Border News Agency
ဘူးသီးတောင်၊ မတ် ၃။
ဘူးသီးတောင်မြို့နယ်အတွင်းက အာရက္ခတပ်တော် (AA)ဆီလက်နက်ချခဲ့တဲ့ စစ်သုံ့ပန်းမိသားစုတစုကို ရက္ခိုင်အမျိုးသားအဖွဲ့ချုပ် (ULA) ပါတီကော်မတီက မတ်လ ၂ ရက်၊မနေ့ကငွေကျပ် ၁၀ သိန်း ထောက်ပံ့ကူညီခဲ့ပါတယ်။
အဲဒီထောက်ပံ့မှုကို ခမရ ၅၅၁ တပ်ရင်းက တပ်သားစိုးထက်ရဲ့ ဇနီး ဒေါ်ဌေးဌေးဖြူနဲ့ သားသမီး ၄ ဦးကို ပေးအပ်ခဲ့တာဖြစ်ပြီး၊ အခုလို ကူညီရတာဟာ စစ်သုံ့ပန်းမိသားစုဝင်ဖြစ်ပေမယ့် လူသားချင်းစာနာမှုအရ ဘဝရပ်တည်ရေး အထောက်အကူဖြစ်စေဖို့ ရည်ရွယ်တာလို့ ပါတီတာဝန်ရှိသူတွေက ဆိုပါတယ်။
ဒေါ်ဌေးဌေးဖြူတို့ မိသားစုဟာ ၂၀၂၄ ခုနှစ်၊မေလက ဘူးသီးတောင်တိုက်ပွဲအတွင်း ဒုတပ်မမှူး အပါအဝင် တပ်ဖွဲ့ဝင်မိသားစု ၅၀၀ ကျော်နဲ့အတူ လက်နက်ချ ဖမ်းဆီးခံခဲ့ရသူတွေ ဖြစ်ပါတယ်။
သူတို့ကို AA က ၁ နှစ်ကျော်ကြာ ထိန်းသိမ်းထားပြီးနောက် ဘူးသီးတောင်မြို့သိမ်းတိုက်ပွဲ ၁ နှစ်ပြည့် အထိမ်းအမှတ်အဖြစ် ပြီးခဲ့တဲ့ မေလ ၁၈ ရက်နေ့မှာ ပြန်လည်လွတ်ငြိမ်းခွင့် ပေးခဲ့တာပါ။
ULA အနေနဲ့ မြို့သိမ်းတိုက်ပွဲ တနှစ်ပြည့်ချိန်မှာ စစ်သုံ့ပန်းမိသားစုဝင်တွေဖြစ်တဲ့ ရခိုင်၊သက္ကမ၊ ခမီ၊ မြို၊ သက် စတဲ့အိမ်ထောင်စု ၁၀၇ စု ၊လူဦးရေ ၃၁၄ ဦး ကို လွတ်ငြိမ်းခွင့်ပေးခဲ့ပြီး အခုလို လူသားချင်းစာနာမှုဆိုင်ရာ ထောက်ပံ့မှုတွေကိုလည်း ဆက်တိုက်လုပ်ဆောင်နေပါတယ်။
