Border News Agency
အမေရိကန်၊ မတ် ၅။
အီရန်အစိုးရရဲ့ နျူကလီးယား အစီအစဉ်နဲ့ပတ်သက်ပြီး”လူရူးတစ်ယောက်ရဲ့လက်ထဲမှာ နျူကလီးယားလက်နက်ရှိနေရင် ဆိုးဝါးတဲ့ကိစ္စတွေဖြစ်လာလိမ့်မယ်”လို့ အမေရိကန်သမ္မတ ဒေါ်နယ်ထရမ့်ကဝေဖန်ပြောဆိုလိုက်ပါတယ်။
ပြီးခဲ့တဲ့ ရက်အနည်းငယ်က B-2 ဗုံးကြဲလေယာဉ်တွေနဲ့ အီရန်ကိုမတိုက်ခိုက်ခဲ့ရင် အခုအချိန်မှာအီရန်ဟာ နျူကလီးယားလက်နက်ပိုင်ဆိုင်နေလောက်ပြီလို့ ထရမ့်ကဆိုပါတယ်။
အဲဒီအပြင် အီရန်နဲ့ဖြစ်နေတဲ့စစ်ပွဲမှာ လိုအပ်လာမယ်ဆိုရင် မြေပြင်တပ်တွေပါစေလွှတ်ပြီး တိုက်ခိုက်ဖို့ အစီအစဉ်ရှိတယ်လို့လည်း ထရမ့်က New York Times သတင်းစာကို ပွင့်ပွင့်လင်းလင်း ပြောကြားခဲ့ပါတယ်။
“ကျွန်တော်တို့ ရည်မှန်းချက်အောင်မြင်ဖို့ဆိုရင် ဘယ်လိုနည်းလမ်းမျိုးကိုမဆိုသုံးဖို့ အသင့်ပဲ”လို့ ထရမ့်က ဆိုထားတာကြောင့် အီရန်မြေပေါ်မှာ မြေပြင်စစ်ပွဲကြီး တကယ်ဖြစ်လာတော့မလားဆိုပြီး စိုးရိမ်မှုတွေမြင့်တက်နေပါတယ်။
အမေရိကန်နဲ့ အစ္စရေးကအီရန်မြို့တော် တဟီရန်ကိုလေကြောင်းကနေ အပြင်းအထန်ဗုံးကြဲနေပေမယ့် အီရန်ရဲ့ ဒုံးကျည်စခန်းတွေကို အမြစ်ပြတ်အောင်လုပ်ဖို့ လေကြောင်းတိုက်ခိုက်မှုတင် မလုံလောက်ဘူးဆိုရင် မြေပြင်ကနေ ကျူးကျော်ဝင်ရောက်ဖို့အထိ ထရမ့်ကပြင်ဆင်ထားတာပါ။
အမေရိကန်စစ်တပ်ဘက်ကလည်း အရှေ့အလယ်ပိုင်းကစခန်းတွေမှာ အင်အားတွေဆက်တိုက်ဖြည့်တင်းနေပါတယ်။
အိမ်ဖြူတော်နဲ့ စစ်ဌာနချုပ်တို့ဟာ ဒီမြေပြင်စစ်ဆင်ရေးအတွက် ဗျူဟာတွေကိုအသေးစိတ်တိုင်ပင်နေကြပြီလို့ သတင်းတွေ ထွက်ပေါ်နေပါတယ်။
အီရန်ဘက်ကလည်း သူတို့နိုင်ငံထဲခြေတလှမ်း လှမ်းဝင်လာတာနဲ့ အပြင်းအထန်ပြန်တိုက်မယ်လို့ ကြိမ်းဝါးထားတာကြောင့် အခြေအနေဟာတော်တော်လေးတင်းမာနေပါတယ်။
အမေရိကန်ဟာ အီရန်အပေါ် စစ်ရေးအရ အသာစီးရတဲ့အခြေအနေမှာရှိနေပြီး အင်အားတောင့်တင်းတာကို ပြသနိုင်ခဲ့တဲ့အတွက် ဂုဏ်ယူမိတယ်လို့လည်း ထရမ့်ကပြောကြားခဲ့ပါတယ်။
အဲဒါကြောင့် နောက်ထပ်နှစ်ပတ်လောက်အထိထပ်စောင့်နေမယ်ဆိုရင်လည်း အခြေအနေတွေကပိုဆိုးသွားနိုင်တယ်လို့ သူကဆိုပါတယ်။
