Border News Agency
မြောက်ဦး၊ ဇန်နဝါရီ ၁၁။
အာရက္ခပြည်သူ့တော်လှန်ရေးအစိုးရရဲ့ အာရက္ခပြည်သူ့ကျန်းမာရေးဌာနမှာ အာရက္ခဆေးပညာသိပ္ပံကျောင်း (Arakkha School of Medicine) ဝင်ခွင့်ခေါ်ယူနေပါတယ်။
အဲဒီ အာရက္ခပြည်သူ့ကျန်းမာရေးဌာနမှာ ဆရာဝန်လိုအပ်ချက်ကိုဖြည့်ဆည်းဖို့နဲ့ တိုင်းပြည်တည်ဆောက်ရေးမှာ အမျိုးသားရေးအသိနဲ့ တာဝန်ယူမယ့်ဆေးပညာရှင်မျိုးဆက်သစ်တွေ မွေးထုတ်ပေးဖို့အတွက် ခေါ်ယူနေတာပါ။
အဲဒီလို ခေါ်ယူရာမှာ အသက်နှစ်ဆယ့်ငါးနှစ်အောက်ဖြစ်ရမှာဖြစ်ပြီး စနစ်ဟောင်းသစ် ၁၂ တန်း၊ အာရက္ခပညာရေးဌာန ၁၂ တန်း၊ BECA၊ GED သို့မဟုတ် IGCSE တခုခုကို သိပ္ပံတွဲနဲ့အောင်မြင်ထားသူဖြစ်ရပါမယ်လို့ ဆိုပါတယ်။
အဲဒီအပြင် ဇီဝ၊ ရူပ၊ ဓာတုဘာသာရပ်တွေမှာ သတ်မှတ်ရမှတ် ၇၀ မှတ် သို့မဟုတ် Grade B ပြည့်မီရမှာဖြစ်ပြီး အင်္ဂလိပ်စာအရည်အချင်းပြည့်မီဖို့လည်း လိုအပ်တယ်လို့ ဆိုပါတယ်။
အဲဒီလျှောက်လွှာနဲ့အတူ မှတ်ပုံတင်မိတ္တူ၊ ဓာတ်ပုံ၊ ပညာအရည်အချင်းအမှတ်စာရင်းမူရင်းနဲ့ ပြစ်မှုကင်းရှင်းကြောင်း ထောက်ခံချက်တွေ တင်ပြရမယ်လို့လည်း ဆိုပါတယ်။
အဲဒီအပြင် ကျန်းမာရေးကောင်းမွန်ပြီး သွေးမှတဆင့်ကူးစက်တတ်တဲ့ ရောဂါကင်းရှင်းသူဖြစ်ရမယ်လို့ ဆိုပါတယ်။
အဲဒီရွေးချယ်ခံရသူတွေဟာ အင်္ဂလိပ်စာနဲ့ အခြေခံဆေးပညာရေးဖြေစာမေးပွဲ၊ လူတွေ့စစ်ဆေးမှုတွေကို ဖြတ်ကျော်ရမှာဖြစ်ပြီး ခုနှစ်နှစ်ကြာသင်တန်းပြီးဆုံးပါက အာရက္ခပြည်သူ့ကျန်းမာရေးဌာနမှာ ဝန်ထမ်းအဖြစ်တာဝန်ထမ်းဆောင်ဖို့ ခံဝန်ကတိပြုရမှာ ဖြစ်ပါတယ်လို့ဆိုပါတယ်။
စိတ်ပါဝင်စားသူတွေအနေနဲ့ လျှောက်လွှာတွေကို လာမယ့်ဇန်နဝါရီလ၂၅ ရက်နေ့ နောက်ဆုံးထားပြီး သက်ဆိုင်ရာမြို့နယ် ပြည်သူ့ကျန်းမာရေးဌာနတွေမှာ ပေးပို့လျှောက်ထားနိုင်တယ်လို့ ဆိုပါတယ်။
