Border News Agency
ရန်ကုန်၊ မတ် ၃။
အာဏာသိမ်းစစ်တပ်ဟာ အကျဥ်းသားတွေ သောင်းချီပြန်လွတ်ပေးလိုက်တယ်ဆိုပေမယ့် နိုင်ငံရေးအကျဉ်းသားသုံးထောင်ကျော်သာလွတ်လာတယ်လို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM)က မတ် လ ၃ ရက်၊ ဒီနေ့ထုတ်ပြန်ပါတယ်။
အဲဒီနိုင်ငံရေးအကျဉ်းသားတွေဟာ အကျဉ်းထောင် ၃၁ ခုမှအကျဉ်းသား ၃၆၁၃ဦးသာလွတ်လာတယ်လို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်က ဆိုပါတယ်။
အဲဒီအကျဉ်းထောင်တွေမှာ ပုဒ်မ ၅၂ (က)၊ပုဒ်မ ၅၀(ည)နဲ့ ဖမ်းဆီးခံထားရသူအမည်ပါပေမယ့် မလွတ်လာသေးဘူးတယ်လို့ ဆိုပါတယ်။
ဒိုက်ဦးအကျဉ်းထောင်မှာ လွတ်မယ့်သူ ၂၅၀ ဝန်းကျင်ခန့်ရှိပေမယ့် နိုင်ငံရေးအကျဉ်းသားဦးရေနှစ်ရာကျော်ကို မလွတ်ပေးဘဲဆက်အကျဉ်းချထားတယ်လို့ ဆိုပါတယ်။
အဲဒီအပြင် ဒိုက်ဦးထောင်၊ မြင်းခြံထောင်၊ ပေါင်းတည်ထောင်၊ မအူပင်ထောင်၊ အိုးဘိုထောင်၊ အင်းစိန်ထောင်နဲ့အကျဉ်းထောင်အများစုမှာ ၅၀(ည)၊၅၂(က) နဲ့ ဖမ်းဆီးခံထားရသူတွေ မလွတ်သေးဘူးလို့ PPNMက ဆိုပါတယ်။
အဲဒါကြောင့်ပုဒ်မ ၅၀(ည)၊၅၂(က)နဲ့အကျဉ်းကျနေတဲ့ နိုင်ငံရေးအကျဉ်းသားတွေကိုအပါအဝင် တခြားနိုင်ငံရေးပုဒ်မတွေနဲ့ ဖမ်းဆီးခံထားရသူအားလုံးကိုလွတ်ပေးဖို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်က တောင်းဆိုထားပါတယ်။
