Border News Agency
မြောက်ဦး၊ဒီဇင်ဘာ ၁၂။
စစ်ကော်မရှင်အနေနဲ့ ပြည်သူတွေအတွက်အရေးပါတဲ့ ကျန်းမာရေးအဆောက်အအုံတွေကို ပစ်မှတ်ထားတိုက်ခိုက်တာရပ်တန့်ဖို့ ကမ္ဘာ့ကျန်းမာရေးအဖွဲ့(WHO)ရဲ့ အကြီးအကဲဖြစ်တဲ့တက်ဒရော့စ် (Tedros) က ပြောကြားလိုက်ပါတယ်။
အာရက္ခတပ်တော်ထိန်းချုပ်ထားတဲ့ မြောက်ဦးမြို့၊ ပြည်သူ့ဆေးရုံကို ဒီဇင်ဘာလ ၁၀ ရက်နေ့က စစ်ကော်မရှင်တပ် ရွယ်ရည်ချက်ရှိရှိလေကြောင်းတိုက်ခိုက်ခဲ့တာကြောင့် ကလေးတွေ၊ ကျန်းမာရေးဝန်ထမ်းတွေ၊ လူနာတွေအပါအဝင် အရပ်သားသုံးဆယ်သုံးဦးသေဆုံးခဲ့ပြီး ခုနှစ်ဆယ့်ငါးဦးဒဏ်ရာရသွားခဲ့ပါတယ်။
မြောက်ဦးဆေးရုံကို လေကြောင်းတိုက်ခိုက်တာဟာ လူသားမျိုးနွယ်အပေါ် တိုက်ခိုက်တာဖြစ်ပြီး လူပေါင်းများစွာရဲ့ ကျန်းမာရေးစောင့်ရှောက်ခံယူမှုအပေါ် ကြီးကြီးမားမားနှောင့်ယှက်ဖျက်ဆီးလိုက်တာဖြစ်တယ်လို့ ကမ္ဘာ့ကျန်းမာရေးအဖွဲ့ (WHO)အကြီးအကဲတက်ဒရော့စ် (Tedros) ကဆိုပါတယ်။
“ကျန်းမာရေးစောင့်ရှောက်မှုနေရာကို တိုက်ခိုက်မှုတိုင်းဟာ လူသားမျိုးနွယ်အပေါ် တိုက်ခိုက်တာပဲဖြစ်တယ်။ ကျန်းမာရေးဆိုင်ရာအဆောက်အအုံတွေ၊ လူနာတွေနဲ့ ကျန်းမာရေးဝန်ထမ်းတွေကို ဘယ်အချိန်အခါမဆိုအကာအကွယ်ပေးထားရမယ်။ ကျန်းမာရေးစောင့်ရှောက်မှုနေရာကို တိုက်ခိုက်မှုတွေရပ်တန့်ပါ။” လို့တက်ဒရော့စ်က ဆိုပါတယ်။
အဲဒီအပြင် ကျန်းမာရေးစောင့်ရှောက်မှုခံယူနေတဲ့ လူပေါင်းများစွာကိုသေဆုံးစေခဲ့တဲ့ မြောက်ဦးဆေးရုံတိုက်ခိုက်ခံရမှုအပေါ်တုန်လှုပ်ခြောက်ခြားဖြစ်ရတယ်လို့ ဆိုပါတယ်။
မြောက်ဦးခရိုင်ဆေးရုံဟာ ရခိုင်ပြည်မြောက်ပိုင်းဒေသအတွက် ဆေးကုသမှုဆိုင်ရာ အဓိကအသုံးပြုနေတဲ့ ဆေးရုံဖြစ်ပြီး အရေးပေါ်ကျန်းမာရေးစောင့်ရှောက်မှု၊ သားဖွားစောင့်ရှောက်မှုနဲ့ ခွဲစိတ်မှုအပါအဝင် ဒေသခံရခိုင်ပြည်သူတွေရဲ့ ကျန်းမာရေးစောင့်ရှောက်မှုအတွက် အရေးပါတဲ့ဆေးရုံလည်းဖြစ်တယ်လို့ ဆိုပါတယ်။
“ဒီတိုက်ခိုက်မှုကြောင့် ဒေသခံလူထုတရပ်လုံးအတွက် ကျန်းမာရေးစောင့်ရှောက်မှုရယူသုံးစွဲခွင့်ကို အနှောင့်အယှက်ဖြစ်စေလိမ့်မယ်” လို့ တက်ဒရော့စ်က ဆိုပါတယ်။ စစ်ကော်မရှင်တပ်ဟာ အာရက္ခတပ်တော်ထိန်းချုပ်နယ်မြေမှ အရပ်သားပြည်သူတွေကို နေ့စဉ်ရက်ဆက်တမင်တကာ ရည်ရွယ်ချက်ရှိရှိအဓိကပစ်မှတ်ထားတိုက်ခိုက်နေတယ်လို့ဆိုပါတယ်။
အဲဒီလိုစစ်ကော်မရှင်ရဲ့ စစ်ရာဇဝတ်မှုနဲ့ လူသားမျိုးနွယ်အပေါ် ပြစ်မှုကျူးလွန်နေမှုတွေကို နိုင်ငံတကာအနေနဲ့ လက်ပိုက်ကြည့်မနေဘဲ ဝိုင်းဝန်းထိန်းကျောင်းပေးကြပါဖို့ အားကိုးစွာအကူအညီတောင်းခံတယ်လို့ဆိုပါတယ်။
စစ်ကော်မရှင်တပ်ဟာ အာရက္ခဒေသအပါအဝင် မြန်မာတနိုင်ငံလုံးမှာအရပ်သားပြည်သူတွေအပေါ် အကြမ်းဖက်မှုတွေကျူးလွန်နေတာကို နိုင်ငံတကာနဲ့ကမ္ဘာ့နိုင်ငံကြီးတွေ၊ အိမ်နီးနားချင်းနိုင်ငံတွေက အရေးယူပေးဖို့ ရက္ခိုင်အမျိုးသားအဖွဲ့ချုပ်ကတောင်းဆိုထားပါတယ်။
