Border News Agency
အမေရိကန်၊ မတ် ၂၂။
အမေရိကန်ကသာ အီရန်နိုင်ငံထဲကလျှပ်စစ်စက်ရုံတွေကို လေကြောင်းကနေတိုက်ခိုက်မယ်ဆိုရင် ပါရှန်ပင်လယ်ကွေ့ဒေသမှာရှိတဲ့ အမေရိကန်နဲ့ပတ်သက်နေတဲ့စွမ်းအင်ကဏ္ဍတွေကို ပြန်လည်တိုက်ခိုက်သွားမယ်လို့ အီရန်ကသတိပေးလိုက်ပါတယ်။
အဲဒီအီရန်ရဲ့လောင်စာဆီနဲ့ စွမ်းအင်ကဏ္ဍတွေကိုတိုက်ခိုက်လို့ အရပ်သားတွေထိခိုက်မယ်ဆိုရင် ဒေသတွင်းကအမေရိကန်ပစ်မှတ်တွေကို ပြန်တိုက်မယ်လို့ အီရန်ရဲ့ Khatam al-Anbiya စစ်ဌာနချုပ်က ထုတ်ပြန်ထားပါတယ်။
ဒီသတိပေးချက်ဟာ အမေရိကန်သမ္မတ ဒေါ်နယ်ထရန့်ရဲ့ပြောကြားချက်အပြီးမှာ ထွက်ပေါ်လာတာပါ။
သမ္မတထရန့်က ဟော်မုဇ်ရေလက်ကြားကို ခြိမ်းခြောက်မှုမရှိဘဲ ၄၈ နာရီအတွင်း အပြည့်အဝပြန်မဖွင့်ပေးဘူးဆိုရင် အီရန်ရဲ့အကြီးဆုံးလျှပ်စစ်စက်ရုံတွေကနေစတင်ပြီး အဆင့်ဆင့်ဖျက်ဆီးပစ်မယ်လို့ ဖိအားပေးပြောဆိုထားပါတယ်။
အီရန်ဘက်ကတော့ ပါရှန်ပင်လယ်ကွေ့ဒေသတွင်းက အမေရိကန်နဲ့သူ့ရဲ့မဟာမိတ်တွေ ပိုင်ဆိုင်တဲ့စွမ်းအင်ကဏ္ဍတွေ၊ နည်းပညာစနစ်တွေနဲ့ ရေချိုထုတ်လုပ်တဲ့ စက်ရုံတွေကို ပြန်လည်ပစ်မှတ်ထား တိုက်ခိုက်သွားမယ်လို့တုံ့ပြန်ထားပါတယ်။
ဒါဟာ အရပ်သားတွေအပေါ်သက်ရောက်မှုရှိလာနိုင်တဲ့တိုက်ခိုက်မှုတွေအတွက် အီရန်ရဲ့ လက်တုံ့ပြန်မှုဖြစ်လာမှာပါ။
အရှေ့အလယ်ပိုင်းဒေသရဲ့ တင်းမာမှုတွေဟာ အမြင့်ဆုံးအခြေအနေကို ရောက်ရှိနေပြီး ဒါဟာကမ္ဘာ့စွမ်းအင်လုံခြုံရေးနဲ့ ပါရှန်ပင်လယ်ကွေ့ဒေသရဲ့ တည်ငြိမ်မှုအပေါ်မှာလည်းကြီးမားတဲ့ သက်ရောက်မှုတွေရှိလာနိုင်တယ်လို့ စစ်ရေးလေ့လာသူတွေက သုံးသပ်နေကြပါတယ်။
