Border News Agency
သံတွဲ၊ စက်တင်ဘာ ၂၇။
အာရက္ခတပ်တော်(AA)ထိန်းချုပ်ထားတဲ့သံတွဲမြို့ကို စစ်ကော်မရှင်တပ်လေကြောင်းတိုက်ခိုက်လို့ တဦးသေဆုံးပြီးငါးဦးဒဏ်ရာရရှိသွားတယ်လို့ဆိုပါတယ်။
အဲဒီသံတွဲမြို့၊ အမှတ် ၄ ရပ်ကွက်က အသက်သုံးဆယ်ကျော်အရွယ်ဦးညီညီဖြစ်ပြီးအသက်ခြောက်နှစ်အရွယ်မောင်သန့်ဇင်ဖြိုး၊ အသက်ဆယ့်လေးနှစ်အ ရွယ်မောင်အောင်သီဟစိုး၊အသက်သုံးဆယ်ခုနှစ်နှစ်အရွယ်ဒေါ်ခင်ခင်ဌေး၊ အသက်ငါးဆယ်သုံးနှစ်အရွယ်ဒေါ်ခင်ထွေးနဲ့ အသက်လေးဆယ်နှစ်နှစ်အရွယ် ဦးထွန်းနိုင်မင်း ဒဏ်ရာရသွားကြပါတယ်။
စစ်ကော်မရှင်တပ်က စက်တင်ဘာလ ၂၇ရက်၊ဒီနေ့ ညနေရှစ်နာရီခွဲအချိန်ခန့်က သံတွဲမြို့၊အမှတ်၄ ရက်ကွက်၊ ညောင်ပင်ဈေးရပ်ကွက်ကို တိုက်လေယာဥ်တစီးနဲ့ ပေါင်ငါးရာဗုံးနှစ်လုံးကြဲချတို က်ခိုက်ခဲ့တာပါ။
အဲဒီလိုဗုံးကြဲမှုကြောင့် အမှတ် ၄ ရပ် ကွက်က ဦးမြဟန်အိမ်မှာတလုံး၊အမှတ်၄၊ ညောင်ပင်ဈေးရပ်ကွက်ထဲကဦးမှဲ့လေးအိမ်မှာတလုံးကျရောက်ပေါက်ကွဲခဲ့တာလို့ ဆိုပါတယ်။
“ဦးညီညီက နေရာမှာတင်ပွဲချင်းပြီးဆုံးတာ။ကျန်တဲ့သူတွေကတော့ သူ့မိသား စုဝင်တွေပါ။ဒဏ်ရာပြင်းထန်ရသွားကြတယ်။” လို့ သံတွဲမြို့ခံတဦးက Border News Agency ကိုပြောပါတယ်။
အဲဒီဒဏ်ရာရရှိသွားသူတွေကို ဆေးကုသမှုခံယူဖို့ ဆေးရုံကို အရေးပေါ်ပို့ဆောင်နေကြရတယ်လို့လည်း ဆိုပါတယ်။
စစ်ကော်မရှင်တပ်က စက်တင်ဘာလ ၂၆ရက်၊ မနေ့က ညနေ ၃နာရီကျော်အ ချိန်ကလည်း တောင်ကုတ်မြို့၊ကံပိုင်ရပ်ကွက်ရှိ တပ်ဦးဘုန်းကြီးကျောင်းကို တိုက်လေယာဥ်တစီးနဲ့ပေါင်ငါးရာဗုံးတလုံးကြဲချတိုက်ခိုက်လို့ကျောင်းဆောင်တခုလုံးပြိုကျပျက်စီးသွားခဲ့ပါတယ်။
အာရက္ခဒေသမှာ စစ်ရေးအရရှုံ့နိမ့်နေတဲ့ စစ်ကော်မရှင်တပ်ဟာ မြို့နယ်တိုင်းကို နေ့စဥ်ရက်ဆက် လေကြောင်းဗုံးကြဲတိုက်ခိုက်နေလို့ ဒေသခံပြည်သူတွေ ထိခိုက်သေဆုံးနေကြရပါတယ်။
စစ်ကော်မရှင်တပ်ဟာ သံတွဲ၊တောင်ကုတ်၊ အမ်း၊ ဂွစတဲ့မြို့နယ်တွေမှာလည်းလာမယ့်ရွေးကောက်ပွဲပြုလုပ်မယ်လို့ထုတ်ပြန်ထားပြီးနောက်လေကြောင်းတိုက်ခိုက်မှုတွေ ပြုလုပ်နေတာပါ။
