မြန်မာနိုင်ငံမှာ မတ်လ ၂၈ ရက်နေ့ကအင်အား ၇ ဒသမ ၇ အဆင့်ရှိအင်အားအလွန်ပြင်းထန်တဲ့ငလျင်ကြီးလှုပ်ခတ်ခဲ့ပြီးနောက် ရှမ်းပြည်၊အင်းလေးဒေသမှာလည်း ထိခိုက်ပျက်စီးမှုတွေရှိခဲ့ပေမယ့် ကယ်ဆယ်ကူညီရေးတွေမရှိသ လောက်နည်းပါးနေသေးတယ်လို့ အင်းလေးဒေသခံတွေက ဆိုကြပါတယ်။
ငလျင်ဒဏ်ကိုကြုံတွေ့ခံစားခဲ့ကြရသူတွေဟာ နေအိမ်တွေပြိုပျက်သွားခဲ့ကြတာမို့ လှေတွေပေါ်မှာအဆင်ပြေသလို နေထိုင်နေကြရသလို အစားအစာတွေ၊သောက်သုံးရေ၊ဆေးဝါး၊ယာယီနေထိုင်စရာတွေ အကူအညီတွေ လိုအပ်နေကြတယ်လို့ အင်းလေးဒေသခံတွေကဆိုကြပါတယ်။
အဲဒီငလျင်ကြီးဟာ မန္တလေးမြို့အရှေ့မြောက်ဘက် ၁၂ မိုင်အကွာကို ဗဟိုပြုလှုပ်ခတ်ခဲ့ပြီးနောက် အင်းလေးဒေသမှာလည်း အလောင်းတွေ ဆယ်ယူမရသေးတာတွေရှိသေးတယ်လို့လည်း အင်းလေးဒေသခံတွေက ဆိုကြပါတယ်။
အဲဒီလိုငလျင်ကြောင့် ကလေးသူငယ်တွေ၊ အမျိုးသမီးတွေ၊ရဟန်းသံဃာ တော်တွေအပါအဝင်လူပေါင်များစွာသေဆုံးဒဏ်ရာရခဲ့ကြသလိုအဆောက်အအုံတွေလည်းအများအပြားရှိပျက်စီးသွားခဲ့ပါတယ်။
အဲဒါကြောင့် မန္တလေးတိုင်း၊စစ်ကိုင်းတိုင်း၊မကွေးတိုင်း၊ပဲခူးတိုင်း၊ရှမ်းပြည်အရှေ့မြောက်ပိုင်းနဲ့နေပြည်တော်ကောင်စီနယ်မြေတွေကို အာဏာသိမ်းစစ်ကောင်စီရဲ့အမျိုးသားသဘာ၀ဘေးအန္တရာယ်ဆိုင်ရာစီမံခန့်ခွဲမှုကော်မတီမှ မတ်လ ၂၈ ရက်နေ့က အရေးပေါ်အခြေအနေကြေညာထားပါတယ်။
