Border News Agency
စစ်ကိုင်း၊ မတ် ၁၁။
စစ်ကိုင်းတိုင်း၊ ယင်းမာပင်ခရိုင် အမှတ် ၂၀ တပ်ရင်းက ရဲမေတဦး လိင်ပိုင်းဆိုင်ရာကျူးလွန်ခံရတဲ့ ဖြစ်စဉ်နဲ့ ပတ်သက်ပြီး ကျူးလွန်သူတွေကို ဥပဒေနဲ့အညီထိရောက်စွာ အရေးယူသွားမယ်လို့ အမျိုးသားညီညွတ်ရေးအစိုးရ (NUG)၊ ကာကွယ်ရေးဝန်ကြီးဌာနက ဒမတ်လ ၁၁ ရက်၊ ဒီနေ့မှာ ထုတ်ပြန်ပါတယ်။
ဒီအမှုဟာ အွန်လိုင်းပေါ်မှာပျံ့နှံ့နေတဲ့အမှုဖြစ်ပေမယ့် NUG ကာကွယ်ရေးဝန်ကြီးဌာနအနေနဲ့ အွန်လိုင်းပေါ်မှာသတင်းမတက်ခင်ကတည်းက လိုအပ်တဲ့စစ်ဆေးမေးမြန်းမှုတွေကို စတင်လုပ်ဆောင်ခဲ့တာဖြစ်တယ်လို့ ဆိုပါတယ်။
လက်ရှိမှာတော့ သက်ဆိုင်ရာတပ်ရင်းက တပ်ရင်းမှူး၊ ဒုတပ်ရင်းမှူးနဲ့ သံသယရှိသူတွေကို ထိန်းသိမ်းထားပြီး ဖြစ်သလိုအမှုမှန်ပေါ်ပေါက်ရေးအတွက် အသေအချာကိုင်တွယ်နေတယ်လို့ဆိုပါတယ်။
အဲဒီအပြင် ဖြစ်စဉ်ဖြစ်ပွားခဲ့တဲ့ ပုလဲနယ်မြေကသက်သေတွေကိုလည်း စစ်ဆေးနိုင်ဖို့အတွက် လွှဲပြောင်းပေးဖို့ ညွှန်ကြားထားပြီးဖြစ်တယ်လို့ဆိုပါတယ်။
နစ်နာသူနဲ့ သံသယရှိသူတွေဟာ စစ်ဘက်ဆိုင်ရာဥပဒေတွေကို လိုက်နာရမယ့်သူတွေဖြစ်တာကြောင့် စစ်ဘက်လုပ်ထုံးလုပ်နည်းအတိုင်း ဖမ်းဆီးစစ်ဆေးတာတွေကို လုပ်ဆောင်နေတယ်လို့လည်းဆိုပါတယ်။
NUG အနေနဲ့ နစ်နာသူနဲ့ သက်သေတွေရဲ့ ဘေးကင်းလုံခြုံရေး၊ အဆင်ပြေချောမွေ့စေရေးအတွက် အကောင်းဆုံး စီစဉ်ပေးသွားမှာဖြစ်သလို အမှုမှန်ပေါ်ပေါက်ရေးအတွက်လည်း အစွမ်းကုန်ဆောင်ရွက်သွားမယ်လို့ ဆိုပါတယ်။
ကျူးလွန်သူတွေကိုတော့ ဥပဒေနဲ့အညီ ထိရောက်စွာအရေးယူသွားမှာဖြစ်ပြီး လူ့အခွင့်အရေးချိုးဖောက်မှုတွေအပေါ်မှာလည်း အလေးထားကိုင်တွယ်သွားမယ်လို့လည်း ဆိုပါတယ်။
