Border News Agency
မီဇိုရမ်၊ မတ် ၂၃။
အိန္ဒိယနိုင်ငံ၊ မီဇိုရမ်ပြည်နယ်၊ ဆိုင်ဟာခရိုင်အတွင်းကစက်သုံးဆီတွေကို အိမ်နီးချင်းမြန်မာနိုင်ငံဘက်သို့ တရားမဝင်ခိုးထုတ်ရောင်းချနေတာတွေကို ထိရောက်စွာ အရေးယူသွားမယ်လို့ ခရိုင်အုပ်ချုပ်ရေးမှူးက မတ်လ ၂၀ ရက်နေ့မှာ အမိန့်ထုတ်ပြန်လိုက်ပါတယ်။
ဆိုင်ဟာခရိုင်အတွင်းရှိ စက်သုံးဆီအရောင်းဆိုင်အချို့မှာ ဆီတွေကိုအစုလိုက်အပြုံလိုက်ဝယ်ယူပြီး မြန်မာနိုင်ငံဘက်ကို ပြန်လည်ရောင်းချနေတာကြောင့် ဒေသတွင်းမှာဆီပြတ်လပ်မှုတွေဖြစ်ပေါပြီး ပြည်သူတွေအခက်တွေ့နေရတာကို တားဆီးဖို့အခုလို အမိန့်ထုတ်ပြန်ရတာလို့ဆိုပါတယ်။
အဲဒီအမိန့်အရ စက်သုံးဆီဆိုင်တွေအနေနဲ့ အစိုးရသတ်မှတ်ဈေးနှုန်းထက်ပိုမိုရောင်းချတာ ဒါမှမဟုတ် မှောင်ခိုဈေးကွက်ထဲကိုလွှဲပြောင်းရောင်းချတာမျိုး လုံးဝမပြုလုပ်ဖို့တားမြစ်ထားပါတယ်။
ဒါ့အပြင် ဓာတ်ဆီ ၅၀၀ လီတာနဲ့ ဒီဇယ် ၁,၀၀၀ လီတာထက်ပိုမိုဝယ်ယူလိုပါက သက်ဆိုင်ရာကထုတ်ပေးထားတဲ့ သိုလှောင်ခွင့်ပါမစ်ရှိသူတွေကိုသာ ရောင်းချပေးရမှာဖြစ်ပြီး ခွင့်ပြုချက်မရှိဘဲအများအပြားရောင်းချတာကို ကန့်သတ်လိုက်ပါတယ်။
စက်သုံးဆီတွေကို မြန်မာနိုင်ငံအပါအဝင်အခြားနေရာတွေကို တရားမဝင်တင်ပို့ရောင်းချတာကို လုံးဝတားမြစ်ထားပြီး အကယ်လို့ဖောက်ဖျက်ကျူးလွန်တာ စစ်ဆေးတွေ့ရှိပါက အိန္ဒိယနိုင်ငံရဲ့သစ်လွင်တဲ့ ပြစ်မှုဆိုင်ရာဥပဒေအရ ပြင်းထန်စွာအရေးယူသွားမှာဖြစ်ပါတယ်။
အဲဒီတားမြစ်မိန့်ဟာ မတ်လ ၂၀ ရက်နေ့ကစပြီး ချက်ချင်းအသက်ဝင်မှာဖြစ်ကာ လာမယ့်နှစ်လအထိအတည်ဖြစ်တယ်လို့သိရပါတယ်။
အခုလိုမီဇိုရမ်ဘက်က ဆီတင်ပို့မှုကန့်သတ်လိုက်တာဟာ နယ်စပ်ဖြတ်ကျော်ကုန်သွယ်မှုတွေနဲ့ ဒေသတွင်းဆီဈေးကွက်အပေါ် သက်ရောက်မှုရှိလာနိုင်ပါတယ်။
