Border News Agency
မောင်တော၊ စက်တင်ဘာ ၂၈။
ရိုဟင်ဂျာအမည်ခံလက်နက်ကိုင်အကြမ်းဖက်သမားတွေဟာ အရပ်သားပြည်သူတွေကို ဖမ်းဆီးသတ်ဖြတ်ပြီး အာရက္ခတပ်တော်ဘက်ကကျဆုံးသွားတဲ့ တပ်ဖွဲ့ဝင်တွေဖြစ်တယ်လို့လိမ်လည်လှည့် ဖားဝါဒဖြန့်နေကြတယ်လို့ အာရက္ခတပ်တော်ကဆိုပါတယ်။
အစ္စလာမ်မစ်အစွန်းရောက်စစ်သွေးကြွ အကြမ်းဖက်အဖွဲ့တွေရဲ့အကြမ်းဖက်တိုက်ခိုက်မှုလုပ်ရပ်တွေနဲ့ပတ်သက်ပြီးစက်တင်ဘာလ ၂၇ ရက်၊ မနေ့ကထုတ်ပြန်ချက်မှာ အာရက္ခတပ်တော်က ဆိုထားတာပါ။
ဘင်္ဂလားဒေ့ရှ်နိုင်ငံအတွင်းမှ နယ်စပ်ဖြတ်ပြီးမောင်တောခရိုင်အတွင်းသို့ ခိုးဝင်ရောက်ရှိလာကြတဲ့အစ္စလာမ်မစ်အစွန်းရောက်အဖွဲ့တွေဟာ ဒေသခံပြည်သူတွေကို ရက်ရက်စက်စက်သတ်ဖြတ်နေကြတယ်လို့ ဆိုပါတယ်။
အဲဒီအရပ်သားအလောင်းတွေကို အာရက္ခတပ်တော်စစ်ယူနီဖောင်းတွေ တမင်တကာရည်ရွယ်ချက်ရှိရှိအစားထိုးဝတ်ဆင်ပေးပြီး ရုပ်သံ၊ ဓာတ်ပုံတွေထုတ်လွှင့်ကာ သူတို့ကျူးလွန်ထားတဲ့အရပ်သားသတ်ဖြတ်မှုတွေကို ဖျောက်ဖျက်ဖို့ကြိုးစားအားထုတ်ကြတယ်လို့ အာရက္ခတပ်တော်က ဆိုပါတယ်။
အဲဒီသတ်ဖြတ်ခံရသူတွေကို အာရက္ခတပ်တော်ရဲ့ယူနီဖောင်း၊ စစ်အသုံးအဆောင်ပစ္စည်းတွေ အစားထိုးဝတ်ဆင်ပေးထားတဲ့အရပ်သားအလောင်းတွေကို တိုက်ပွဲအတွင်းအာရက္ခတပ်တော် ဘက်ကကျဆုံးသွားတဲ့တပ်ဖွဲ့ဝင်တွေဖြစ်တယ်ဟုလည်း လိမ်လည်လှည့်ဖြားဝါဒဖြန့်နေကြတယ်လို့ ဆိုပါတယ်။
အဲဒီအပြင် ရိုဟင်ဂျာအမည်ခံလက်နက်ကိုင်အကြမ်းဖက်သမားတွေဟာ အာရက္ခတပ်တော်နဲ့အပြင်းအထန်တိုက်ပွဲဖြစ်နေသယောင်တိုက်ပွဲအတုတွေဖန်တီးပြီး ဝါဒဖြန့်နေကြတယ်လို့ ဆိုပါတယ်။
နောက်ပြီး အာရက္ခတပ်တော်ရဲ့လုံခြုံရေးစခန်းကို အကြမ်းဖက်သမားတွေသိမ်းထားတဲ့ပုံစံမျိုးဖန်တီးပြီး အကြမ်းဖက်မှုထောက်ခံသူတွေရဲ့ထောက်ခံမှု ပိုမိုရရှိလာစေဖို့အတွက် ပုံမှားရိုက်ရုပ်သံတွေပြုလုပ်ကာ လူမှုကွန်ရက်စာမျက်နှာတွေမှာ ဝါဒဖြန့်လှုံ့ဆော်နေကြတယ်လို့ အာရက္ခတပ်တော်က ဆိုပါတယ်။
အဲဒီအာကန်ရိုဟင်ဂျာကယ်တင်ရေးတပ်မတော်(ARSA)၊ ရိုဟင်ဂျာစည်းလုံးညီညွတ်ရေးအဖွဲ့(RSO)၊ အာရကန်ရိုဟင်ဂျာတပ်မတော်(ARA)ထဲမှာ ရိုဟင်ဂျာစည်းလုံးညီညွတ်ရေးအဖွဲ့(RSO)ဟာ ဘင်္ဂလားဒေ့ရှ်နိုင်ငံမှာအဓိကလှုပ်ရှားနေကြတယ်လို့ ဒုက္ခသည်တွေကဆိုကြပါတယ်။
အဲဒီအစ္စလာမ်မစ်အစွန်းရောက်စစ်သွေးကြွ ရိုဟင်ဂျာအမည်ခံလက်နက်ကိုင်အကြမ်းဖက်အဖွဲ့တွေဟာ ဘင်္ဂလားဒေ့ရှ်နိုင်ငံအတွင်းမှာ ဘင်္ဂလားဒေ့ရှ်နယ်ခြားစောင့်တပ်(Border Guard Bangladesh – BGB)က အစွန်းရောက်စစ်သွေးကြွဝါဒအားပေးတဲ့ အကျင့်ပျက်အရာရှိတချို့ရဲ့အားပေးထောက်ခံမှုတွေနဲ့ပူးပေါင်းဆောင်ရွက်မှုတွေကို ရရှိထားကြတယ်လို့အာရက္ခတပ်တော်က ဆိုပါတယ်။
အဲဒီရိုဟင်ဂျာအမည်ခံလက်နက်ကိုင်အကြမ်းဖက်အဖွဲ့တွေဟာ စစ်ရေး၊ ထောက်ပံ့ရေးအကူအညီတွေကို အပြည့်အဝရယူထားရုံသာမက BGB စခန်းတွေအနီးမှာ ရိုဟင်ဂျာအမည်ခံလက်နက်ကိုင်အကြမ်းဖက်တပ်စခန်းတချို့ကို အခိုင်အမာအခြေစိုက်တပ်စွဲခွင့်ရရှိထားတယ်လို့ ဆိုပါတယ်။
အဲဒီအခြေပြုနေရာတွေကတဆင့် အာရက္ခဒေသအတွင်းသို့ဝင်ရောက် အကြမ်းဖက်လှုပ်ရှားနေကြတယ်လို့ အာရက္ခတပ်တော်က ဆိုပါတယ်။
အဲဒီအာရက္ခ-ဘင်္ဂလားဒေ့ရှ်နယ်စပ်၊ မောင်တောမြို့နယ်မှာအရပ်သားတွေအပါအဝင် လူတချို့ဖမ်းဆီးသတ်ဖြတ်ခံနေကြရတာဟာ မူးယစ်ဆေးဝါးကိစ္စတွေနဲလည်း ဆက်စပ်နေကြတယ်လို့မောင်တောဒေသခံတွေက ဆိုကြပါတယ်။
