Border News Agency
ရန်ကုန်၊ ဧပြီ ၁၂။
ရန်ကုန်တိုင်း၊ ဒဂုံဆိပ်ကမ်းမြို့နယ်အတွင်း အုပ်ချုပ်ရေးမှူးကိုယ်တိုင် မူးယစ်ဆေးဝါးနဲ့အကွက်ဆင်ဖမ်းဆီးကာ စစ်သားအဖြစ်အဓမ္မစုဆောင်းခြင်းခံခဲ့ရတဲ့ ကိုဖြိုးမြတ်ကျော်ဟာ အာရက္ခတပ်တော် (AA)ဆီအလင်းဝင်ရောက်လာတယ်လို့ ဧပြီလ ၁၁ ရက်၊ မနေ့ကထုတ်ပြန်ပါတယ်။
ကိုဖြိုးမြတ်ကျော်ဟာ ပြီးခဲ့တဲ့ ၂၀၂၅ ခုနှစ်၊ ဧပြီ ၂၈ ရက်နေ့ ညပိုင်းက ပန်းရံအလုပ်ကအပြန်လမ်းခရီးမှာ ရှေ့တကျင်းရပ်ကွက်အုပ်ချုပ်ရေးမှူးနဲ့အဖွဲ့ရဲ့တားဆီးခြင်းကိုခံခဲ့ရပြီး သူ့ရဲ့အိတ်အတွင်း မူးယစ်ဆေးဝါးအတင်းထည့်ကာ လုပ်ကြံဖမ်းဆီးခံခဲ့ရတာဖြစ်ပါတယ်။
”အုပ်ချုပ်ရေးမှူးတောက်တဲ့နဲ့ သူ့လူတွေက ကျွန်တော့်အိတ်ကိုစစ်မယ်ဆိုပြီး ယူသွားတယ်။ ပြီးတော့ ကျွန်တော့်ရှေ့တင် WY ဆေးပြားတွေကို အိတ်ထဲထည့်ပြီး မင်းအိတ်ထဲက မူးယစ်ဆေးတွေ့တယ်ဆိုပြီး အိမ်ခေါ်သွားကာ သံကြိုးတွေခတ်ထားခဲ့တာ။”လို့ ကိုဖြိုးမြတ်ကျော်က သူ့ရဲ့ကိုယ်တွေ့ကို ပြောပြပါတယ်။
အဲဒီအုပ်ချုပ်ရေးမှူးဖြစ်သူဟာ ကိုဖြိုးမြတ်ကျော်ကို မူးယစ်ဆေးဝါးတွေနဲ့အတူ ဓာတ်ပုံရိုက်ကာခြိမ်းခြောက်ခဲ့သလို၊ စစ်ထဲဝင်မလား၊ထောင်ကျခံမလားဆိုပြီး ရွေးချယ်ခိုင်းကာ ဝိုင်းဝန်းထိုးကြိတ်ညှဉ်းပန်းနှိပ်စက်ခဲ့ကြတယ်လို့ဆိုပါတယ်။
အဲဒီအပြင် မိခင်ဖြစ်သူကိုယ်တိုင်လာရောက်တောင်းပန်ခဲ့ပေမယ့် အုပ်ချုပ်ရေးမှူးကငြင်းပယ်ခဲ့ပြီးနောက် ကိုဖြိုးမြတ်ကျော်ဟာအသားနာတဲ့ဒဏ်ကိုမခံနိုင်တော့တဲ့အဆုံးမှာ စစ်ထဲဝင်ပါမယ်လို့ဝန်ခံပြောဆိုခဲ့ရတယ်လို့ဆိုပါတယ်။
”အမေကငိုပြီးလာတောင်းပန်တာကိုတောင် အုပ်ချုပ်ရေးမှူးက မရဘူး။ နင့်သား ဘာလုပ်လုပ်ငါစိတ်မဝင်စားဘူး။ ငါနင့်သားကို တပ်ထဲထည့်မှာပဲလို့ ပြောခဲ့တာ။သူ့အိမ်မှာ ၄ ရက်လောက် သံကြိုးခတ်ခံထားရပြီးမှ တပ်ထဲပို့ခံခဲ့ရတာပါ။” လို့ သူက ဆက်ပြောပါတယ်။
ခုဖြစ်ရပ်ဟာ ရန်ကုန်မြို့ပေါ်မှာ စစ်ကော်မရှင်တပ်ရဲ့ အုပ်ချုပ်ရေးယန္တရားက အပြစ်မဲ့လူငယ်တွေကို နည်းမျိုးစုံနဲ့အကွက်ဆင်ကာ အဓမ္မစစ်သားစုဆောင်းနေတဲ့ သက်သေတခုလည်းဖြစ်ပါတယ်။
အဲဒီကိုဖြိုးမြတ်ကျော်ဟာ စစ်ကော်မရှင်တပ်အတွင်းကနေစွန့်ခွာပြီး အာရက္ခတပ်တော်ဆီအလင်းဝင်ရောက်ခိုလှုံနေပြီဖြစ်ပါတယ်။
စစ်ကော်မရှင်တပ်အတွင်းမှာ အဓမ္မစုဆောင်းခံရမှုတွေ၊ အထက်အရာရှိတွေရဲ့ဖိနှိပ်မှုတွေနဲ့ တရားမျှတမှုကင်းမဲ့တဲ့လုပ်ရပ်တွေကြောင့် စစ်ကော်မရှင်တပ်သားတွေဟာ အာရက္ခတပ်တော်နဲ့ တော်လှန်ရေးတပ်တွေဆီကို နေ့တိုင်းလိုလိုအလင်းဝင်လာနေကြတာဖြစ်ပါတယ်။
