Border News Agency
မလေးရှား၊ ဇန်နဝါရီ ၂၀။
မြန်မာစစ်ခေါင်းဆောင် ကျင်းပနေတဲ့ရွေးကောက်ပွဲအပေါ် အာဆီယံ (ASEAN) အနေနဲ့ အသိအမှတ်ပြုထောက်ခံမှာမဟုတ်သလို၊ ရွေးကောက်ပွဲစောင့်ကြည့်လေ့လာရေးအဖွဲ့ စေလွှတ်ပေးဖို့တောင်းဆိုချက်ကိုလည်း ပယ်ချထားတယ်လို့ မလေးရှားနိုင်ငံခြားရေးဝန်ကြီး မိုဟာမက် ဟာဆန်က ပြောဆိုလိုက်ပါတယ်။
ဇန်နဝါရီလ ၂၀ ရက်နေ့က ပြုလုပ်တဲ့ မလေးရှားလွှတ်တော် အစည်းအဝေးမှာ ဝန်ကြီးကအခုလိုထုတ်ဖော်ပြောကြားခဲ့တာ ဖြစ်ပါတယ်။
ပြီးခဲ့တဲ့ ၂၀၂၅ ခုနှစ် အာဆီယံဥက္ကဋ္ဌ တာဝန်ယူစဉ်ကတည်းက မြန်မာ့အရေးနဲ့ပတ်သက်လို့ အာဆီယံရဲ့ရပ်တည်ချက်ကို မလေးရှားကအဓိကကိုင်တွယ်ခဲ့တာ ဖြစ်ပါတယ်။
မြန်မာဘက်က ရွေးကောက်ပွဲအတွက် လေ့လာစောင့်ကြည့်ရေးအဖွဲ့စေလွှတ်ပေးဖို့ ကွာလာလမ်ပူထိပ်သီးညီလာခံမှာ တောင်းဆိုခဲ့ပေမယ့် အာဆီယံကငြင်းဆန်ခဲ့ကြောင်း ဝန်ကြီးကဆိုပါတယ်။
“အာဆီယံက စောင့်ကြည့်ရေးအဖွဲ့ မလွှတ်ဘူးလို့ဆုံးဖြတ်ထားပြီးသားပါ။ ဒီရွေးကောက်ပွဲကို ကျနော်တို့အသိအမှတ်မပြုဘူး ဆိုတာပါပဲ။” လို့ ဆိုပါတယ်။
အဲဒီလို အာဆီယံရဲ့ဆုံးဖြတ်ချက်ဟာ စစ်ကော်မရှင်က နိုင်ငံတကာအသိအမှတ်ပြုမှုရဖို့ ကြိုးပမ်းနေတဲ့ရွေးကောက်ပွဲရဲ့ စစ်မှန်မှုကို မေးခွန်းထုတ်လိုက်တာလည်း ဖြစ်ပါတယ်။
အဲဒီအပြင် ကုလသမဂ္ဂနဲ့ အနောက်နိုင်ငံတွေကလည်း ဒီရွေးကောက်ပွဲဟာ တရားဝင်မှုရဖို့အားထုတ်နေတဲ့ လုပ်ရပ်တခုသာဖြစ်တယ်လို့ ဝေဖန်နေကြတာပါ။
အဲဒီ အဖွဲ့ကြီးတခုလုံးအနေနဲ့ အသိအမှတ်မပြုဖို့ ဆုံးဖြတ်ထားပေမယ့် အဖွဲ့ဝင်နိုင်ငံတချို့ကတော့ သီးခြားစီဆုံးဖြတ်ချက်နဲ့ စောင့်ကြည့်ရေးအဖွဲ့ စေလွှတ်တာမျိုးတွေရှိနေတယ်လို့ သိရပါတယ်။
ဒါပေမယ့် အာဆီယံရဲ့စုပေါင်းရပ်တည်ချက်ကတော့ ဒီရွေးကောက်ပွဲကို လက်မခံဖို့ပဲဖြစ်ပါတယ်လို့ ဆိုပါတယ်။
