Border News Agency
နေပြည်တော်၊ မတ် ၂၈။
နယ်မြေလုံခြုံရေးအတွက် ပြည်သူ့စစ်မှုထမ်းစနစ်ကို ဥပဒေနဲ့အညီဆက်လုပ်သွားမယ်လို့ အာဏာသိမ်းစစ်ခေါင်းဆောင်မင်းအောင်လှိုင်ကပြောပါတယ်။
နေပြည်တော်မှာ မတ်လ ၂၇ ရက်၊ မနေ့ကတပ်မတော်နေ့ကျင်းပခဲ့ပြီး အဲဒီအခမ်းအနားမိန့်ခွန်းမှာပြောတာပါ။
အဲဒီပြည်သူ့လုံခြုံရေးစနစ်အောင်မြင်ဖို့အတွက် မြို့နယ်၊ ရွက်ကွက်နဲ့ကျေးရွာတွေအလိုက် ပြည်သူ့ကာကွယ်ရေးအဖွဲ့တွေကို စနစ်တကျလေ့ကျင့်ဖွဲ့စည်းပြီး အရှိန်အဟုန်နဲ့ဆောင်ရွက်နေတယ်လို့ သူကဆိုပါတယ်။
အဲဒီအပြင်နိုင်ငံလုံခြုံရေးမှာ ပြည်သူတဦးချင်းစီရဲ့လူမှုစီးပွားဘဝနဲ့ အသက်အိုးအိမ်စည်းစိမ်လုံခြုံဖို့ကအခြေခံအကျဆုံးဖြစ်တာကြောင့် ပြည်သူတွေအ
နေနဲ့လုံခြုံရေးလုပ်ငန်းစဉ်တွေမှာ စဉ်ဆက်မပြတ်ပူးပေါင်းဖို့လိုအပ်တယ်လို့ဆိုပါတယ်။
ဒါပေမယ့်စစ်ကော်မရှင်တပ်ဟာ မြေပြင်မှာအရွယ်ရောက်ပြီးသူတွေကို အဓမ္မစုဆောင်းနေသလို လူငယ်အမြောက်အမြားဟာလည်း အဲဒီစနစ်ကြောင့် နေရပ်စွန့်ခွာ ထွက်ပြေးနေကြရတာပါ။
အတင်းအဓမ္မဖမ်းဆီးခေါ်ဆောင်မှုတွေနဲ့ ပေါ်တာဆွဲတာတွေကြောင့် ပြည်သူတွေဟာစိုးရိမ်ထိတ်လန့်မှုတွေနဲ့ နေထိုင်နေကြရတယ်လို့ ဆိုကြပါတယ်။
အဲဒီအပြင် လုံခြုံရေးအတွက်ဆိုပြီး ရပ်ကွက်နဲ့ကျေးရွာတွေမှာ ပြည်သူ့စစ်အမည်ခံအဖွဲ့တွေကို အတင်းအကျပ်ဖွဲ့စည်းခိုင်းနေတာဟာ ဒေသခံတွေရဲ့လူမှုစီးပွားဘဝကို ပိုထိခိုက်စေတယ်လို့လည်း လူ့အခွင့်အရေးစောင့်ကြည့်သူတွေက ထောက်ပြနေကြပါတယ်။
