Border News Agency
မကွေး၊ ဧပြီ ၁၀။
မကွေးတိုင်း၊ မင်းလှမြို့နယ်အတွင်းက ပုသိမ်-မုံရွာလမ်းပိုင်းမှာ စစ်ကော်မရှင်တပ်သားတွေဟာ အရပ်သားဟန်ဆောင်ပြီး လှုပ်ရှားသွားလာနေတာကြောင့် ခရီးသွားပြည်သူတွေအနေနဲ့ လုံခြုံရေးအထူးသတိပြုကြဖို့ ပြည်သူ့လွတ်လပ်ရေးအဖွဲ့/ပြည်သူ့လွတ်လပ်ရေးတပ်တော် (PIO/PIA) က အသိပေးချက် ထုတ်ပြန်လိုက်ပါတယ်။
PIO/PIA ရဲ့ ထောက်လှမ်းချက်တွေအရ စစ်ကော်မရှင်တပ်နဲ့ဆက်နွှယ်သူတွေဟာ မူးယစ်ဆေးဝါးနဲ့ အသုံးအဆောင်ပစ္စည်းတွေကို ပြည်သူအသွင်ယူသယ်ဆောင်နေသလို စစ်ကြောင်းထိုးဖို့နဲ့သတင်းထောက်လှမ်းဖို့အတွက် အိမ်စီးကားတွေကိုအသုံးပြုပြီး ရွှေ့ပြောင်းလှုပ်ရှားနေတာတွေရှိနေတယ်လို့ဆိုပါတယ်။
အဲဒါကြောင့် လမ်းပိုင်းအသုံးပြုသူတွေအနေနဲ့ တော်လှန်ရေးတပ်ဖွဲ့တွေရဲ့ လုံခြုံရေးစစ်ဆေးမှုတွေကို ဝိုင်းဝန်းကူညီပေးဖို့၊ ကားနဲ့သွားလာချိန်မှာ မှန်တံခါးတွေချထားပေးဖို့နဲ့ လမ်းဘေး ဝဲ/ယာ မြေသားပေါ်မှာ ကားရပ်နားတာမျိုးမလုပ်ကြဖို့ မေတ္တာရပ်ခံထားပါတယ်။
ခရီးသွားပြည်သူတွေအနေနဲ့ ညပိုင်းသွားလာတာကို တတ်နိုင်သမျှရှောင်ကြဉ်ကြဖို့နဲ့ လမ်းပိုင်းဖြတ်သန်းမှုတွေအတွက် သက်ဆိုင်ရာအဖွဲ့တွေကို ချိတ်ဆက်သတင်းပို့ဖို့လည်း တိုက်တွန်းထားပါတယ်။
စစ်ကော်မရှင်တပ်ရဲ့ အကြမ်းဖက်လုပ်ရပ်တွေကြားမှာ ပြည်သူတွေအနေနဲ့ လုံခြုံရေးအသိ၊သတိနဲ့သွားလာကြဖို့နဲ့ တော်လှန်ရေးအင်အားစုတွေရဲ့ လုံခြုံရေးလုပ်ငန်းစဉ်တွေမှာ အပြည့်အဝပူးပေါင်းပါဝင်ပေးကြဖို့ PIO/PIA က နှိုးဆော်ထားပါတယ်။
