Border News Agency
နေပြည်တော်၊ ဇန်နဝါရီ ၄။
အာဏာသိမ်းစစ်ခေါင်းဆောင်ဟာ သူတို့ဖမ်းဆီးထိမ်းသိမ်းထားတဲ့ အကျဉ်းသူ၊ အကျဉ်းသား ခြောက်ထောင့်တရာ့သုံးဆယ့်လေးဦးကို လွတ်ငြိမ်းခွင့်ပေးလိုက်ပါတယ်။
အဲဒီအကျဉ်းသားတွေကို ဒီနေ့ဇန်နဝါရီလ ၄ ရက်နေ့မှာ ကျရောက်တဲ့ ၇၈ ကြိမ်မြောက် မြန်မာနိုင်ငံလွတ်လပ်ရေးနေ့မှာ လွတ်ပေးခဲ့တာဖြစ်ပါတယ်။
ပြည်သူလူထု နှလုံးစိတ်ဝမ်းအေးချမ်းစေရေးနဲ့ လူသားချင်းစာနာထောက်ထားမှုကို အလေးထားတာကြောင့် အကျဉ်းထောင်တွေမှ အကျဉ်းသား ခြောက်ထောင့်တရာ့သုံးဆယ်လေးဦးကို လွတ်ငြိမ်းခွင့်ပေးခဲ့တာလို့ စစ်ခေါင်းဆောင်ကဆိုပါတယ်။
သူတို့တွေကို ရာဇဝတ်ပုဒ် ကျင့်ထုံးဥပဒေပုဒ်မ ၄၀၁၊ ပုဒ်မခွဲ ၁ အရ “နောက်အကြိမ် ပြစ်မှုထမ်မံကျူးလွန်ရင် အဲဒီပြစ်ဒဏ်နဲ့အတူ ခုကျမယ့်ပြစ်ဒဏ်တွေပါ ဆက်ပြီးခံယူရမယ်လို့ ” ခံဝန်ကတိနဲ့ လွတ်ငြိမ်းခွင့်ပေးခဲ့တယ်လို့ ဆိုပါတယ်။
အဲဒီအပြင် သူတို့ဖမ်းထားတဲ့နိုင်ငံခြားအကျဉ်းသား ငါးဆယ့်နှစ်ဦးကို လွတ်ငြိမ်းခွင့်ပေးလိုက်သလို အမှုကြီးကိုးမှုနဲ့ ပြစ်ဒဏ်ကျခံနေသူတွေကိုလည်း ခြောက်ပုံတပုံ ပြစ်ဒဏ်လျှော့ရပ်ပေးလိုက်ပါတယ်။
