Border News Agency
ရန်ကုန်၊ ဇန်နဝါရီ ၁၅။
ပြည်ပသံရုံးတခုနဲ့ လျှို့ဝှက်တွေ့ဆုံခဲ့တာမို့ ပြည်သူ့ရှေ့ဆောင်ပါတီဥက္ကဋ္ဌဒေါ်သက်သက်ခိုင်နဲ့ပါတီဝင်မထက်ထက်လှိုင်ကို အရေးယူမယ်လို့ ဇန်နဝါရီလ၁၄ ရက်၊ မနေ့က အာဏာသိမ်းစစ်တပ်လက်အောက်ခံ ရွေးကောက်ပွဲကော်မရှင်ထုတ်ပြန်ပါတယ်။
အဲဒီပြည်သူ့ရှေ့ဆောင်ပါတီဥက္ကဋ္ဌဒေါ်သက်သက်ခိုင်နဲ့ ဗဟိုအလုပ်အမှုဆောင်အဖွဲ့ဝင်မထက်ထက်လှိုင်ဟာ အာဏာသိမ်းစစ်တပ်လက်အောက်ခံရွေးကောက်ပွဲကော်မရှင်ကို ခွင့်ပြုချက်တင်ပြတာမရှိပဲ ပြီးခဲ့တဲ့နှစ်ဒီဇင်ဘာလ ၁၈ ရက်နေ့က ပြည်ပသံရုံးတရုံးကလူတချို့ကို တွေ့ဆုံခဲ့ကြတယ်လို့ ဆိုပါတယ်။
ရန်ကုန်တိုင်း၊ ဗဟန်းမြို့နယ်၊ နတ်မောက်လမ်းရှိ စားသောက်ဆိုင်မှာ မွန်းလွဲ ၂ နာရီမှမွန်းလွဲ ၃ နာရီထိ လျှို့ဝှက်တွေ့ဆုံခဲ့တယ်လို့ သတင်းပို့တိုင်ကြားခံရတယ်လို့ ဆိုပါတယ်။
အဲဒါကို စုံစမ်းစစ်ဆေးမှုပြုလုပ်ခဲ့ရာ မှန်ကန်သလိုဒေါ်သက်သက်ခိုင်နဲ့ မထက်ထက်လှိုင်လည်း မှန်ကန်ကြောင်းဝန်ခံထွက်ဆိုခဲ့တယ်လို့ ထုတ်ပြန်ပါတယ်။
အဲဒါကြောင့် ပြည်သူ့ရှေ့ဆောင်ပါတီဥက္ကဋ္ဌဒေါ်သက်သက်ခိုင်နဲ့ ဗဟိုအလုပ်အမှုဆောင်အဖွဲ့ဝင်မထက်ထက်လှိုင်ကို ဥပဒေနဲ့အညီအရေးယူဆောင်ရွက်သွားမယ်လို့ ဆိုပါတယ်။
အဲဒီအပြင် နိုင်ငံရေးပါတီတွေဟာ ဖွဲ့စည်းပုံအခြေခံဥပဒေပုဒ်မ ၄၀၇(ဂ)၊ ပုဒ် မ ၄၀၈နဲ့ နိုင်ငံရေးပါတီမှတ်ပုံတင်ခြင်း ဥပဒေပုဒ်မ ၆ (စ)ပါ ပြဋ္ဌာန်းချက်အရ ပြည်ပဩဇာခံယူခြင်းမပြုရဆိုသော ပြဋ္ဌာန်းချက်ကို စောင့်ထိန်းလိုက်နာရန်တာဝန်ရှိပြီး လိုက်နာရန်ပျက်ကွက်ပါက နိုင်ငံရေးပါတီအဖြစ် မှတ်ပုံတင်ထားခြင်းကို ပယ်ဖျက်ရမယ်လို့ ထုတ်ပြန်ပါတယ်။
နိုင်ငံရေးပါတီတွေဟာ နိုင်ငံခြားတိုင်းပြည်တခုခုရဲ့အဖွဲ့အစည်း သို့မဟုတ် လူပုဂ္ဂိုလ်တွေနဲ့တွေ့ဆုံရန်ရှိပါက ရွေးကောက်ပွဲကော်မရှင်ထံသို့ ကြိုတင် တင်ပြပြီးခွင့်ပြုချက်ရရှိမှသာ တွေ့ဆုံရမှာ
ဖြစ်သလို သင့်လျော်တဲ့အစီအမံနဲ့ စိစစ်ခွင့်ပြုပေးမယ်လို့ ရွေးကောက်ပွဲကော်မရှင်က ထုတ်ပြန်ပါတယ်။
