Border News Agency
ဒူဘိုင်း၊ မတ် ၅။
ဒေသတွင်းလေပိုင်နက်ပိတ်ထားမှုတွေကြောင့် ဒူဘိုင်းမြို့ကိုအဝင်အထွက်လုပ်မယ့်ခရီးစဉ်အားလုံးကို လာမယ့်မတ်လ ၇ ရက်နေ့ ညသန်းခေါင်အချိန်အထိ ဆက်လက်ရပ်နားထားမယ်လို့ အီးမရိတ်စ် (Emirates) လေကြောင်းလိုင်းက ထုတ်ပြန်ပါတယ်။
အဲဒီလို ခရီးစဉ်တွေရပ်နားထားတာဟာ ခရီးသည်တွေရဲ့ လုံခြုံရေးနဲ့ဘေးကင်းမှုကို အဓိကထားပြီး ကြိုတင်ကာကွယ်တဲ့အနေနဲ့ လုပ်ဆောင်တာဖြစ်တယ်လို့ဆိုပါတယ်။
အစ္စရေးနဲ့ အီရန်တို့ကြား စစ်ရေးတင်းမာမှုတွေကြောင့် ဒေသတွင်းလေပိုင်နက် ကန့်သတ်ချက်တွေရှိနေပြီး လေကြောင်းလိုင်းရဲ့ လုပ်ငန်းဆောင်ရွက်မှုတွေအပေါ် အကြီးအကျယ် ထိခိုက်နေတာလို့ဆိုပါတယ်။
အီးမရိတ်စ်လေကြောင်းလိုင်းအနေနဲ့ လတ်တလော အခြေအနေတွေကို သက်ဆိုင်ရာ အာဏာပိုင်တွေနဲ့အနီးကပ် စောင့်ကြည့်နေတယ်လို့လည်းဆိုပါတယ်။
လေပိုင်နက်တွေပြန်ဖွင့်တာနဲ့ လုပ်ငန်းစဉ်တွေချောချောမွေ့မွေ့ ပြန်စနိုင်ဖို့အတွက်လည်း လိုအပ်တဲ့ ပြင်ဆင်မှုတွေ လုပ်ဆောင်နေတယ်လို့ ဆိုပါတယ်။
အခုလို ခရီးစဉ် ရပ်နားမှုကို ထပ်တိုးလိုက်တာဟာ ဒေသတွင်းလုံခြုံရေးအခြေအနေတွေ ပိုမိုစိုးရိမ်ရလာတာကြောင့်ဖြစ်တယ်လို့ဆိုပါတယ်။
လေကြောင်းလိုင်းဘက်ကတော့ လုံခြုံစိတ်ချရတဲ့ အခြေအနေရောက်တာနဲ့ ခရီးစဉ်တွေကို အမြန်ဆုံး ပြန်လည်စတင်ပေးမယ်လို့ အာမခံထားပါတယ်။
