Border News Agency
အမ်း၊ ဧပြီ ၁။
အမ်းမြို့ပေါ်မှာ တရားမဝင် တင်သွင်းရောင်းချနေတဲ့ ပြည်ပအရက်နဲ့ ဘီယာတွေကို အာရက္ခပြည်သူ့တော်လှန်ရေးအစိုးရရဲ့ (DLEPS) တပ်ဖွဲ့ဝင်တွေကမကြာသေးမီရက်ပိုင်းအတွင်းကဝင်ရောက်ဖမ်းဆီးခဲ့ပါတယ်။
အဲဒီမြို့နယ် DLEPS ဌာနနဲ့ အုပ်ချုပ်ရေးအဖွဲ့တွေ ပူးပေါင်းပြီး မြို့ပေါ်က ကုန်စုံဆိုင်နဲ့ စားသောက်ဆိုင်တွေကို ဝင်ရောက်စစ်ဆေးခဲ့ရာမှာ ABC၊ ANDAMAN ဘီယာဗူးတွေအပြင် Grand Royal အပါအဝင် အရက်ပုလင်း အမြောက်အမြားကို သိမ်းဆည်းရမိခဲ့တာပါ။
အဲဒီသိမ်းဆည်းရရှိထားတဲ့ ပြည်ပအရက်နဲ့ ဘီယာတွေကို သက်ဆိုင်ရာဌာနက စနစ်တကျ သိမ်းဆည်းထားပြီး တရားမဝင် ရောင်းချသူတွေကိုလည်း ဥပဒေနဲ့အညီ ထိထိရောက်ရောက် အရေးယူဆောင်ရွက်သွားမယ်လို့ သိရပါတယ်။
အာရက္ခပြည်သူ့တော်လှန်ရေးအစိုးရအနေနဲ့ ၂၀၂၄ ခုနှစ်၊စက်တင်ဘာလကတည်းက အာရက္ခဒေသအတွင်းပြည်ပအရက်၊ ဘီယာနဲ့ ဝိုင် တင်သွင်းရောင်းချတာတွေကို ပိတ်ပင်ထားတာ ဖြစ်ပါတယ်။
အခုလို စစ်ဆေးဖမ်းဆီးမှုတွေကို အမ်းမြို့မှာတင်မကဘဲ မောင်တောမြို့နယ်ဘက်မှာလည်း လုပ်ဆောင်ခဲ့သလို ရှေ့ဆက်ပြီးတော့လည်းတားမြစ်ချက်တွေကို လိုက်နာမှုရှိစေဖို့ မြို့နယ်အသီးသီးမှာ ဆက်တိုက်စစ်ဆေးသွားမယ်လို့သိရပါတယ်။
