Border News Agency
မောင်တော၊ ဧပြီ ၂။
အာရက္ခပြည်အတွင်း နိုင်ငံခြားဖြစ် အရက်ယမကာတွေကို သတ်မှတ်ထားတဲ့ကာလအတိုင်း ယာယီတင်သွင်းခွင့်နဲ့ ရောင်းချခွင့်ပြုလိုက်တယ်လို့ ရက္ခိုင်အမျိုးသားအဖွဲ့ချုပ် (ULA) ဗဟိုဌာနချုပ်က ဧပြီလ ၁ ရက်နေ့မှာ အမိန့်ထုတ်ပြန်လိုက်ပါတယ်။
အဲဒီသတ်မှတ်ချက်အရ နိုင်ငံခြားဖြစ် အရက်တွေကို ဧပြီလ ၂ ရက်နေ့ကနေ ၁၀ ရက်နေ့အထိ ၉ ရက်ကြာတင်သွင်းခွင့်ပြုမှာဖြစ်ပြီး ရောင်းချခွင့်ကိုတော့ ဧပြီလ ၁ ရက်ကနေ မေလ ၃၀ ရက်နေ့အထိ ခွင့်ပြုပေးသွားမှာ ဖြစ်ပါတယ်။
အဲဒီတင်သွင်းထားပြီးသား အရက်တွေရှိရင်လည်း ထုတ်ပြန်ချက်ထွက်လာတဲ့ နေ့ကစပြီး ၇ ရက်အတွင်း သက်ဆိုင်ရာ မြို့နယ်အခွန်ဌာနတွေမှာ အခွန်ပေးဆောင်ပြီးမှသာ ဖြန့်ဖြူးရောင်းချရမှာ ဖြစ်ပါတယ်။
သတ်မှတ်ကာလ ကျော်လွန်သွားပြီးနောက်ပိုင်းမှာ ဆက်လက်တင်သွင်း ဒါမှမဟုတ် ရောင်းချလိုရင်တော့ သက်ဆိုင်ရာခရိုင်အုပ်ချုပ်ရေးဌာနကတဆင့် အထူးအရက်ထိန်းချုပ်ရေးအဖွဲ့ (ACB) ထံမှာ လိုင်စင် ဒါမှမဟုတ် ခွင့်ပြုမိန့် ကြိုတင်လျှောက်ထားရမှာပါ။
ဒီစည်းကမ်းချက်တွေကိုမလိုက်နာဘဲ ခိုးယူတင်သွင်းတာ ဒါမှမဟုတ် ရောင်းချတာတွေ လုပ်ဆောင်ရင် ထိရောက်စွာ အရေးယူခံရမယ့်အပြင်နာမည်ပျက်စာရင်းသွင်းခံရပြီးနောက်ပိုင်းမှာ လိုင်စင်လျှောက်ခွင့် ပိတ်ပင်ခံရမယ်လို့ အသိပေးထားပါတယ်။
