Border News Agency
မဲဆောက်၊ ဇန်နဝါရီ ၃၁ ။
ထိုင်းနိုင်ငံမှာရောက်ရှိနေထိုင်ကြတဲ့ မြန်မာရွှေ့ပြောင်းအခြေချသူတွေနဲ့ အထောက်အထားမဲ့ကလေးငယ်တွေအားလုံး ခွဲခြားမှုမရှိဘဲ ပညာသင်ကြားခွင့်ရရှိစေဖို့အတွက် ဥပဒေပြင်ဆင်ချက်ကို ထိုင်းအစိုးရပြန်တမ်း (Royal Gazette) ကနေ ဇန်နဝါရီလ ၃၀ ရက်နေ့မှာ အတည်ပြုထုတ်ပြန်လိုက်ပါတယ်။
အဲဒီပညာရေးဥပဒေသစ်အရ ထိုင်းနိုင်ငံထဲမှာရှိတဲ့ ကလေးငယ်မှန်သမျှဟာ အိမ်ထောင်စုစာရင်း၊ မွေးစာရင်း ဒါမှမဟုတ် တရားဝင်ဗီဇာ အထောက်အထားတွေ မရှိရင်တောင်မှ ကျောင်းအပ်နှံခွင့် ရှိမှာဖြစ်ပါတယ်။
အဲဒီလို ကျောင်းအပ်နှံတဲ့အချိန်မှာ ထိုင်းမှတ်ပုံတင်နံပါတ် ၁၃ လုံးမရှိတဲ့ ကလေးတွေအတွက် သက်ဆိုင်ရာကျောင်းကနေ G – Code လို့ခေါ်တဲ့ (ရှေ့မှာ G အက္ခရာပါဝင်တဲ့ ဂဏန်း ၁၃ လုံးပါ) ကိုယ်ပိုင်နံပါတ်ကို ထုတ်ပေးရမှာဖြစ်ပါတယ်။
ထိုင်းနိုင်ငံမှာနေထိုင်သူဘယ်သူမဆို နယ်မြေဒေသ ဒါမှမဟုတ် လူမျိုးခွဲခြားမှုမရှိဘဲ အစိုးရကျောင်း၊ ပုဂ္ဂလိကကျောင်းနဲ့ အသက်မွေးဝမ်းကျောင်းသင်တန်းကျောင်းတွေမှာ တန်းတူညီမျှပညာသင်ကြားခွင့် ရရမယ်လို့ဆိုပါတယ်။
အဲဒီအပြင် စာသင်ကျောင်းတွေအနေနဲ့ အထောက်အထားမရှိတာကို အကြောင်းပြပြီး ကျောင်းသားလက်ခံဖို့ ငြင်းပယ်တာမျိုးလုံးဝမပြုလုပ်ရဘူးလို့လည်း တားမြစ်ထားပါတယ်။
ကျောင်းတွေအနေနဲ့ ဒီကလေးတွေကို တရားဝင်အထောက်အထား ရရှိစေဖို့အတွက် မိဘတွေနဲ့ပူးပေါင်းပြီး ဒေသအုပ်ချုပ်ရေးရုံးတွေနဲ့ ချိတ်ဆက်ဆောင်ရွက်ပေးဖို့ တာဝန်ရှိပါတယ်။
အဲဒါကြောင့် တကယ်လို့တရားဝင်မှတ်ပုံတင်မရရှိသေးရင်လည်း ကျောင်းကပေးထားတဲ့ G – Code နဲ့ပဲ ပညာသင်နှစ်ပြီးဆုံးတဲ့အထိ ဆက်လက်သင်ကြားခွင့် ပြုရမှာဖြစ်ပါတယ်။
အဲဒီလို G – Code ထုတ်ပေးရတာဟာ “ဘယ်ကလေးမှ နောက်ကျကျန်ရစ်မှုမရှိစေရ (No Child Left Behind)” ဆိုတဲ့ မူဝါဒနဲ့အညီ ကမ္ဘာ့ကလေးသူငယ်အခွင့်အရေးကို လေးစားလိုက်နာဖို့ဖြစ်တယ်လို့ ဆိုပါတယ်။
ထိုင်းနိုင်ငံမှာကြီးပြင်းလာတဲ့ ဒီကလေးတွေကိုပညာတတ်မြောက်စေပြီး နောင်တချိန်မှာ နိုင်ငံအတွက်အကျိုးပြုတဲ့ လူသားအရင်းအမြစ်တွေဖြစ်လာစေဖို့ ရည်ရွယ်တာဖြစ်တယ်လို့ ထိုင်းပညာရေးဝန်ကြီးဌာနက ဆိုပါတယ်။
ဒီဥပဒေဟာ စတင်အကျိုးသက်ရောက်မှုရှိနေပြီဖြစ်ပြီး လာမယ့်ပညာသင်နှစ်သစ်ကစလို့ ပညာရေးဝန်ကြီးဌာနအောက်ကကျောင်းအားလုံးမှာ အပြည့်အဝအကောင်အထည်ဖော် ဆောင်ရွက်သွားမှာဖြစ်ပါတယ်။
