Border News Agency
စစ်ကိုင်း၊ စက်တင်ဘာ ၁၉ ။
စစ်ကိုင်းတိုင်း၊ ကနီမြို့နယ်၊ ချောင်းမရွာတိုက်ပွဲမှာ စစ်ကော်မရှင်တပ်ဖွဲ့ဝင်သုံးဦးအရှင်ဖမ်းဆီးရမိခဲ့တယ်လို့ ယင်းမာပင်မြို့နယ်ပကဖ ULF စစ်ကြောင်းမှ စက်တင်ဘာလ ၁၈ ရက်၊ မနေ့ကထုတ်ပြန်ပါတယ်။
အဲဒီကနီမြို့နယ်၊ချောင်းမရွာတိုက်ပွဲမှာစက်တင်ဘာလ ၁၃ ရက်နေ့ကစစ်ကြောင်းပျက်ပြီးထွက်ပြေးလာတဲ့ ဒုတပ်ကြပ်တဦးနဲ့ စစ်မှုထမ်းတပ်သားသစ်နှစ်ဦးကို လက်နက်သုံးလက်နဲ့အတူ ဖမ်းဆီးရမိခဲ့တာလို့ဆိုပါတယ်။
အဲဒီစစ်ကော်မရှင်တပ်သားတွေဟာ တပ်ပျက်ပြီးထွက်ပြေးလာတာကြောင့် ယင်းမာပင်မြို့နယ်ပကဖ ULF စစ်ကြောင်းကြားဖြတ်တိုက်ခိုက်ခဲ့တယ်လို့ ဆိုပါတယ်။
အဲဒီတိုက်ပွဲမှာ ဒုတပ်ကြပ်တဦးနဲ့စစ်မှုထမ်းတပ်သားသစ်နှစ်ဦးကို အရှင် ဖမ်းမိခဲ့ပြီး MA-1 သေနတ်နှစ်လက်၊ MA -2 သေနတ်တလက်၊ 5.56 ကျည်နှစ်ရာတောင့်၊ ဖုန်းလေးလုံး သိမ်းဆည်းရရှိခဲ့တယ်လို့ဆိုပါတယ်။
အဲဒီချောင်းမရွာမှာ စက်တင်ဘာလ ၁၁ ရက်နေ့က စစ်ကော်မရှင်ရဲ့ တပ်မ ၃၃ လက်အောက်ခံ ခမရ ၁၆ က ဗိုလ်မှူးသူရိန် ဦးဆောင်တဲ့အင်အားတရာခန့်ပါစစ်ကြောင်းကို တော်လှန်ရေးပူးပေါင်းတပ်တွေ ဝင်ရောက်တိုက်ခိုက်ခဲ့တယ်လို့ဆိုပါတယ်။
အဲဒီမှာစစ်ကော်မရှင်တပ်သားသုံးဦးသေဆုံးပြီး စစ်သုံ့ပန်းလေးဦးအရှင်ဖမ်းမိကာ လက်နက်ခုနှစ်လက်သိမ်းဆည်းရရှိခဲ့တယ်လို့ဆိုပါတယ်။
