Border News Agency
ဂမ်ဘီယာ၊ ဇန်နဝါရီ ၂၁။
ဂမ်ဘီယာနိုင်ငံက မြန်မာနိုင်ငံအပေါ်စွဲဆိုထားတဲ့အမှုနဲ့ပတ်သက်ပြီး မြန်မာနိုင်ငံရဲ့ ရှေ့နေ Ms. Leigh Lawrie KC က ပြီးခဲ့တဲ့ရက်ပိုင်းက နယ်သာလန်နိုင်ငံ၊ သည်ဟိဂ်မြို့မှာရှိတဲ့ ICJ တရားရုံးမှာ ပြန်လည်ချေပလျှောက်လဲခဲ့ပါတယ်။
ဂမ်ဘီယာဘက်က “ရာနဲ့ချီတဲ့ဘင်္ဂါလီရွာတွေမှာ စနစ်တကျသတ်ဖြတ်မှုတွေရှိနေတယ်” လို့ စွပ်စွဲထားပေမဲ့ လက်တွေ့မှာတော့ သက်သေအထောက်အထားတွေဟာ အားနည်းနေတယ်လို့ ဆိုပါတယ်။
အဲဒီရွာအရေအတွက်အပေါ်ချေပချက် ဂမ်ဘီယာဘက်ကရာနဲ့ချီတဲ့ ရွာတွေမှာကျူးလွန်မှုတွေရှိနေတယ်လို့ ဆိုပေမယ့် တကယ်တမ်းတရားရုံးမှာ တင်ပြနိုင်တာဟာ ၄၆ ရွာပဲရှိတယ်လို့ ဆိုပါတယ်။
အဲဒါဟာ ရခိုင်ပြည်နယ်မြောက်ပိုင်းမှာရှိတဲ့ ဘင်္ဂါလီရွာပေါင်း ၅၀၉ ရွာရဲ့ ၁၀ ရာခိုင်နှုန်းတောင်မပြည့်တဲ့အတွက် ဂမ်ဘီယာရဲ့ “ရာနဲ့ချီသော” ဆိုတဲ့စွပ်စွဲချက်ဟာ အချက်အလက်နဲ့ကွဲလွဲနေတယ်လို့ ထောက်ပြသွားခဲ့ပါတယ်။
ဂမ်ဘီယာဘက်ကစွပ်စွဲထားတဲ့ ရွာ ၄၂ ရွာကို ခွဲခြမ်းစိတ်ဖြာကြည့်ရင် ရွာ ၁၇ ရွာမှာ လိင်ပိုင်းဆိုင်ရာအကြမ်းဖက်မှု စွပ်စွဲချက်လုံးဝမရှိသလို ၁၂ ရွာမှာလည်း သတ်ဖြတ်မှုစွပ်စွဲချက်မရှိတာကြောင့် ဒါဟာစနစ်တကျပြုလုပ်တဲ့ လုပ်ရပ်မဟုတ်ဘူးလို့ ဆိုပါတယ်။
အဲဒီအပြင် ဂမ်ဘီယာဘက်ကတင်ပြတဲ့သက်သေတွေဟာ ဝေဝါးလွန်းတယ်လို့လည်း ရှေ့နေကဝေဖန်ခဲ့ပါတယ်။ “ခေါင်းတွေ မြစ်ထဲမှာ ဘောလုံးလို မျောနေတယ်” ဒါမှမဟုတ် “သစ်ပင်တွေမှာ ကိုယ်လက်အင်္ဂါတွေ ချိတ်ဆွဲထားတယ်” ဆိုတဲ့ပြောဆိုချက်တွေဟာ ဘယ်သူဘယ်ဝါမှန်းမသိရတဲ့လူတွေဆီကနေရရှိတဲ့ အစီရင်ခံစာတွေသာဖြစ်တယ်လို့ ဆိုပါတယ်။
အဲဒီလိုဝေဝါးတဲ့စွပ်စွဲချက်တွေကို မြန်မာနိုင်ငံအနေနဲ့ ပြန်လည်ခုခံဖို့တောင် ခက်ခဲတဲ့အထိဖြစ်နေတယ်လို့ ပြောကြားသွားခဲ့ပါတယ်။
အဲဒီအပြင် မြန်မာစစ်တပ်ရဲ့လှုပ်ရှားမှုတွေဟာ ရည်ရွယ်ချက်ရှိရှိလူမျိုးသုဉ်းသတ်ဖြတ်ဖို့ မဟုတ်ဘဲ ARSA အကြမ်းဖက်အဖွဲ့ရဲ့ တိုက်ခိုက်မှုတွေအပေါ် လုံခြုံရေးအရအချိန်အကန့်အသတ်နဲ့ တုံ့ပြန်ဆောင်ရွက်ခဲ့တာသာဖြစ်တယ်လို့ ဆိုပါတယ်။
အဲဒါကြောင့် ဂမ်ဘီယာရဲ့ စွပ်စွဲချက်တွေဟာ ခိုင်လုံတဲ့သက်သေမရှိဘဲ ယေဘုယျဆန်နေတယ်လို့ ရှေ့နေ Ms. Leigh Lawrie KC က အကျဉ်းချုပ်ချေပလျှောက်လဲခဲ့ပါတယ်။
