Border News Agency
အမ်း၊ မတ် ၁၃။
အာရက္ခတပ်တော်(AA)ထိန်းချုပ်ထားတဲ့ အမ်းမြို့နယ်၊ ဒါးလက်ချောင်းဒေသမှာရှိတဲ့ စစ်သုံ့ပန်းအကျဉ်းစခန်းကို စစ်ကော်မရှင်တပ်က လေကြောင်းတိုက်ခိုက်ခဲ့လို့ AA ဆီအလင်းဝင်ရောက်ထားတဲ့ ဆရာဝန် ၂ ဦး သေဆုံးပြီး ၁ ဦး ပြင်းထန်ဒဏ်ရာရသွားတယ်လို့ သိရပါတယ်။
အဲဒီဒါးလက်ချောင်းဒေသမှာရှိ စစ်သုံ့ပန်းစခန်းကို မတ်လ ၈ ရက်နေ့က စစ်ကော်မရှင်တပ်ရဲ့ ၃ နာရီကြာလေကြောင်းတိုက်ခိုက်မှုအတွင်း အခုလိုသေဆုံးခဲ့တာဖြစ်ပါတယ်။
အဲဒီခွဲစိတ်ခန်းကျွမ်းကျင်သူနာပြု ဗိုလ်ကြီးဖြိုးသူရိန်အေးနဲ့ ဓာတ်မှန်ပါရဂူဗိုလ်ကြီးအောင်အောင်ဆက်တို့ သေဆုံးသွားခဲ့တာဖြစ်ပါတယ်။
အဲဒီအပြင် ဒဏ်ရာအပြင်းအထန်ရသွားသူကတော့ အရိုး၊ အကြော၊ အဆစ် အထူးကုဆရာဝန် ဗိုလ်ကြီးဟန်ဝင်းဆွေဖြစ်ပါတယ်။
သူတို့ဟာ အနောက်ပိုင်းတိုင်းစစ်ဌာနချုပ်(နပခ)ကျခါနီးမှာ AA ဆီ အလင်းဝင်ရောက်ခဲ့ကြသူတွေဖြစ်ပြီး လက်ရှိမှာအာရက္ခတပ်တော်ရဲ့ဆေးတပ်ဖွဲ့မှာ တာဝန်ထမ်းဆောင်နေကြသူတွေ ဖြစ်ပါတယ်။
အဲဒီဗိုလ်ကြီး ဟန်ဝင်းဆွေဟာ စခန်းအတွင်းကလူနာတွေကို လိုက်လံကယ်ထုတ်ပေးနေတုန်း ဗုံးစထိမှန်ခဲ့တာဖြစ်ပြီး မျက်စိနဲ့နားတွေမှာ သွေးယိုစိမ့်တဲ့ ဒဏ်ရာတွေနဲ့ အရေးပေါ်ဆေးကုသမှုခံယူနေရပါတယ်။
အဲဒီသေဆုံးသွားတဲ့ ဆရာဝန် ၂ ဦးကတော့ စခန်းအတွင်း တာဝန်ထမ်းဆောင်နေချိန်မှာပဲ ဗုံးထိမှန်သေဆုံးခဲ့တာဖြစ်ပါတယ်။
ဒီဒါးလက်ချောင်း စစ်သုံ့ပန်းစခန်းကို စစ်ကော်မရှင်တပ်ကရွယ်ရည်ချက်ရှိရှိလေကြောင်းတိုက်ခိုက်ခဲ့လို့ စစ်သုံ့ပန်း ၁၁၆ ဦး သေဆုံးပြီး ၃၂ ဦးဒဏ်ရာရခဲ့တယ်လို့ AA က ထုတ်ပြန်ထားပါတယ်။
သေဆုံးသူတွေထဲမှာ အရပ်သားသုံ့ပန်းတချို့လည်း ပါဝင်နေတယ်လို့သိရပါတယ်။
အဲဒီသေဆုံး၊ ဒဏ်ရာရသွားတဲ့ဆရာဝန်တွေဟာ အလင်းဝင်ပြီးနောက်ပိုင်း ဒေသခံတွေနဲ့သုံ့ပန်းတွေကို ကျန်းမာရေးစောင့်ရှောက်မှုပေးနေကြသူတွေဖြစ်ပါတယ်။
