Border News Agency

Border News Agency  ​ဒါကာ၊ ဖေဖော်ဝါရီ ၂၂ ။ ​ဘင်္ဂလားဒေ့ရှ်နိုင်ငံရဲ့ ယာယီအစိုးရအဖွဲ့ကို ၁၈ လကြာ တာဝန်ယူဦးဆောင်ခဲ့တဲ့ နိုဗယ်ငြိမ်းချမ်းရေးဆုရှင် ပရော်ဖက်ဆာ မူဟာမတ်ဒ်ယူနွတ်စ်ဟာ ဒီကနေ့မှာတော့ သူ့ရဲ့ မူလတာဝန်တွေကို ပြန်လည်ထမ်းဆောင်ဖို့ Yunus Centre ကို ပြန်လည်ရောက်ရှိလာပါတယ်။ ​ဒီကနေ့မနက်ပိုင်းက ဒါကာမြို့ရှိ Telecom Bhaban ကို ရောက်ရှိလာတဲ့ ပရော်ဖက်ဆာယူနွတ်စ်ကို လုပ်ဖော်ကိုင်ဖက်တွေက နွေးထွေးစွာကြိုဆိုခဲ့ကြပါတယ်။  အဲဒီနောက်မှာတော့ သူဟာ Grameen အဖွဲ့အစည်းတွေက တာဝန်ရှိသူတွေနဲ့တွေ့ဆုံကာ လုပ်ငန်းဆိုင်ရာ အစည်းအဝေးတွေကို ချက်ချင်းပြုလုပ်ခဲ့ပါတယ်။ ၂၀၀၆ ခုနှစ် နိုဗယ်ငြိမ်းချမ်းရေးဆုရှင် ယူနွတ်စ်ဟာ အခုလကုန်ပိုင်းမှာတော့ သူ့ရဲ့မူလနေအိမ်ကိုပါ ပြန်လည်ပြောင်းရွှေ့နေထိုင်သွားဖို့ ရှိနေပါတယ်။ ​ပရော်ဖက်ဆာယူနွတ်စ် ပြန်လည်ထမ်းဆောင်မယ့် မူလတာဝန်တွေကတော့ သူကိုယ်တိုင်တည်ထောင်ထားတဲ့ Yunus Centre ရဲ့ ဥက္ကဋ္ဌတာဝန်၊ Grameen အဖွဲ့အစည်းတွေရဲ့ အကြံပေးနဲ့ ဦးဆောင်သူတာဝန်တွေ ဖြစ်ပါတယ်။ အဓိကအားဖြင့် ဆင်းရဲနွမ်းပါးမှုတိုက်ဖျက်ရေး၊ အသေးစားငွေရေးကြေးရေးလုပ်ငန်းတွေနဲ့ အမြတ်ထက်လူမှုအကျိုးပြုကို ရှေ့တန်းတင်တဲ့ လူမှုစီးပွားရေး (Social Business) လုပ်ငန်းတွေကို ပြန်လည်ဦးဆောင်သွားမှာ ဖြစ်တယ်လို့ ဆိုပါတယ်။

Border News Agency ​နခွန်စီသမာရတ်၊ ဖေဖော်ဝါရီ ၂၂။ ​ထိုင်းနိုင်ငံ၊ နခွန်စီသမာရတ်ခရိုင်အတွင်းမှာ ဖေဖော်ဝါရီလ ၂၂ ရက်၊ ဒီနေ့နေ့လည်က ဘက်ဟိုးတင်ဆောင်လာတဲ့ ခြောက်ဘီးကားတစီး ဘရိတ်ပေါက်ပြီး တောင်စောင်းကနေထိုးကျတိမ်းမှောက်လို့ အရပ်သားနှစ်ဦးဒဏ်ရာရသွားခဲ့ပါတယ်။ ​အဲဒီအချိန်မှာ ခရီးစဉ်တခုကနေပြန်လာတဲ့ အမှတ် ၄၃ စစ်နယ်မြေက စစ်တပ်သင်တန်းဆရာ ၁၁ ဦးဟာ အခင်းဖြစ်နေရာကို တွေ့ရှိခဲ့တာကြောင့် ဝင်ရောက်ကူညီခဲ့တယ်လို့ ထိုင်းဘုရင့်တပ်မတော် ထုတ်ပြန်ပါတယ်။  အဲဒီ ကားအတွင်းမှာ လူ ၂ ဦးညပ်မိပြီး ဒဏ်ရာပြင်းထန်နေတာကြောင့် စစ်တပ်တပ်ဖွဲ့ဝင်တွေက ရှေးဦးသူနာပြုစုတာတွေ လုပ်ဆောင်ပေးခဲ့သလို ကယ်ဆယ်ရေးအဖွဲ့တွေနဲ့ညှိနှိုင်းပြီး ကားအတွင်းကနေအချိန်မီ ထုတ်ယူနိုင်ခဲ့တယ်လို့ဆိုပါတယ်။ ​အဲဒီ ဒဏ်ရာရရှိသူတွေကို လိုအပ်တဲ့ဆေးကုသမှုတွေ ဆက်လက်လုပ်ဆောင်နိုင်ဖို့ လူနာတင်ကားနဲ့ ဆေးရုံကိုပို့ဆောင်ပေးထားတယ်လို့ ဆိုပါတယ်။

Border News Agency  မုံရွာ၊ ဖေဖော်ဝါရီ ၂၂။ စစ်ကိုင်းတိုင်း၊ မုံရွာမြို့နယ်မှာ ခရီးသည်တင်ယာဉ်တစီးလမ်းမှားဝင်မိရာမှ စစ်ကော်မရှင်တပ်က တားဆီးစစ်ဆေးတာမရှိဘဲ ပစ်ခတ်ခဲ့တယ်လို့ မုံရွာမြို့နယ်သတင်းမှန်ပြန်ကြားရေးက ဖေဖော်ဝါရီလ ၂၂ ရက်၊ ဒီနေ့ထုတ်ပြန်ပါတယ်။ အဲဒီလိုပစ်ခတ်ခဲ့တာကြောင့် ဆားလင်းကြီးရွာသား ယာဉ်မောင်းအမျိုးသားတဦး သေဆုံးသွားခဲ့တယ်လို့ ဆိုပါတယ်။ အဲဒီခရီးသည် ၄ ဦးနဲ့ ယာဉ်မောင်းအကူ ၆ ဦး လိုက်ပါလာတဲ့ ရွှေပီနောင်းယာဉ်ငယ်ကားအသင်းက ကားတစီးဟာ သမုန်းကုန်းလမ်းခွဲမှ ပေါက်ငယ်တောအတက်မှာလမ်းမှားကွေ့မိပြီး သာစည်ထောင်ရှေ့ကိုရောက်သွားချိန် စစ်ကော်မရှင်တပ်ကပစ်ခတ်ခဲ့တာလို့ ဆိုပါတယ်။ အဲဒီအပြင် စစ်ကော်မရှင်တပ်ဟာ ခရီးသည်တင်ကားမှန်းသိရှိချိန်မှာလည်း ကားမှန်တွေကို သေနတ်ဒင်တွေနဲ့ ဝိုင်းဝန်းထုရိုက်ခဲ့တယ်လို့ ဆိုပါတယ်။ အဲဒါကြောင့် ပုံမှန်သွားနေကြရွာခံတွေတောင် လမ်းမှားတတ်လို့ ခရီးသွားပြည်သူတွေအနေနဲ့ လမ်းချိုးလမ်းကွေ့တွေကို သတိထားသွားလာကြဖို့ ဒေသခံတဦးက တိုက်တွန်းပြောဆိုထားပါတယ်။

Border News Agency  ထိုင်း၊ ဖေဖော်ဝါရီ ၂၂။ ​ထိုင်းနိုင်ငံ၊ လွေးခရိုင်၊ ပါ့ချွန်းမြို့နယ်အတွင်းမှာ ဖေဖော်ဝါရီ ၂၂ ရက်၊ ဒီနေ့မနက်က အိုက်စ် (Ice) မူးယစ်ဆေးဝါးတွေလက်ဝယ်ထားရှိတဲ့အမျိုးသားတဦးကို အထူးအဖွဲ့စုံက ဝင်ရောက်ဖမ်းဆီးခဲ့ပါတယ်။ ​နယ်မြေခံခြေလျင်တပ်ရင်း၊ ရဲတပ်ဖွဲ့နဲ့ နယ်ခြားစောင့်ရဲတပ်ဖွဲ့ဝင်တွေပါဝင်တဲ့ ပူးပေါင်းအဖွဲ့ဟာ ဟွေပိချိုင်ကျေးရွာရှိ ပစ်မှတ်ထားတဲ့ နေအိမ်တလုံးကို ဝင်ရောက်ရှာဖွေခဲ့တာပါ။ အဲဒီအိမ်ရဲ့ တဲအိမ်လေးထဲမှာရှိနေတဲ့ ကူနာကွန်ဆိုသူကိုစစ်ဆေးရာမှာ သူလွယ်ထားတဲ့ အညိုရောင်လွယ်အိတ်ထဲကနေ အိုက်စ် မူးယစ်ဆေးဝါး ၁၂ ထုပ်ကို ရှာဖွေတွေ့ရှိခဲ့တာ ဖြစ်ပါတယ်။ ​အဲဒီအမျိုးသားက ဒီမူးယစ်ဆေးတွေဟာ သူ့ပစ္စည်းဖြစ်ကြောင်းဝန်ခံထားလို့ ရဲတပ်ဖွဲ့က သူ့ကို မူးယစ်ဆေးဝါးတွေနဲ့အတူသိမ်းဆည်းပြီး ဥပဒေအရ အရေးယူနိုင်ဖို့ ပါ့ချွန်းမြို့နယ် ရဲစခန်းကိုပို့ဆောင်လိုက်ပြီလို့ သိရပါတယ်။

Border News Agency ခလယ်လွီထူ၊​ ဖေဖော်ဝါရီ ၂၁။ ​ခလယ်လွီထူခရိုင်ထဲက ကျေးရွာတွေကို စစ်ကော်မရှင်တပ် ဒရုန်းတွေ၊ ပါရာမော်တာတွေနဲ့ ရည်ရွယ်ချက်ရှိရှိတိုက်ခိုက်လို့ စာသင်ကျောင်းတကျောင်းနဲ့ နေအိမ်ခုနှစ်လုံးပျက်စီးပြီးအရပ်သားတဦး ဒဏ်ရာရသွားခဲ့ပါတယ်။ လယ်ဒိုနဲ့ ဆောထိမြို့နယ်ထဲက ကျောင်းကုန်း၊ ရေတွင်းကုန်းနဲ့ ချုံအင်းကျေးရွာတွေကို ဖေဖော်ဝါရီလ ၁၈ ရက်ကနေ ၂၀ ရက်အထိ စစ်ကော်မရှင်တပ်လေကြောင်းတိုက်ခိုက်ခဲ့တယ်လို့ ကရင်အမျိုးသားအစည်းအရုံးမှ ဖေဖော်ဝါရီလ ၂၁ ရက်၊ ဒီနေ့ထုတ်ပြန်ပါတယ်။  အဲဒီလိုတိုက်ခိုက်ခဲ့တာကြောင့် အသက် ၄၅ အရွယ် စောမောင်ဖိုးအေး ဒဏ်ရာရခဲ့သလို နေအိမ်တွေနဲ့အတူ ဆိုင်ကယ်ပြင်ဆိုင်တဆိုင်လည်း ပျက်စီးသွားခဲ့တယ်လို့ဆိုပါတယ်။ စစ်ကော်မရှင်တပ်ဟာ ခလယ်လွီထူခရိုင်ထဲကို လက်နက်ကြီးတွေနဲ့ပစ်တာ၊ လေကြောင်းတိုက်ခိုက်တာတွေကို အဆက်မပြတ်လုပ်နေတာကြောင့် ဒေသခံတွေဟာ အသက်ဘေးကိုစိုးရိမ်ထိတ်လန့်ပြီး နေထိုင်နေကြရတယ်လို့ ဆိုပါတယ်။

Border News Agency  ​မဲဆောက်၊ ဖေဖော်ဝါရီ ၂၁ ။ ​ထိုင်း - ကမ္ဘောဒီးယားနယ်စပ်၊ တာကျည်ဆာ့ (Prasat Ta Muen Thom) ရဲတိုက်အနီးမှာ ဖြစ်ပွားခဲ့တဲ့ တောမီးလောင်ကျွမ်းမှုအတွင်း ကမ္ဘောဒီးယားစစ်သားတဦး သေဆုံးခဲ့ရတဲ့ဖြစ်စဉ်နဲ့ပတ်သက်ပြီး နှစ်ဖက်စွပ်စွဲချက်တွေ ထွက်ပေါ်နေပါတယ်။ အဲဒီ သေဆုံးသူဟာ ကမ္ဘောဒီးယားစစ်သား "ရီယမ် ခိန်" ဖြစ်ပြီး ဖေဖော်ဝါရီလ ၂၀ ရက်နေ့က တောမီးအတွင်းပိတ်မိကာ သေဆုံးခဲ့တာလို့ စစ်ဘက်သတင်းတွေအရ သိရပါတယ်။ အဲ​ဒီဖြစ်စဉ်နဲ့ပတ်သက်ပြီး ထိုင်းဘက်ကတော့ စစ်သားဟာရှေ့တန်းတပ်ဖွဲ့တွေကို နှောင့်ယှက်ဖို့မီးရှို့ရာကနေ လေပြန်တိုက်လို့ မီးဝိုင်းမိတာလို့ ဆိုပါတယ်။ ကမ္ဘောဒီးယားဘက်က လုပ်ဖော်ကိုင်ဖက်တွေကတော့ ထိုင်းဘက်ကမီးစတင်ရှို့ခဲ့တာဖြစ်ပြီး တောမီးငြှိမ်းသတ်ရင်း သေဆုံးခဲ့ရတာလို့ တန်ပြန်စွပ်စွဲထားပါတယ်။ အခုလို အမြင်မတူညီမှုတွေရှိနေပေမယ့် လက်ရှိမှာတော့ကျန်ရစ်သူမိသားစုအတွက် ကမ္ဘောဒီးယားစစ်သားတွေက အလှူငွေတွေဝိုင်းဝန်းကောက်ခံပေးနေ ကြပါတယ်။ အဲဒီ​နယ်စပ်တင်းမာမှုနဲ့ စွပ်စွဲချက်တွေရှိနေပေမယ့် သေဆုံးသူရဲ့ မိသားစုဝင်တွေအတွက် စာနာနားလည်တဲ့အနေနဲ့ လုပ်ဖော်ကိုင်ဖက်တွေက လူမှုကွန်ရက်ကတဆင့် ရန်ပုံငွေတွေစုဆောင်းပေးနေတာပါ။ အလှူငွေထည့်ဝင်လိုသူတွေအနေနဲ့ လုပ်ဖော်ကိုင်ဖက်ဖြစ်သူရဲ့ QR Code ကတဆင့်ဖြစ်စေ ဖုန်းနံပါတ် ၀၈၈ -၂၄၇၉၆၈၇ သို့ တိုက်ရိုက်ဆက်သွယ်ပြီးဖြစ်စေ လှူဒါန်းနိုင်တယ်လို့ ဖော်ပြထားပါတယ်။ ​နယ်စပ်ဒေသမှာ အခုလိုစိတ်မကောင်းစရာ ဖြစ်ရပ်တွေထပ်မံမဖြစ်ပွားစေဖို့နဲ့ နှစ်နိုင်ငံကြားအပြန်အလှန် နားလည်မှုတွေ တိုးတက်လာဖို့ကိုလည်း ပြည်သူတွေက မျှော်လင့်နေကြပါတယ်။ အဲဒီ တောမီးလောင်ကျွမ်းမှုနဲ့ သေဆုံးရတဲ့ဖြစ်စဉ်အပေါ် နှစ်ဖက်တာဝန်ရှိသူတွေအကြား စုံစမ်းစစ်ဆေးမှုတွေ ရှိလာနိုင်မလားဆိုတာကို စောင့်ကြည့်ရမှာ ဖြစ်ပါတယ်။