Border News Agency
သံတောင်ကြီး၊ ဒီဇင်ဘာ ၂၉ ။
ကရင်ပြည်၊ သံတောင်ကြီးမြို့မှာရှိတဲ့ စစ်ကော်မရှင်တပ်ရဲ့တပ်မတော်(ကြည်း)ဘုရင့်နောင်တိုက်ခိုက်ရေးကျောင်းကို ရှော့တိုက်ဒုံးနဲ့ တိုက်ခိုက်ခဲ့တယ်လို့ Brave Warriors For Myanmar(BWM)အဖွဲ့က ဒီဇင်ဘာလ ၂၈ ရက်၊ မနေ့ထုတ်ပြန်ပါတယ်။
အဲဒီ စစ်ကော်မရှင်တပ်ရဲ့ဘုရင့်နောင်တိုက်ခိုက်ရေးကျောင်းကို ဒီဇင်ဘာလ ၂၈ ရက်၊ နေ့လည် ၁၂ နာရီ ၄၀ မိနစ်အချိန်က ၁၀၇ မမရှော့တိုက်ဒုံးခြောက်လုံးနဲ့ ပစ်ခတ်တိုက်ခိုက်ခဲ့တယ်လို့ ဆိုပါတယ်။
စစ်ကော်မရှင်တပ်ရဲ့ တပ်ရင်းမှူးသင်တန်းဆောင်၊ တပ်ရင်းမှူးအိပ်ဆောင်၊ လက်နက်ကြီးအထိုင်နဲ့ ဘုရင်နောင်ကျောင်း ဌာန
ချုပ်ရုံးခန်းတွေကို အဓိကရည်ရွယ်ပြီး တိုက်ခိုက်ခဲ့တာဖြစ်တယ်လို့ ဆိုပါတယ်။
အဲဒီနေရာမှာ စစ်ကော်မရှင်တပ်ရဲ့ တပ်ရင်းမှူးတွေကို သင်တန်းပေးနေတဲ့အချိန်ဖြစ်တာကြောင့် ရှော့တိုက်ဒုံးတွေနဲ့ တိုက်ခိုက်ခဲ့တာလို့ ဆိုပါတယ်။
အဲဒီတိုက်ခိုက်မှုကို BWM အဖွဲ့ရဲ့ စီမံမှုနဲ့ Moutain Knight Civilian Defence Force(MKCDF) ၊ Anti-Coup People’s Liberation Force(ACPLF)၊ သံတောင်မြောက်ပိုင်းအထူးဒေသ ဖိုက်တာဆားခဲအဖွဲ့တွေက KNLA တပ်မဟာ ၂၊ တပ်ရင်း ၅ တို့ပူးပေါင်းတိုက်ခိုက်ခဲ့ကြတာလို့ဆိုပါတယ်။
အဲဒီအပြင် စစ်ကော်မရှင်တပ်ရဲ့အလယ်ပိုင်းတိုင်း စစ်ဌာနချုပ် လပခ အတွင်းကိုလည်း ဒီဇင်ဘာလ ၂၈ ရက်၊ မနက် ၁ နာရီအချိန်မှာ ရှော့တိုက်ဒုံးလေးလုံးနဲ့ ပစ်ခတ်တိုက်ခိုက်ခဲ့ပါတယ်။
