Border News Agency
ဒါကာ၊ ဇန်နဝါရီ ၂၄။
အပြည်ပြည်ဆိုင်ရာတရားရုံး (ICJ) မှာ မြန်မာနိုင်ငံကရိုဟင်ဂျာတွေကို “ဘင်္ဂါလီ” လို့ခေါ်ဆိုပြီး တရားမဝင်ရွှေ့ပြောင်းနေထိုင်သူတွေအဖြစ် ပုံဖော်တင်ပြမှုကို ဘင်္ဂလားဒေ့ရှ်အစိုးရက ပြင်းပြင်းထန်ထန်ကန့်ကွက်လိုက်ပါတယ်။
အဲဒီရိုဟင်ဂျာတွေဟာ ၁၇၈၅ ခုနှစ် မြန်မာမင်းတွေလက်အောက်မကျရောက်ခင်ကတည်းက ရခိုင်ဒေသမှာရာစုနှစ်ချီ အခြေချနေထိုင်ခဲ့တဲ့ သီးခြားလူမျိုးစုတွေဖြစ်ပြီး ကိုလိုနီခေတ်မှတ်တမ်းတွေနဲ့ လွတ်လပ်ရေးအကြိုကာလ သန်းခေါင်စာရင်းတွေမှာလည်း ခိုင်ခိုင်မာမာရှိနေတယ်လို့ ဘင်္ဂလားဒေ့ရှ်က ထောက်ပြပါတယ်။
အဲဒီအပြင် ၁၉၈၂ နိုင်ငံသားဥပဒေမတိုင်ခင်အထိ ရိုဟင်ဂျာတွေဟာ မြန်မာ့လူ့အဖွဲ့အစည်းရဲ့ အစိတ်အပိုင်းဖြစ်ခဲ့ပြီး ၂၀၁၅ ရွေးကောက်ပွဲအထိ မဲပေးခွင့်ရခဲ့ကြတယ်လို့ ဆိုပါတယ်။
အဲဒီလို “ဘင်္ဂါလီ” လို့ အတင်းအကျပ်အမည်တပ်တာဟာ သူတို့ရဲ့မွေးရာပါအမှတ်အသားကိုငြင်းပယ်ဖို့နဲ့ ၂၀၁၆၊၂၀၁၇ ခုနှစ်အတွင်း ကျူးလွန်ခဲ့တဲ့လူမျိုးရေးသန့်စင်မှုတွေကို တရားမျှတအောင်ကြိုးပမ်းတာသာဖြစ်တယ်လို့ ဆိုပါတယ်။
အဲဒီအပြင် ၁၉၇၁ ခုနှစ် ဘင်္ဂလားဒေ့ရှ် လွတ်မြောက်ရေးစစ်ပွဲအတွင်း ဘင်္ဂလားဒေ့ရှ်လူမျိုးငါးသိန်းခန့် ရခိုင်ပြည်ထဲခိုလှုံခဲ့တယ်ဆိုတဲ့ မြန်မာဘက်ကပြောကြားချက်ဟာလည်း အခြေအမြစ်မရှိဘဲ လူဦးရေဆိုင်ရာမှတ်တမ်းတွေနဲ့ မကိုက်ညီဘူးလို့ကန့်ကွက်ထားပါတယ်။
မြန်မာနိုင်ငံအနေနဲ့ ရိုဟင်ဂျာတွေကို လူ့အဖွဲ့အစည်းရဲ့မရှိမဖြစ် အစိတ်အပိုင်းအဖြစ်အသိအမှတ်ပြုဖို့၊ ရခိုင်ပြည်မှာဘေးကင်းလုံခြုံတဲ့ ပတ်ဝန်းကျင်ဖန်တီးပြီး ဂုဏ်သိက္ခာရှိရှိပြန်လည်လက်ခံဖို့နဲ့ တန်းတူအခွင့်အရေးပေးဖို့ ဘင်္ဂလားဒေ့ရှ်အစိုးရကတောင်းဆိုလိုက်ပါတယ်။
