Border News Agency
ပါကစ္စတန်၊ ဧပြီ ၁၂။
၁၉၇၉ ခုနှစ် အစ္စလာမ္မစ်တော်လှန်ရေးနောက်ပိုင်း ဝါရှင်တန်နဲ့တီဟီရန်တို့ကြား ပထမဆုံးအကြိမ်အဖြစ် လူကိုယ်တိုင်တိုက်ရိုက်တွေ့ဆုံတဲ့ အပစ်အခတ်ရပ်စဲရေးဆွေးနွေးပွဲကို ပါကစ္စတန်နိုင်ငံ၊အစ္စလာမ္မာဘတ်မြို့မှာ ဧပြီလ ၁၁ ရက်၊ မနေ့ကစတင်လိုက်ပြီဖြစ်ပါတယ်။
အဲဒီဆွေးနွေးပွဲမှာ အမေရိကန်ဒုသမ္မတဂျေဒီဗန့်စ်ဦးဆောင်တဲ့ ကိုယ်စားလှယ်အဖွဲ့နဲ့အီရန်လွှတ်တော်ဥက္ကဋ္ဌမိုဟာမက်ဘာဂါဂါလီဘတ်ဖ်၊နိုင်ငံခြားရေးဝန်ကြီး အဘတ်စ်အာရက်ချီတို့ပါဝင်တဲ့ ကိုယ်စားလှယ်အဖွဲ့တို့ဟာ ပါကစ္စတန်ဝန်ကြီးချုပ် ရှာဘတ်ဇ်ရှာရစ်ဖ်ရဲ့ စေ့စပ်ညှိနှိုင်းပေးမှုနဲ့ တွေ့ဆုံနေကြတာပါ။
သီးခြားစီဆွေးနွေးမယ့် အစီအစဉ်ကနေ အခုအခါနှစ်ဖက်အဖွဲ့တွေဟာ အခန်းတခန်းတည်းမှာ တိုက်ရိုက်ဆွေးနွေးမှုတွေ ပြုလုပ်နေကြတာဖြစ်ပြီး လက်ဘနွန်မှာအပစ်အခတ်ရပ်စဲရေးနဲ့ အီရန်ရဲ့ပိတ်ဆို့ခံထားရတဲ့ ရန်ပုံငွေတွေကိုပြန်လည်ထုတ်ပေးရေးကိစ္စရပ်တွေမှာ တိုးတက်မှုအချို့ ရှိနေတယ်လို့ သိရပါတယ်။
အမေရိကန်သမ္မတထရမ့်ကတော့ အီရန်အနေနဲ့စစ်ရေးအရ အရှုံးကြီးရှုံးနိမ့်နေပြီလို့ လူမှုကွန်ရက်ကနေပြောကြားထားသလို ပါကစ္စတန်ဘက်ကတော့ ဒီဆွေးနွေးပွဲကနေ စစ်ပွဲကိုအဆုံးသတ်နိုင်မယ့် အောင်မြင်တဲ့ရလဒ်တွေထွက်လာဖို့ မျှော်လင့်နေပါတယ်။
အဲဒီအဆင့်မြင့်ကိုယ်စားလှယ်အဖွဲ့တွေရဲ့ ဆွေးနွေးမှုအပြင် နည်းပညာပိုင်းဆိုင်ရာကျွမ်းကျင်သူတွေပါဝင်တဲ့ ကော်မတီအသီးသီးကလည်း အပစ်အခတ်ရပ်စဲရေးဆိုင်ရာ အသေးစိတ်အချက်အလက်တွေကို ဆက်လက်ညှိနှိုင်းသွားဖို့ ရှိနေပါတယ်။
