Border News Agency
အညာ၊ မတ်လ ၂၆ ။
ဗမာပြည်သူ့လွတ်မြောက်ရေးတပ်တော်(BPLA)ရဲ့အညာစစ်ဒေသက ရဲဘော်တွေအတွက်ဂုဏ်ပြုပွဲအခမ်းအနားကို ပြီးခဲ့တဲ့ ဖေဖော်ဝါရီလ ၉ ရက်နေ့က ကျင်းပပြုလုပ်ခဲ့ပါတယ်။
အဲဒီအခမ်းအနားဟာ ပဲခူးအနောက်ခြမ်း၊ ပြည်ခရိုင်အတွင်းက ပန်းတောင်းနယ်မြေစစ်ဆင်ရေးနဲ့ ကပစ ၁၆ အနီးတိုက်ပွဲတွေမှာ အာရက္ခတပ်တော်(AA)နဲ့အတူ လက်တွဲတိုက်ပွဲဝင်ခဲ့ကြတဲ့ BPLA အမှတ် ၃၀၈ ဗျူဟာကရဲဘော်တွေကို ဂုဏ်ပြုတဲ့ပွဲလည်းဖြစ်ပါတယ်။
အခမ်းအနားအတွင်းမှာ တိုက်ခိုက်ရေး၊ အုပ်ချုပ်ရေးနဲ့ အမိန့်နာခံမှုကောင်းမွန်တဲ့ ထူးချွန်ရဲဘော်တွေကို ဆုတွေပေးအပ်ခဲ့သလို တိုက်ပွဲအတွင်းကိုယ်လက်အင်္ဂါ စွန့်လွှတ်ခဲ့ရတဲ့ ရဲဘော်တွေကိုလည်း သူရဲကောင်းဆုတွေချီးမြှင့်ခဲ့ပါတယ်။
ဒါ့အပြင်ကျဆုံးသွားခဲ့ရတဲ့ အာဇာနည်ရဲဘော်တွေကိုလည်း မှတ်တမ်းတင်ဂုဏ်ပြုခဲ့ပြီး သူတို့ရဲ့မိသားစုဝင်တွေထံ ဂုဏ်ပြုမှတ်တမ်းနဲ့ ထောက်ပံ့ငွေတွေ ပေးအပ်ခဲ့တယ်လို့ သိရပါတယ်။
ခုချိန်မှာလည်း AA နဲ့အတူ ပူးပေါင်းပြီး ကပစ ၁၆ အနီးက စစ်ဆင်ရေးတွေမှာ BPLA မြေလတ်စစ်ဒေသ၊ အမှတ် ၂၀၃ ဗျူဟာက ဆက်လက်ပါဝင်တိုက်ခိုက်နေပါတယ်။
ပြီးခဲ့တဲ့ဖေဖော်ဝါရီလအတွင်းက ပွိုင့် ၆၆၆ စခန်းကုန်းကိုထပ်မံသိမ်းပိုက်နိုင်ခဲ့တဲ့ တိုက်ပွဲမှာလည်း BPLA ရဲဘော်တွေပါဝင်ခဲ့တာပါ။
BPLA အနေနဲ့ တောင်ပိုင်း၊ မြေလတ်နဲ့ အညာဆိုပြီး စစ်ဒေသ ၃ ခုနဲ့ စနစ်တကျဖွဲ့စည်းတည်ဆောက်ထားပြီး မဟာမိတ်တပ်တွေနဲ့အတူ ဖက်ဆစ်စစ်တပ်ကို အဆုံးထိ ဆက်လက်တိုက်ပွဲဝင်သွားမယ်လို့ဆိုပါတယ်။
