Border News Agency
အမေရိကန်၊ မတ် ၂၅။
အမေရိကန် သမ္မတ ဒေါ်နယ်ထရန့် က အီရန်နဲ့ ဖြစ်ပွားနေတဲ့စစ်ပွဲကို အဆုံးသတ်ဖို့အတွက် အချက် ၁၅ ချက်ပါတဲ့ ငြိမ်းချမ်းရေး အဆိုပြုလွှာကို ပါကစ္စတန်ကတဆင့် ပေးပို့လိုက်တယ်လို့ The New York Times သတင်းမှာ ဖော်ပြထားပါတယ်။
အဲဒီအဆိုပြုချက်ထဲမှာ နှစ်ဖက်ဆွေးနွေးမှုတွေ စတင်နိုင်ဖို့အတွက် အရင်ဆုံး တလကြာ အပစ်အခတ် ရပ်စဲရေးလုပ်ဖို့ ပါဝင်ပြီး အပြန်အလှန်အားဖြင့်အီရန်အပေါ် ချမှတ်ထားတဲ့ စီးပွားရေး ပိတ်ဆို့မှုအားလုံးကို ပြန်ရုပ်သိမ်းပေးမယ်လို့ ဆိုပါတယ်။
နျူကလီးယား ကိစ္စနဲ့ ပတ်သက်ရင်တော့ အီရန်ရဲ့စီမံကိန်းတွေကို လျှပ်စစ်ထုတ်လုပ်ဖို့လိုမျိုး ငြိမ်းချမ်းတဲ့ ရည်ရွယ်ချက်အတွက်ပဲ အမေရိကန်က ကူညီမှာဖြစ်ပြီး လက်နက်လုပ်လို့ရတဲ့ယူရေနီယံ သန့်စင်မှုတွေကိုတော့ လုံးဝ ခွင့်မပြုတော့ပါဘူး။
ဒါ့အပြင် အီရန်ရဲ့ အဓိက နျူကလီးယား စက်ရုံကြီးတွေဖြစ်တဲ့ Natanz၊ Isfahan နဲ့ Fordow ကို လုပ်ငန်းတွေရပ်ခိုင်းပြီး နောင်မှာ ဖျက်သိမ်းဖို့နဲ့ သန့်စင်ပြီးသား ယူရေနီယံတွေကိုလည်း IAEA ထံ လွှဲပေးဖို့ တောင်းဆိုထားပါတယ်။
ဒုံးကျည် စီမံကိန်းတွေကိုလည်း အရေအတွက်နဲ့ ပစ်ခတ်နိုင်တဲ့ အကွာအဝေးကို ကန့်သတ်ဖို့ နောက်ပိုင်းမှာဆွေးနွေးသွားမှာ ဖြစ်သလို နိုင်ငံတကာကနေ လာရောက် စောင့်ကြည့် စစ်ဆေးတာတွေကိုလည်း အီရန်ဘက်က လက်ခံရမှာ ဖြစ်ပါတယ်။
အခုချိန်ထိတော့ အီရန်ဘက်က ဒီကမ်းလှမ်းချက်ကို တစုံတရာ ပြန်မပြောသေးဘဲ စစ်ပွဲအတွင်း ထိခိုက်ခဲ့တာတွေအတွက် စစ်လျော်ကြေးပေးဖို့ကိုပဲ အဓိက တောင်းဆိုနေတယ်လို့ သိရပါတယ်။
