Border News Agency
ပဲခူး၊ မတ် ၂၆။
ပဲခူးတိုင်းအနောက်ခြမ်း၊ မင်းလှမြို့နယ်အတွင်းမှာ စစ်ကြောင်းထိုးပြီး ပြန်ဆုတ်လာတဲ့ စစ်ကော်မရှင်တပ်ကို မတ်လ ၂၄ ရက်နေ့က မိုင်းဆွဲတိုက်ခိုက်ခဲ့ရာ ၂ ဦး သေဆုံးခဲ့တယ်လို့ ပဲခူးတိုင်းစစ်ဌာနက ထုတ်ပြန်ပါတယ်။
အဲဒီအင်အား ၅၀ ခန့်ပါတဲ့ စစ်ကော်မရှင်တပ်စစ်ကြောင်းဟာ တာကလေးကျေးရွာကနေ ဗိုလ်တထောင်ရွာဘက်ကို စစ်ကြောင်းထိုးပြီးအပြန် ဗမာစုရွာအနီးမှာ မိုင်းဆွဲတိုက်ခိုက်ခံခဲ့ရတာပါ။
အဲဒီတိုက်ခိုက်မှုကို သာယာဝတီခရိုင် တပ်ရင်း-၃ (Myanmar Defense Force) က လုပ်ဆောင်ခဲ့တာဖြစ်ပြီး စစ်ကော်မရှင်တပ်က ၂ ဦး သေဆုံးတဲ့အပြင် တခြား ၃ ဦးလည်း ဒဏ်ရာအပြင်းအထန်ရရှိခဲ့ပါတယ်လို့ဆိုပါတယ်။
မိုင်းဆွဲခံရပြီးနောက် စစ်ကော်မရှင်တပ်ဘက်က လက်နက်ကြီး၊ လက်နက်ငယ်တွေနဲ့ပစ်ခတ်ခဲ့ပေမယ့် တော်လှန်ရေးရဲဘော်တွေဘက်ကတော့ အထိအခိုက်မရှိဘဲ ဘေးကင်းရာကို ပြန်လည်ဆုတ်ခွာနိုင်ခဲ့တယ်လို့ဆိုပါတယ်။
