Border News Agency
ဆော၊ ဇန်နဝါရီ ၃။
ယောတပ်တော်ရဲ့ တော်လှန်ရေးကာလတွေမှာ အာရက္ခတပ်တော်(AA)က အနီးကပ်ကွပ်ကွဲကူညီပေးခဲ့တယ်လို့ ယောတပ်တော် (YAW ARMY)က ဇန်နဝါရီလ ၂ ရက်၊ မနေ့ကထုတ်ပြန်ပါတယ်။
တော်လှန်ရေးရဲ့ခက်ခဲကြမ်းတမ်းတဲ့ ခရီးလမ်းကိုတည့်မတ်စွာလျှောက်လှမ်းနိုင်ဖို့ အစဉ်တစိုက်အနီးကပ်ကွပ်ကွဲပြီး ထောက်ပံ့ကူညီအကြံဉာဏ်ပေးခဲ့တဲ့ ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA)ကို အထူးပင်လှိုက်လှိုက်လှဲလှဲ လေးစားဂုဏ်ပြုမှတ်တမ်းတင်တယ်လို့ ဆိုပါတယ်။
အဲဒီအပြင် စစ်ရေးနိုင်ငံရေးအကြံဉာဏ်နဲ့ အခြားအကူအညီတွေပေးပြီး စိတ်ခွန်အားပေးခဲ့တဲ့ ကချင်လွတ်လပ်ရေးအဖွဲ့/ကချင်လွတ်လပ်ရေး တပ်မတော် (KIO/KIA) ကိုလည်း လှိုက်လှိုက်လှဲလှဲ ကျေးဇူးတင်တယ်လို့ဆိုပါတယ်။
နောက်ပြီးယောတပ်တော် စတင်ထူထောင်ချိန်က ဘဏ္ဍာရေးဆိုင်ရာအကြပ်အတည်း တွေကြုံရချိန်မှာကူညီဖြေရှင်းပေးခဲ့တဲ့ မြိုင်မြို့နယ်ပြည်သူ့ကာကွယ်ရေးအဖွဲ့နဲ့ မကွေးပြည်သူ့ကာကွယ်ရေးတပ်မတော် (Magway PDF)ကိုလည်း ကျေးဇူးတင်တယ်လို့ဆိုပါတယ်။
အဲဒီအပြင် ယောတပ်တော်နဲ့အတူ ရပ်တည်တိုက်ပွဲဝင်ခဲ့ကြတဲ့ မဟာမိတ်တော်လှန်ရေးအဖွဲ့အစည်းတွေကိုလည်း ကျေးဇူးတင်တယ်လို့ဆိုပါတယ်။
ယောတပ်တော်ကို စစ်ရေး၊ နိုင်ငံရေးအခြေအနေတွေအရ တော်လှန်ရေးအဖွဲ့အစည်းတခုအဖြစ် ပြီးခဲ့တဲ့ ၂၀၂၄ ခုနှစ်၊ ဇန်နဝါရီလ ၂ ရက်နေ့မှာ စတင်ထူထောင်ခဲ့တာဖြစ်ပါတယ်။
စစ်အာဏာရှင်အမြစ်ပြတ်ရေးနဲ့ ယောကံကြမ္မာယောဖန်တီးခွင့်ရရှိရေးအတွက် မမှိတ်မသုန် ဆက်ပြီးတိုက်ပွဲဝင် သွားမယ်လို့ ယောတပ်တော်ကဆိုပါတယ်။
