Border News Agency
စစ်ကိုင်း၊ ဧပြီ ၁။
စစ်ကိုင်းတိုင်း၊ တန့်ဆည်အချုပ်ခန်းမှာ ၃ နှစ်ကျော်ကြာမတရားဖမ်းဆီးခံထားရတဲ့ အသက် ၅၄ နှစ်အရွယ် နိုင်ငံရေးအကျဉ်းသူမသက်သက်မာဟာ ဆေးဝါးကုသခွင့်မရရှိတာကြောင့် မတ်လ ၂၇ ရက်နေ့ကကျဆုံးသွားတယ်လို့ နိုင်ငံရေးအကျဉ်းသားများကွန်ရက် (PPNM) က ထုတ်ပြန်ပါတယ်။
မသက်သက်မာဟာ စာရေးဆရာရန်ငြိမ်းသူရဲ့ဇနီးဖြစ်ပြီး ခင်ပွန်းဖြစ်သူကိုရှာမတွေ့တာကြောင့် သူမနဲ့သားဖြစ်သူကို စစ်ကော်မရှင်တပ်က ဓားစာခံအဖြစ် ဖမ်းဆီးသွားခဲ့တာပါ။
သူမကို ပုဒ်မ ၃ ခုနဲ့ ထောင်ဒဏ် အနှစ် ၂၀ အမိန့်ချမှတ်ထားတာဖြစ်ပါတယ်။
သူမဟာ အချုပ်ခန်းအတွင်း သွေးလေးဘက်နာရောဂါ ပြင်းထန်လာလို့ပြင်ပဆေးရုံမှာ ကုသခွင့်တောင်းဆိုခဲ့ပေမဲ့ အာဏာပိုင်တွေကငြင်းဆန်ပိတ်ပင်ခဲ့တာကြောင့် အခုလိုအသက်ဆုံးရှုံးခဲ့ရတာဖြစ်ပါတယ်။
လမ်းခရီးမှာတိုက်ခိုက်ခံရမှာစိုးလို့ဆိုတဲ့ အကြောင်းပြချက်နဲ့သူမကိုထောင်ကိုမပြောင်းဘဲ တန့်ဆည်အချုပ်ခန်းထဲမှာပဲ ၃ နှစ်ကျော်ပိတ်လှောင်ထားခဲ့တာပါ။
အခုလိုကျဆုံးသွားတဲ့အခါမှာလည်း သူမရဲ့ရုပ်အလောင်းကို မိသားစုထံပြန်လည်ပေးအပ်တာမရှိဘူးလို့ဆိုပါတယ်။
PPNMကတော့ အခုလိုဓားစာခံအဖြစ်ဖမ်းဆီးတာနဲ့ ဆေးကုသခွင့်ပိတ်ပင်တာတွေကို ပြင်းထန်စွာရှုံ့ချလိုက်ပြီး ကျန်ရှိနေတဲ့နိုင်ငံရေးအကျဉ်းသားတွေရဲ့ အသက်အန္တရာယ်အတွက် နိုင်ငံတကာကအလေးထားစောင့်ကြည့်ပေးဖို့ တောင်းဆိုထားပါတယ်။
