကစပြီး ကတ္တရာလောင်းအဆင့်မြှင့်တင်နေတာပါ။ အဲဒီလမ်းမကြီးပြုပြင်မှုဟာ ၂၅ ရာခိုင်နှုန်းခန့် ပြီးစီးနေပြီဖြစ်ကာ အဓိကလမ်းမကြီးဖြစ်တာကြောင့် ဒေသခံတွေ သွားလာရေးအဆင်ပြေအောင် အချိန်မီပြီးစီးရေး ဆက်လက်လုပ်ဆောင်နေတယ်လို့ သိရပါတယ်။ ​အဲဒီအပြင် ဘင်္ဂလားဒေ့ရှ်နယ်စပ်အနီးက ဘော်တူလာရွာအထိ ဆက်သွယ်ထားတဲ့ ၄၁ မိုင်ရှည် လမ်းမကြီးပေါ်က ပျက်စီးနေတဲ့ တံတားငယ် ၁၀ ခုထက်မနည်းကိုလည်း ပြုပြင်နေပါတယ်။ ​အထူးသဖြင့် အောင်ချမ်းသာရွာအနီးက ဟောင်းနွမ်းနေတဲ့သစ်သားတံတားကို အခိုင်အမာဖြစ်စေဖို့ သံပြားတွေအစားထိုးပြီး အဆင့်မြှင့်တင်တည်ဆောက်နေပါတယ်။ ​အာရက္ခအစိုးရအနေနဲ့ မောင်တောမြောက်ပိုင်းတင်မကဘဲ ဘူးသီးတောင် - မောင်တော ကားလမ်းမကြီးကိုလည်း ဆက်လက်မွမ်းမံဖို့ပြင်ဆင်နေပြီး ဒေသတွင်းမြို့ရွာတွေစနစ်တကျ ပြန်လည်ဖွံ့ဖြိုးလာအောင် လုပ်ဆောင်နေတာ ဖြစ်ပါတယ်။

Border News Agency ဘင်္ဂလားဒေ့ရှ်၊​ ဖေဖော်ဝါရီ ၁၇။ ​ဘင်္ဂလားဒေ့ရှ်နိုင်ငံရဲ့ ၁၃ ကြိမ်မြောက် အထွေထွေရွေးကောက်ပွဲမှာ အပြတ်အသတ်အနိုင်ရခဲ့တဲ့ BNP ပါတီဥက္ကဌ မစ္စတာတာရစ်ရာမန်ဟာ ဒီနေ့မှာပဲ နိုင်ငံတော်ဝန်ကြီးချုပ်အဖြစ် တရားဝင်ကျမ်းသစ္စာကျိန်ဆိုလိုက်ပါတယ်။ ​ကျမ်းသစ္စာဆိုပွဲအခမ်းအနားကို ဖေဖော်ဝါရီလ ၁၇ ရက်၊ ဒီနေ့မနက်ပိုင်းမှာ ဒါကာမြို့ရှိ လွှတ်တော်အဆောက်အအုံရဲ့ တောင်ဘက်ပလာဇာမှာ ခမ်းခမ်းနားနားကျင်းပခဲ့တာဖြစ်ပါတယ်။ ​အဲဒီအခမ်းအနားမှာ ဝန်ကြီးချုပ်သစ်နဲ့အတူ BNP ပါတီကနေရွေးချယ်ထားတဲ့ ဝန်ကြီးအဖွဲ့ဝင်သစ်တွေကလည်း နိုင်ငံ့တာဝန်တွေကိုထမ်းဆောင်ဖို့အတွက် အသီးသီးကျမ်းသစ္စာ ကျိန်ဆိုခဲ့ကြပါတယ်။

Border News Agency သံတောင်၊​ ဖေဖော်ဝါရီ ၁၇။ ​ကေအဲန်ယူ တောအူးခရိုင်၊ ဒေါ်ဖားခို (သံတောင်) မြို့နယ်ထဲက ကွင်းချောင်းကျေးရွာအတွင်းကို စစ်ကော်မရှင်တပ်ဒရုန်းနဲ့တိုက်ခိုက်ခဲ့တာကြောင့် ပြည်သူတွေရဲ့နေအိမ် ၆ လုံး ထိခိုက်ပျက်စီးခဲ့ရပါတယ်။ ကွင်းချောင်းကျေးရွာအတွင်းကို ဖေဖော်ဝါရီလ ၁၃ ရက်နေ့၊ ညနေ ၂ နာရီအချိန်ခန့်က စစ်ကော်မရှင်တပ် ဒရုန်းဗုံး ၂ လုံးနဲ့တိုက်ခိုက်ခဲ့တာပါ။ ​အဲဒီဗုံးသီးကြောင့် ကျေးရွာအတွင်းရှိနေအိမ်တွေအမိုးနဲ့ နံရံတွေပျက်စီးသွားခဲ့ရသလို အနီးအနားကပြည်သူပိုင်ပစ္စည်းတချို့လည်း ထိခိုက်မှုရှိခဲ့ပါတယ်။ ​အဲဒီတောအူးခရိုင်အတွင်းမှာရှိတဲ့ ကျေးရွာတွေကို စစ်ကော်မရှင်တပ်က ဒရုန်းတွေအပြင်လက်နက်ကြီးတွေနဲ့ပါ မကြာခဏပစ်မှတ်ထားတိုက်ခိုက်နေတယ်လို့ သိရပါတယ်။ ​အဲဒီလို အရပ်သားပြည်သူတွေကို ပစ်မှတ်ထားတိုက်ခိုက်တာတွေကြောင့် ဒေသခံပြည်သူတွေဟာ အသက်ဘေးအတွက် စိုးရိမ်ထိတ်လန့်ပြီး နေထိုင်နေကြရပါတယ်။

Border News Agency ဘန်ကောက်၊​ ဖေဖော်ဝါရီ ၁၇။ ​ဘန်ကောက်မြို့၊ Jom Thong ခရိုင်မှာ အသက် ၅၅ နှစ်အရွယ် အမေရိကန်အမျိုးသားတဦးကိုသတ်ဖြတ်မှုနဲ့ မြန်မာအလုပ်သမား ၄ ဦးကို ထိုင်းရဲတပ်ဖွဲ့က ဖေဖော်ဝါရီလ ၁၆ ရက်နေ့မှာ ဖမ်းဆီးလိုက်ပါတယ်။ အဲဒီဖမ်းဆီးခံရသူတွေကတော့ ကိုဇော်ငြိမ်းဦး၊ ကိုဇော်သက်၊ ကိုဇော်မင်းသူနဲ့ ကိုသီရို တို့ဖြစ်ပြီး သူတို့နဲ့အတူ သက်သေခံဓားတချောင်းနဲ့ သံတုတ်တချောင်းကိုပါ သိမ်းဆည်းရမိခဲ့ပါတယ်။ ​အဲဒီအသတ်ခံရသူ အမေရိကန်နိုင်ငံသား Cole Stein Heath ဟာ ဓားဒဏ်ရာ ၅ ချက်၊ ခြေထောက်ကျိုးဒဏ်ရာတွေနဲ့ အခင်းဖြစ်နေရာမှာတင် သေဆုံးသွားခဲ့တာပါ။ သူတို့အားလုံးဟာ ပလတ်စတစ်စက်ရုံတခုမှာ အတူအလုပ်လုပ်ကြပြီး အလုပ်သမားအဆောင်မှာလည်း အတူနေထိုင်ကြသူတွေဖြစ်တယ်လို့ သိရပါတယ်။ ​အဲဒီသေဆုံးသူ အမေရိကန်အမျိုးသားဟာ ဖမ်းဆီးခံရသူတဦးရဲ့ ညီမဖြစ်သူ မနမ့်ဖိုင်နဲ့ ချစ်သူတွေဖြစ်ခဲ့ကြရာကနေ ပြီးခဲ့တဲ့တလလောက်က လမ်းခွဲဖို့ကြိုးစားရာမှာ အမေရိကန်အမျိုးသားဘက်က လက်မခံဘဲဆက်တိုက်နှောင့်ယှက်နေခဲ့တာကနေ စတင်ခဲ့တာပါ။ ​အခင်းမဖြစ်ခင် ဖေဖော်ဝါရီလ ၁၅ ရက်နေ့ကလည်း အမေရိကန်အမျိုးသားဟာ ဓားတချောင်းကိုင်ပြီး မိန်းကလေးရဲ့အခန်းကိုရောက်လာကာ အထဲမှာရှိနေတဲ့မြန်မာအလုပ်သမားတွေကို ထိုးဖို့ကြိုးစားခဲ့ပါသေးတယ်။ အဲဒီဖြစ်စဉ်ကြောင့် အလုပ်ရှင်ဖြစ်သူက မြန်မာအလုပ်သမားတွေကိုခေါ်ပြီး ရဲစခန်းမှာ အမှုသွားဖွင့်ထားခဲ့တယ်လို့ သိရပါတယ်။ ​ဒါပေမယ့် ဖေဖော်ဝါရီလ ၁၆ ရက်မှာတော့ အမေရိကန်အမျိုးသားဟာ စက်ရုံကိုဓားကိုင်ပြီး ထပ်ရောက်လာပြန်တာကြောင့် မြန်မာအမျိုးသား ၄ ဦးနဲ့ ဝိုင်းဝန်းတိုက်ခိုက်မှု ဖြစ်ပွားခဲ့တာပါ။ မြန်မာအလုပ်သမားတွေဘက်ကတော့ ဒါဟာကိုယ့်ကိုယ်ကိုယ်ကာကွယ်ရင်း ဖြစ်သွားတာဖြစ်ပြီး သေစေလိုတဲ့ရည်ရွယ်ချက်မရှိဘူးလို့ ထွက်ဆိုထားပါတယ်။ ​လက်ရှိမှာတော့ ရဲတပ်ဖွဲ့ကစုံစမ်းစစ်ဆေးမှုတွေ ဆက်လုပ်နေပြီး ဖမ်းဆီးခံထားရတဲ့ မြန်မာအလုပ်သမား ၄ ဦးကို ဘယ်လိုပုဒ်မတွေနဲ့ အရေးယူမလဲဆိုတာကိုတော့ အပြီးသတ်ဆုံးဖြတ်တာ မရှိသေးဘူးလို့ သိရပါတယ်။

Border News Agency ထိုင်း၊​ ဖေဖော်ဝါရီ ၁၇။ ​ထိုင်းနိုင်ငံ၊ စမွတ်ပရာကန်ပြည်နယ်က အလုပ်သမားတန်းလျားတခုမှာ မြန်မာအလုပ်သမားတဦးက သူ့ရဲ့လုပ်ဖော်ကိုင်ဖက်ကို ဓာတ်ဆီလောင်းမီးရှို့ပြီး သံတုတ်နဲ့ရိုက်သတ်ခဲ့တဲ့လူသတ်မှုတခု ဖေဖော်ဝါရီလ ၁၇ ရက်၊ ဒီနေ့မနက်ကဖြစ်ပွားခဲ့တယ်လို့ ထိုင်းသတင်းရင်းမြစ်တွေကသိရပါတယ်။ အဲဒီ ဓာတ်ဆီလောင်းမီးရှို့ပြီး သံတုတ်နဲ့ရိုက်သတ်ခဲ့တဲ့လူသတ်တရားခံဟာ အသက် ၂၂ နှစ်အရွယ်ဝင်းနေစိုး ဆိုသူဖြစ်ပြီး သေဆုံးသူကတော့ အသက် ၂၇ နှစ်အရွယ် ကိုထွန်းခိုင်တို့​ဖြစ်ကြပါတယ်။ အဲဒီပြစ်မှုကျူးလွန်သူရဲ့ ထွက်ဆိုချက်အရ သေဆုံးသူကိုထွန်းခိုင်ဟာ အရက်မူးပြီးအခန်းပြန်လာချိန်မှာ ဆူညံစွာအော်ဟစ်တာတွေ လုပ်ခဲ့တယ်လို့ သိရပါတယ်။ အဲဒီလို အော်ဟစ်ရုံတင်မကဘဲ အခန်းရဲ့သွပ်နံရံကိုပါ ကန်ခဲ့တာကြောင့် ကျူးလွန်သူကသူအိပ်မရဖြစ်ပြီး သွားရောက်သတိပေးရာကနေ စကားအချေအတင်ဖြစ်ပြီး ရန်ပွဲအကြီးအကျယ် ဖြစ်ခဲ့ကြတယ်လို့သိရပါတယ်။ ​အဲဒီလို ရန်ဖြစ်ပြီးနောက်မှာတော့ ဝင်းနေစိုးဟာ ဓာတ်ဆီပုံးကိုယူလာပြီး အခန်းထဲမှာရှိနေတဲ့ ကိုထွန်းခိုင်ကို ဓာတ်ဆီလောင်းကာ မီးရှို့ခဲ့တာဖြစ်ပါတယ်။ ကိုထွန်းခိုင်ဟာ မီးလောင်နေတဲ့ဒဏ်ရာတွေနဲ့ အခန်းပြင်ကိုထွက်ပြေးဖို့ ကြိုးစားခဲ့ပေမယ့် ဝင်းနေစိုးက နောက်ကနေ လိုက်သွားပြီး သံတုတ်နဲ့ခေါင်းကို အကြိမ်ကြိမ်ရိုက်နှက်ခဲ့တာပါ။ ​အဲဒီလို အကြိမ်ကြိမ် အရိုက်ခံရတာကြောင့် ကိုထွန်းခိုင်ဟာ နေရာမှာတင်ပွဲချင်းပြီး သေဆုံးသွားခဲ့ရပြီး ကျူးလွန်သူ ဝင်းနေစိုးကတော့ ထွက်ပြေးတိမ်းရှောင်တာမျိုးမလုပ်ဘဲ အလုပ်သမားတန်းလျားမှာပဲ ရဲတွေကိုအဖမ်းခံဖို့ စောင့်ဆိုင်းနေခဲ့တယ်လို့သိရပါတယ်။ ​အဲဒီတရားခံကို လက်ရှိမှာတော့ ထိုင်းရဲတပ်ဖွဲ့ကတမင်ရည်ရွယ် လူသတ်မှုနဲ့အမှုဖွင့်ထားပြီး ဥပဒေနဲ့အညီ ဆက်လက်အရေးယူသွားဖို့ ဆောင်ရွက်နေပြီတယ်လို့သိရပါတယ်။

Border News Agency  ဘင်္ဂလားဒေ့ရှ်၊​ ဖေဖော်ဝါရီ ၁၇။ ​ဘင်္ဂလားဒေ့ရှ်နိုင်ငံမှာ အထွေထွေရွေးကောက်ပွဲအနိုင်ရထားတဲ့ ဘင်္ဂလားဒေ့ရှ်အမျိုးသားပါတီ BNP ကို ငြိမ်းချမ်းရေးနိုဘယ်ဆုရှင် ပါမောက္ခယူနွတ်စ်ဦးဆောင်တဲ့ ယာယီအစိုးရအဖွဲ့ကနေ နိုင်ငံ့အာဏာကို တရားဝင်လွှဲပြောင်းပေးလိုက်ပြီ ဖြစ်ပါတယ်။ ယာယီအစိုးရအကြီးအကဲ ယူနွတ်စ်ဟာ မနေ့က ဖေဖော်ဝါရီလ ၁၆ ရက်မှာ ရာထူးကနေနှုတ်ထွက်သွားခဲ့ပြီး အာဏာရလာမယ့် BNP ပါတီနဲ့ လွှတ်တော်အမတ်တွေကို တရားမျှတပြီးဒီမိုကရေစီဆန်တဲ့ နိုင်ငံသစ်တခု တည်ဆောက်ကြဖို့လည်း မှာကြားခဲ့ပါတယ်။ ​ဖေဖော်ဝါရီလ ၁၇ ရက်၊ ဒီနေ့မနက်ပိုင်းမှာတော့ ရွေးကောက်ခံလွှတ်တော်အမတ်တွေရဲ့ ကျမ်းသစ္စာကျိန်ဆိုပွဲကို လွှတ်တော်အဆောက်အအုံရဲ့ တောင်ဘက်ပလာဇာမှာ ပြုလုပ်ခဲ့ကြပြီး ဒါဟာ ၂၀၂၄ ခုနှစ် ကျောင်းသားလူထုအုံကြွမှုအတွင်း သေဆုံးခဲ့သူတွေကိုဂုဏ်ပြုတဲ့အနေနဲ့ အခုလိုနေရာပြောင်းလဲ ကျင်းပခဲ့တာဖြစ်ပါတယ်။ ​အခုအကြိမ် ၁၃ ကြိမ်မြောက် ရွေးကောက်ပွဲမှာတော့ လွှတ်တော်အမတ် ၂၉၇ ဦး ရွေးကောက်ခံခဲ့ရပြီး အဲဒီအထဲက ၂၀၉ ဦးဟာ BNP ပါတီကဖြစ်တာကြောင့် အစိုးရဖွဲ့စည်းခွင့်ကို ရရှိမှာဖြစ်သလိုပါတီဥက္ကဌ တာရစ်ရာမန်ကိုလည်း ဝန်ကြီးချုပ်အဖြစ် ခန့်အပ်သွားမှာ ဖြစ်ပါတယ်။ ​ကျမ်းသစ္စာကျိန်ဆိုပွဲမှာ တာရစ်ရာမန်အပါအဝင် အမတ်အားလုံးကျိန်ဆိုပြီးသွားရင်တော့ လွှတ်တော်ဥက္ကဌကို ရွေးချယ်ပြီးလွှတ်တော်ကို တရားဝင်ဖွဲ့စည်းမှာဖြစ်သလို ဝန်ကြီးချုပ်သစ်ခန့်အပ်ရေးအတွက် သမ္မတဆီကိုဆက်လက်တင်ပြသွားမှာ ဖြစ်ပါတယ်။ ​နိုင်ငံတော်အကြီးအကဲဖြစ်တဲ့ သမ္မတကနေ ဝန်ကြီးချုပ်သစ်နဲ့ ဝန်ကြီးအဖွဲ့ဝင်တွေကို ခန့်အပ်ပြီးရင်တော့ ကျမ်းသစ္စာကျိန်ဆိုပွဲတွေဆက်လုပ်ပြီး ဘင်္ဂလားဒေ့ရှ်အစိုးရသစ်ဟာ နိုင်ငံ့တာဝန်တွေကို တရားဝင်စတင်ထမ်းဆောင်သွားတော့မှာ ဖြစ်ပါတယ်။