Border News Agency
နယ်သာလန်၊ ဇန်နဝါရီ ၁၈။
ရိုဟင်ဂျာလူမျိုးတုံးသတ်ဖြတ်မှုဆိုင်ရာ ICJ တရားရုံးကြားနာမှုတွေ ပြန်လည်စတင်နေတဲ့ဒီအချိန်ဟာ တရားမျှတမှုနဲ့တာဝန်ခံမှုအတွက် အလွန်အရေးကြီးတဲ့အချိန်ဖြစ်တယ်လို့ ဒေါ်အောင်ဆန်းစုကြည်ရဲ့သားဖြစ်သူ ကိုထိန်လင်း (ခ) ကင်အဲရစ်က ပြောကြားလိုက်ပါတယ်။
စစ်ကော်မရှင်အနေနဲ့ နိုင်ငံတကာဥပဒေကို လေးစားလိုက်နာရမှာဖြစ်သလို အတိတ်ကရက်စက်ကြမ်းကြုတ်မှုတွေကို ထပ်မံမပြုလုပ်ဖို့လိုအပ်တယ်လို့ ဆိုပါတယ်။
အဲဒီတရားမျှတမှုဆိုတာဟာ ကိုယ်လိုရာကိုပဲရွေးချယ်လို့ရတဲ့ အရာမဟုတ်ဘူးလို့လည်း သူကဆိုပါတယ်။
သူ့ရဲ့မိခင်ဖြစ်သူ ဒေါ်အောင်ဆန်းစုကြည်ဟာ သူ့ဘဝရဲ့ နှစ်ပေါင်း ၂၀ နီးပါးကို စစ်တပ်ရဲ့ဖမ်းဆီးမှုအောက်မှာကုန်ဆုံးခဲ့ရပြီး ဒီနေ့အထိ တခြားနိုင်ငံရေးအကျဉ်းသားတွေနဲ့အတူ ကမ္ဘာကမသိအောင် မတရားဖမ်းဆီးဖွက်ထားခံနေရဆဲဖြစ်တယ်လို့ ထည့်သွင်းပြောဆိုထားပါတယ်။
အဲဒီအပြင် ရွေးကောက်ခံခေါင်းဆောင်တွေ ထောင်ချခံထားရပြီး ပြည်သူတွေရဲ့ဆန္ဒကို ငြင်းပယ်ခံထားရသရွေ့ မြန်မာနိုင်ငံမှာ စစ်မှန်တဲ့တရားမျှတမှု ရှိလာမှာမဟုတ်ဘူးလို့လည်း သူကထောက်ပြထားပါတယ်။
အဲဒါကြောင့် စစ်မှန်တဲ့တာဝန်ခံမှုဆိုတာ ပြည်သူတွေရဲ့ရွေးချယ်မှုအပေါ် လေးစားမှု၊ လွတ်လပ်မှုနဲ့ လူ့ဂုဏ်သိက္ခာကို အသိအမှတ်ပြုတာပဲဖြစ်ရမယ်လို့ ဆိုပါတယ်။
