Border News Agency
ဒူဘိုင်း၊ မတ် ၁၇။
ယူအေအီးနိုင်ငံအတွင်းကို အီရန်ဘက်ကနေပစ်လွှတ်လိုက်တဲ့ ဘလက်စတစ်မစ်ဆိုင်းဒုံး ၆ စင်းနဲ့ ဒရုန်း ၂၁ စင်းကို ကြားဖြတ်ဖျက်ဆီးနိုင်ခဲ့တယ်လို့ ယူအေအီးလေကြောင်းကာကွယ်ရေးတပ်ဖွဲ့က မတ်လ ၁၆ ရက်၊မနေ့ကထုတ်ပြန်ပါတယ်။
အဲဒီတိုက်ခိုက်မှုဟာ ယူအေအီးကို ပစ်မှတ်ထားတဲ့ဒေသတွင်းတိုက်ခိုက်မှုတွေထဲက နောက်ဆုံးဖြစ်ရပ်ဖြစ်ပြီး မတ်လ ၁၀ ရက်နေ့ကလည်းဘလက်စတစ်ဒုံးကျည် ၉ စင်းနဲ့ ဒရုန်း ၃၅ စင်းကို လေကြောင်းကာကွယ်ရေးစနစ်တွေကနေ ကြားဖြတ်ဟန့်တားခဲ့တယ်လို့ဆိုပါတယ်။
အဲဒီမပြင် မတ်လ ၁၀ ရက်နေ့ကလည်းဒုံးကျည် ၈စင်းနဲ့ ဒရုန်း ၂၆ စင်းကို ပစ်ချနိုင်ခဲ့ပေမဲ့ ဒရုန်း ၉ စင်းကတော့ ယူအေအီးပိုင်နက်ထဲကိုကျရောက်ပျက်စီးခဲ့တာကြောင့် လက်ရှိမှာလုံခြုံရေးတပ်ဖွဲ့တွေကို အမြင့်ဆုံးအဆင့် သတိပေးချက် ထုတ်ပြန်ထားရတာပါ။
အီရန်ရဲ့တိုက်ခိုက်မှုတွေ စတင်ခဲ့ကတည်းက ယူအေအီးလေကြောင်းကာကွယ်ရေးအဖွဲ့ဟာ ဘလက်စတစ်မစ်ဆိုင်းဒုံး ၃၀၄ စင်း၊ရွှေ့လျားမစ်ဆိုင်းဒုံး ၁၅ စင်းနဲ့ ဒရုန်းပေါင်း ၁,၆၂၇ စင်းအထိကို ကြားဖြတ်ဟန့်တားနိုင်ခဲ့တယ်လို့ ဆိုပါတယ်။
နိုင်ငံတော်ရဲ့ဝေဟင်ပိုင်နက်ကို ကာကွယ်ဖို့အတွက် လေကြောင်းကာကွယ်ရေးတပ်ဖွဲ့တွေက အမြဲတမ်း အသင့်ရှိနေကြောင်းနဲ့ အမျိုးသားလုံခြုံရေးအတွက် အမြင့်ဆုံးအဆင့် ပြင်ဆင်ထားတယ်လို့ အာဏာပိုင်တွေက အလေးပေးပြောဆိုထားပါတယ်။
ယူအေအီးကာကွယ်ရေးဝန်ကြီးဌာနကလည်း နိုင်ငံရဲ့ အချုပ်အခြာအာဏာနဲ့ တည်ငြိမ်ရေးကို ထိပါးလာမယ့် ဘယ်လိုခြိမ်းခြောက်မှုကိုမဆို ပြတ်ပြတ်သားသားဆက်လက်တုံ့ပြန်သွားမှာဖြစ်ပြီး အမျိုးသားအကျိုးစီးပွားကို အကာအကွယ်ပေးသွားမယ်လို့လည်းဆိုပါတယ်။
